ନୟାଗଡ଼, (ବାଘୁଆବାର୍ତ୍ତା): ତମାଖୁ ସେବନ ଓ ଧୂମପାନର କୁପ୍ରଭାବ ବିଷୟରେ ଲୋକଙ୍କୁ ସଚେତନ କରିବା ଲାଗି ପ୍ରତିବର୍ଷ ମ’ ୩୧ ତାରିଖକୁ ‘ବିଶ୍ୱ ତମାଖୁ ବର୍ଜନ ଦିବସ’ ଭାବେ ପାଳନ କରାଯାଉଛି। ଏହି ଉପଲକ୍ଷେ ମୁଖ୍ୟମନ୍ତ୍ରୀ ମୋହନ ଚରଣ ମାଝିଙ୍କ କରକମଳରେ ଲୋକ ସେବା ଭବନଠାରେ ରାଜ୍ୟ ସ୍ତରୀୟ ଉଦଘାଟନ ସମାରୋହ ହୋଇଯାଇଛି । ବିଶେଷ କରି “ଆମ ସଂକଳ୍ପ – ନିଶା ନୁହେଁ, ଜୀବନ’, ଟିଭି ଚ୍ୟାନେଲରେ ପ୍ରସାରିତ ବିଜ୍ଞାପନ, ସଚେତନତା ଉପରେ ଆଧାରିତ ଗୀତ ଏବଂ ସୂଚନା ପୁସ୍ତକର ଅନାବରଣ ଓ ଲୋକାର୍ପଣ ହୋଇଯାଇଛି । ଏହି କାର୍ଯ୍ୟକ୍ରମରେ ଆଭାସି ଯୋଗେ ନୟାଗଡ଼ ଜିଲ୍ଲାରେ ଜିଲ୍ଲାପାଳଙ୍କ ଓସ୍ୱ।ନ କକ୍ଷରେ ଜିଲ୍ଲାପାଳ ଅକ୍ଷୟ ସୁନୀଲ ଅଗ୍ରୱାଲ, ଅତିରିକ୍ତ ଆରକ୍ଷୀ ଅଧିକ୍ଷକ ସୁବାସ ଚନ୍ଦ୍ର ପଣ୍ଡା, ଡିଏଫଓ କ୍ଷମା ଷଡ଼ଙ୍ଗୀ, ଜିଲ୍ଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ଲଗ୍ନଜିତ ରାଉତ, ଅବକାରୀ ଅଧିକ୍ଷକ ଜ୍ଞାନ ରଞ୍ଜନ ପଣ୍ଡା, ସିଡିଏମଓ ଡଃ ସୁଶାନ୍ତ କୁମାର ଦାଶ, ଜିଲ୍ଲା ଶିକ୍ଷା ଅଧିକାରୀ ଚିତ୍ତରଞ୍ଜନ ପାଣ୍ଡେ, ଜିଲ୍ଲା କ୍ରୀଡ଼ା ଅଧିକାରୀ ସୁଜାତା କୁମାରୀ ସାହୁ, ଜିଲ୍ଲା ସୂଚନା ଓ ଲୋକସଂପର୍କ ଅଧିକାରୀ ଜ୍ୟୋତ୍ସ୍ନା ମୟୀ ଆଚାର୍ଯ୍ୟ ପ୍ରମୁଖ ଯୋଗ ଦେଇଥିଲେ। ବିଭିନ୍ନ ନିଶାଦ୍ରବ୍ୟ ବ୍ୟବହାରର କୁପରିଣାମ ସହିତ ଅପମିଶ୍ରିତ, ବିଷାକ୍ତ ଏବଂ ଚୋରା ମଦ କାରବାର ସମ୍ପୂର୍ଣ୍ଣ ରୋକିବା ପାଇଁ ‘ଆମ ସଂକଳ୍ପ – ନିଶା ନୁହେଁ, ଜୀବନ’ ଶୀର୍ଷକରେ ରାଜ୍ୟ ସରକାରଙ୍କ ପକ୍ଷରୁ ବ୍ୟାପକ ସଚେତନତା କାର୍ଯ୍ୟକ୍ରମ କରାଯାଉଛି। ଏହି ଅଭିଯାନ ମେ’ ୩୧, ‘ବିଶ୍ୱ ତମାଖୁ ବର୍ଜନ’ ଦିବସ ଠାରୁ ଆରମ୍ଭ ହୋଇ ଜୁନ ୨୬, ‘ଅନ୍ତର୍ଜାତୀୟ ନିଶା ସେବନ ଓ ବେଆଇନ କାରବାର ନିରୋଧ’ ଦିବସ ପର୍ଯ୍ୟନ୍ତ ଚାଲିବ।
ବିଶ୍ୱ ତମାଖୁ ବର୍ଜନ ଦିବସ ପାଳନ
