ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ଦଶପଲ୍ଲା ବ୍ଳକ ଚଡ଼େୟାପଲ୍ଲୀ ପଞ୍ଚାୟତର ଏକ ଅପହଞ୍ଚ ଆଦିବାସୀ ଗାଁ ହେଉଛି ତାମୁଣ୍ଡି ଏବଂ ଭିରୁଡ଼ା । ଏହି ଦୁଇ ଗାଁର ଲୋକ ବାହାର ଦୁନିଆ ଦେଖିବାକୁ ୭ କିମି ଜଙ୍ଗଲ ପାଦଚଲା ରାସ୍ତା ଅତିକ୍ରମ କରିଥାନ୍ତି । ଗଛ, ପତ୍ର ସୁ ସୁ ଗର୍ଜ୍ଜନ ଏବଂ ବନ୍ୟଜନ୍ତୁଙ୍କ ଚିତ୍କାର ଶଦ୍ଦରେ ଗ୍ରାମର ତାମୁଣ୍ଡି ଗ୍ରାମର ୩୦ ପରିବାର ଏବଂ ଭିରୁଡ଼ା ଗ୍ରାମର ୧୬ ପରିବାର କାହିଁ କେଉଁ କାଳରୁ ଜୀବନ ବିତାଉଛନ୍ତି । ତାମୁଣ୍ଡିଠାରୁ ଭିରୁଡ଼ା ମଧ୍ୟରେ ଏକ କିଲୋମିର ବ୍ୟବଧାନ ଥିବା ବେଳେ ଉଭୟ ଗ୍ରାମବାସୀ ମୈାଳିକ ସୁବିଧା ପାଇବାରୁ ସଦା ସର୍ବଦା ବଞ୍ଚିତ । ଚାଷ କାମ ସହ ଖଲି ସିଇବା ଏବଂ ଜଙ୍ଗଲଜାତ ଦ୍ରବ୍ୟ ସଂଗ୍ରହ କରିବା ଏମାନଙ୍କ ମୁଖ୍ୟ ଜୀବିକା । ଗାଁର ମହିଳାମାନେ ଜଙ୍ଗଲରୁ ଶିଆଳି ଓ ଶାଳ ପତ୍ର ସଂଗ୍ରହ କରି ଖଲି ସିଲାଇ କରନ୍ତି । ଚାଷ ବାଷ କରିବା ପାଇଁ ମଧ୍ୟ ଜଳଯୋଗାଣର କୈାଣସି ସୁବିଧା ନଥିବା ବେଳେ ପିଇବା ପାଣି ପାଇଁ ଏହି ପରିବାର ଗୁଡ଼ିକ ନାହିଁ ନଥିବା ହଇରାଣ ହେଉଥିବା ଜଣାଯାଇଛି ।
ଗାଁ ନିକଟସ୍ଥ ଝରଣା ଏବଂ ଗ୍ରାମରେ ଥିବା ଏକ କାଠଚୂଆରୁ ପିଇବା ପାଣି ସଂଗ୍ରହ କରିଥାନ୍ତି । ଜଙ୍ଗଲରୁ ମିଳୁଥିବା ଖାଦ୍ୟ ଏବଂ କାଠଚୂଆ ପାଣିରେ ଏମାନଙ୍କ ଜୀବନ ବିତୁଥିବା ଜଣାଯାଇଛି । କାହାର ସ୍ୱାସ୍ଥ୍ୟ ଖରାପ ହେଲେ ଦୋଳା ସାହାର୍ଯ୍ୟରେ ବାଣିଗୋଚ୍ଛା ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର ନତୁବା ଦଶପଲ୍ଲା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଯିବାକୁ ପଡ଼ିଥାଏ । ସବୁଠାରୁ ବିସ୍ମୟକର ତଥା ହାସ୍ୟସ୍ପଦ କଥା ହେଉଛି କି ଏହି ଗ୍ରାମକୁ ସରକାର ବାହ୍ୟ ମଳମୁକ୍ତ ଗ୍ରାମଭାବେ ଘୋଷଣା କରିଛନ୍ତି । ଏଥିପାଇଁ ଗାଁଠାରୁ ୭ କିମି ଦୂର ଚଡ଼େୟାପଲ୍ଲୀ ନିକଟରେ ବାହ୍ୟ ମଳମୁକ୍ତ ଫଳକ ମଧ୍ୟ ଲଗାଯାଇଛି । ମାତ୍ର ସରକାରଙ୍କ ଦ୍ୱାରା ପ୍ରଦ୍ଦତ ଗୋଟିଏ ବି ପାଇଖାନା ଗାଁରେ ନିର୍ମାଣ କରାଯାଇନଥିବା ଜଣାଯାଇଛି । ଗ୍ରାମବାସୀଙ୍କ ପାଇଁ ଆବାସ ଯୋଜନା ସାତ ସପନ । ଚାଳ ଛପର କଚା ଘରେ ସବୁ ଆଦିବାସୀ ଲୋକ ଜୀବନ ଯାପନ କରୁଛନ୍ତି । ଗାଁକୁ ଆଜି ପର୍ଯ୍ୟନ୍ତ ବିଦ୍ୟୁତ୍ ଆସି ନଥିବା ଜଣାଯାଇଛି । ଗ୍ରାମବାସୀଙ୍କ ପାଇଁ ଯୋଗାଇ ଦିଆଯାଇଥିବା ସୋଲାର ପ୍ରକଳ୍ପ କାହିଁ କେଉଁ କାଳରୁ ଅଚଳ ହୋଇପଡ଼ିଥିବା ବେଳେ ଡିବିରି ଆଲୁଅ ଭରସା ପାଲଟିଛି । ଗ୍ରାମର ଶିକ୍ଷା ପାଇଁ କୈାଣସି ବ୍ୟବସ୍ଥା ନାହିଁ । ଶିକ୍ଷା ପାଇଁ ଚଡ଼େୟାପଲ୍ଲୀ ଅଙ୍ଗନବାଡ଼ି କିମ୍ବା ବିଦ୍ୟାଳୟ ଉପରେ ନିର୍ଭର କରିବାକୁ ପଡ଼ିଥାଏ । ଗାଁ ଉନ୍ନତୀ ପାଇଁ ଏକ ସବୁଦିନିଆ ରାସ୍ତା ନିର୍ମାଣ ପାଇଁ ଗ୍ରାମବାସୀ ଦାବି କରୁଛନ୍ତି ।
