ଟିକା ନିଅନ୍ତୁ ସୁସ୍ଥ ରୁହନ୍ତୁ, ଅସହାୟଙ୍କୁ ସହାୟ ପାଇଁ ଆଗେଇ ଆସନ୍ତୁ : ବିରାଟ

ନୂଆଦିଲ୍ଲୀ (ବାଘୁଆବାର୍ତ୍ତା): ସାରା ଦେଶରେ ହୁ ହୁ ହୋଇ ବଢ଼ିବାରେ ଲାଗିଛି କରୋନା ସଂକ୍ରମଣ । ଏସବୁ ମଧ୍ୟରେ ଟିକା କରଣ ପ୍ରକ୍ରିୟାକୁ ବ୍ୟାପକ କରାଯାଉଛି । ଏହାରି ମଧ୍ୟରେ ସୋମବାର ଟିମ ଇଣ୍ଡିଆର ଅଧିନାୟକ ବିରାଟ କୋହଲି ଟିକା ନେଇଛନ୍ତି । ଏନେଇ ବିରାଟ ନିଜେ ଇନଷ୍ଟଗ୍ରାମରେ ସୂଚନା ଦେଇଛନ୍ତି । କରୋନା ଟିକା ନେବା ସହିତ ଦେଶବାସୀଙ୍କୁ ଟିକା ନେବାକୁ ଅପିଲ କରିଛନ୍ତି ବିରାଟ । ବିରାଟ ନିଜ ଇନଷ୍ଟଗ୍ରାମରେ ଲେଖିଛନ୍ତି ଯେ, ‘ଯେତେଶୀଘ୍ର ସମ୍ବବ ଟିକା ନେଇ ଯାଅ, ସମସ୍ତେ ସୁସ୍ଥ ରୁହ’ । ଅନ୍ୟପଟେ ଟିମ ଇଣ୍ଡିଆର ଷ୍ଟାର ପେସ ବୋଲର ଈଶାନ୍ତ ଶର୍ମା ଓ ତାଙ୍କ ଧର୍ମ ପତ୍ନୀ ଟିକା ନେଇ ସାରିଛନ୍ତି । ସେହିପରି ଗତ ସପ୍ତାହରେ ଉମେଶ ଯାଦବ, ଆଜିଙ୍କ୍ୟ ରାହାଣେ, ଶିଖର ଧାୱନ ଟିକାର ପ୍ରଥମ ଡୋଜ ନେଇ ସାରିଛନ୍ତି । ଭାରତରେ କରୋନା ସଂକ୍ରମଣ ବୃଦ୍ଧିପାଉଥିବାରୁ ଲୋକମାନଙ୍କୁ ସାହାଯ୍ୟ କରିବାକୁ ଆଗେଇ ଆସିଥିଲେ ବିରାଟ କୋହଲି ଏବଂ ପତ୍ନୀ ଅନୁଷ୍କା ଶର୍ମା । ଲୋକମାନଙ୍କୁ ଅପିଲ କରି ବିରୁଷ୍କା କହିଥିଲେ, ଯଥା ସମ୍ଭବ ଅସହାୟ ମାନଙ୍କୁ ଏହି ସମ୍ବେଦନଶୀଳ ସମୟରେ ସାହାଯ୍ୟ କରିବାକୁ ସମସ୍ତେ ଆଗେଇ ଆସନ୍ତୁ । ଉଭୟ ୨ କୋଟି ଟଙ୍କାର ସହାୟତା ଦେବା ସହିତ ଅନ୍ୟମାନେ ମଧ୍ୟ କିଛି କିଛି ଦାନ କରନ୍ତୁ ବୋଲି ଅପିଲ କରିଥିଲେ ।