ଭୁବନେଶ୍ୱର (ବାଘୁଆବାର୍ତ୍ତା): ମହାମାରୀ କରୋନା ସଂକ୍ରମଣକୁ ରୋକିବା ପାଇଁ ବଡ଼ ଘୋଷଣା କରିଛନ୍ତି ପଶ୍ଚିମବଙ୍ଗର ମୁଖ୍ୟ ଶାସନ ସଚିବ । ଆସନ୍ତା କାଲିଠାରୁ ୩୦ ତାରିଖ ଯାଏ ପୂରା ରାଜ୍ୟରେ ସଂପୂର୍ଣ୍ଣ ଲକଡାଉନ ଲାଗୁ କରାଯିବ । ଲକଡାଉନ ସମୟରେ ଅର୍ଥାତ ସକାଳ ୬ ଟାରୁ ୩୦ ତାରିଖ ସନ୍ଧ୍ୟା ୬ଟା ଯାଏ ରାଜ୍ୟରେ ଥିବା ସମସ୍ତ ସରକାରୀ ଓ ଘରୋଇ ଅଫିସ ବନ୍ଦ ରହିବ । କେବଳ ଜରୁରୀ ସେବା କରୁଥିବା ଅଫିସ ଗୁଡ଼ିକ ଖୋଲା ରହିବ । ଉପଯୁକ୍ତ ପରିଚୟପତ୍ର ଦେଖାଇ ଏହାର କର୍ମଚାରୀ ଯିବା ଆସିବା କରିବେ । ଜରୁରୀ ସେବାକୁ ଛାଡି ଦେଲେ ଆଉ କୌଣସି ଅଫିସ ଖୋଲି ପାରିବ ନାହିଁ । ସ୍କୁଲ ଓ କଲେଜ ମଧ୍ୟ ୩୦ ତାରିଖ ଯାଏ ବନ୍ଦ ରହିବ ବୋଲି ମୁଖ୍ୟ ଶାସନ ସଚିବ କହିଛନ୍ତି । କାଲିଠାରୁ ଲକଡାଉନ ଲାଗୁ କରାଯାଉଥିବାରୁ ଲୋକାଲ ଟ୍ରେନ, ମେଟ୍ରୋ ସେବା, ଆନ୍ତଃରାଜ୍ୟ ଟ୍ରେନ ଓ ବସ ଚଳାଚଳ ଠାରୁ ଆରମ୍ଭ କରି ସବୁ କିଛି ବନ୍ଦ ରହିବ । ଜରୁରୀ ସାମଗ୍ର ନେଇ ଯାଉଥିବା ଟ୍ରକକୁ ଛାଡିଦେଲେ ରାଜ୍ୟ ଭିତରକୁ ବାହାରୁ କିମ୍ବା ବାହାର ରାଜ୍ୟରୁ ପଶ୍ଚିମବଙ୍ଗକୁ କୌଣସି ଗାଡ଼ି ଆସିପାରିବ ନାହିଁ । ଘରୋଇ କାର, ଟ୍ୟାକ୍ସି ଓ ଅଟୋ ମଧ୍ୟ ରାସ୍ତାରେ ଚାଲି ପାରିବ ନାହିଁ । ସମସ୍ତ କାର୍ଯ୍ୟକଳାପ ରାତି ୯ଟାରୁ ଭୋର ୫ଟା ଯାଏ ବନ୍ଦ ରହିବ । ଏହି ସମୟରେ ଲୋକଙ୍କ ଯାତାୟତ ଓ ଗାଡ଼ି ଚଳାଚଳ କରିପାରିବ ନାହିଁ । ବ୍ୟାଙ୍କରେ ଦିନ ୧୦ଟାରୁ ଦିନ ୨ଟା କର୍ମଚାରୀମାନେ କାମ କରିପାରିବେ । ଅଯଥାରେ କେହି ବି ରାସ୍ତାକୁ ବାହାରିବେ ନାହିଁ । କ୍ଷୀର, ପନି ପରିବା, ମାଛ, ମାଂସ ଓ ରୁଟି ବିକ୍ରି କରୁଥିବା ବଜାର ଏବଂ ମାର୍କେଟ ଗୁଡ଼ିକ ସକାଳ ୭ଟାରୁ ୧୦ଟା ଖୋଲା ରହିପାରିବ ବୋଲି ମୁଖ୍ୟ ଶାସନ ସଚିବ କହିଛନ୍ତି ।
