ଭାଇ ବାହାଘରରେ ମହିଳା ତହସିଲଦାରଙ୍କ ଜବରଦସ୍ତ ନାଚ, ଭିଡିଓ ଭାଇରାଲ

ଯାଜପୁର (ବାଘୁଆବାର୍ତ୍ତା): ବଢ଼ୁଥିବା କରୋନା ସଂକ୍ରମଣରେ ବ୍ରେକ ଦେବାପାଇଁ ସରକାର ବିଭିନ୍ନ ପଦକ୍ଷେପ ନେଉଛନ୍ତି । ଲକଡାଉନ ଓ ସପ୍ତାହନ୍ତ ସଟଡାଉନ ଆଦି କଟକଣା ଲାଗୁ କରିବା ସହ ବିବାହ, ଭୋଜି ଓ ସାମାଜିକ କାର୍ଯ୍ୟକ୍ରମ ଆଦିକୁ ସମ୍ପୁର୍ଣ୍ଣ ବାରଣ କରାଯାଇଛି । ଏହାର ତଦାରଖ ପାଇଁ ପୋଲିସ ଓ ପ୍ରଶାସନିକ ଅଧିକାରୀ ମାନେ ଲାଗି ପଡିଛନ୍ତି । ଖୋଦ ଜଣେ ପ୍ରଶାସନିକ ଅଧିକାରୀ ଏହାକୁ ଅବମାନନା କରୁଥିବା ଦେଖିବାକୁ ମିଳିଛି । ଜଗତସିଂହପୁର ଜିଲ୍ଲା ତିର୍ତ୍ତୋଲ ବ୍ଳକ ଜଗନ୍ନାଥପୁର ଅଞ୍ଚଳରେ ଜଣେ ତହସିଲଦାର ବାହାଘର ପ୍ରସେସନରରେ ନାଚୁଥିବା ଭିଡିଓ ହୋଇଛି । ଏହି ତହସିଲଦାର ଜଣଙ୍କ ହେଉଛନ୍ତି ଯାଜପୁର ଜିଲ୍ଲା ସୁକିନ୍ଦା ତହସିଲଦାର ବୁଲବୁଲ ବେହେରା । ସୂଚନା ମୁତାବକ ଗତ ୧୨ ତାରିଖ ଦିନ ସେ ତାଙ୍କ ଭାଇ ବାହାଘର ଅବସରରେ ଜଗତସିଂହପୁର ତିର୍ତୋଲ ଅଞ୍ଚଳକୁ ବରଯାତ୍ରୀ ଯାଇଥିଲେ । ତେବେ ସେଠାରେ ସେ ଅନ୍ୟମାନଙ୍କ ସହିତ ମିଶି ନାଚୁ ଥିବା ଭିଡିଓରେ ଦେଖିବାକୁ ମିଳିଛି । ପୁଣି ନାଚ ସମୟରେ କେତେବେଳେ ମାସ୍କ ପିନ୍ଧିଛନ୍ତି ତ ଆଉ କେତେବେଳେ ବିନା ମାସ୍କରେ ନାଚୁଛନ୍ତି । ଏହି ଭିଡିଓରେ ଥିବା ନାଲି ରଙ୍ଗର ଲେହେଙ୍ଗା ପିନ୍ଧିଥିବା ମହିଳା ଜଣଙ୍କ ହେଉଛନ୍ତି ତହସିଲଦାର ବୁଲବୁଲ ବେହେରା ।