ନୟାଗଡ଼,(ବାଘୁଆବାର୍ତ୍ତା): ବିଶିଷ୍ଟ ରାଜନେତା, ସୁସାହିତ୍ୟିକ, ଶିକ୍ଷାବିତ୍, ନାଟ୍ୟକାର, ସମାଜସେବୀ ତଥା ନୟାଗଡ଼ ନିର୍ବାଚନ ମଣ୍ଡଳୀର ପୂର୍ବତନ ବିଧାୟକ ସ୍ୱର୍ଗତ ବଂଶୀଧର ସାହୁଙ୍କ ସ୍ମୃତିରେ ଇଟାମାଟି ବଂଶୀଧର ମହାବିଦ୍ୟାଳୟ ପରିସରରେ ବିଷୁବ ମିଳନ ଓ ରାଜ୍ୟ ସ୍ତରୀୟ କବିତା ଆସର ଅନୁଷ୍ଠିତ ହୋଇଯାଇଛି । ତତସହିତ ଆମ୍ବେଦକରଙ୍କ ଜନନ୍ତୀ ମଧ୍ୟ ପାଳନ କରାଯାଇଛି । ଓଡ଼ିଆ ନବବର୍ଷ ଉପଲକ୍ଷେ ବଂଶୀଧର ଇଣ୍ଟରନ୍ୟାସନାଲ ଫାଉଣ୍ଡେସନ୍ ଫର ପିସ୍ ଆଣ୍ଡ ଡେଭଲପମେଣ୍ଟ ଆନୁକୂଲ୍ୟରେ ଆୟୋଜିତ କାର୍ଯ୍ୟକ୍ରମରେ ନାଟ୍ୟକାର ରାମଚନ୍ଦ୍ର ମିଶ୍ର ମୁଖ୍ୟଅତିଥି ଭାବେ ଯୋଗ ଦେଇ ଶୁଭାରମ୍ଭ କରିଥିବା ବେଳେ ମୁଖ୍ୟବକ୍ତା ଭାବେ ନାଟ୍ୟଭୂଷଣ ଡ. ବିଜୟ କୁମାର ଚୌଧୁରୀ, ବଂଶୀଧର ସ୍ମୃତି କମିଟିର ସଭାପତି ଡ. ରଙ୍ଗନାଥ ବେହେରା ଓ ନିର୍ମଳ ଚନ୍ଦ୍ର ଶୂରଦେଓ ସମ୍ମାନୀତ ଅତିଥି ଭାବେ ଯୋଗଦେଇ ଆୟୋଜିତ ସଭାରେ ଅଭିଭାଷଣ ରଖିଥିଲେ । ବଂଶୀଧର ଇଣ୍ଟରନ୍ୟାସନାଲ ଫାଉଣ୍ଡେସନ ଫର ପିସ୍ ଆଣ୍ଡ ଡେଭଲପମେଣ୍ଟର ସଭାପତି ଆଇନୀଜିବୀ ମନୋଜ କୁମାର ସାହୁ ଓ ସଂପାଦକ ଉମେଶ ଚନ୍ଦ୍ର ପଟ୍ଟନାୟକଙ୍କ ଆବାହକତ୍ୱରେ ଅନୁଷ୍ଠିତ ଉକ୍ତ ସଭାରେ ବିଦୁଲତା ସାହୁ ସଭାପତିତ୍ୱ କରିଥିଲେ । ସେତୁବନ୍ଧର ସଂପାଦିକା ଉଷାମଣୀ ମିଶ୍ର, ଜିଲ୍ଲା ଲେଖକ ପରିଷଦର ସଂପାଦକ ଶେଖ୍ ଅବଦୁଲ୍ ଖାଲିକ୍, ଗାଳ୍ପିକ ତଥା କବି ଗୋଲକ ବିହାରୀ ନାୟକଙ୍କୁ ବଂଶୀଧର ସାହିତ୍ୟ ସମ୍ମାନରେ ସମ୍ମାନିତ କରାଯାଇଥିଲା । କବିତା ପାଠୋତ୍ସବକୁ ନିଳିମା ନନ୍ଦ ଓ କ୍ଷଣପ୍ରଭା କର ସଂଯୋଜନା କରିଥିଲେ ।
