ନୟାଗଡ଼, (ବାଘୁଆବାର୍ତ୍ତା): ସରକାର ଗ୍ରାମାଞ୍ଚଳର ଉନ୍ନତି ପାଇଁ ବିଭିନ୍ନ ଯୋଜନାମାନ ପ୍ରଣୟନ କରି କୋଟି କୋଟି ଟଙ୍କା ବ୍ୟୟ କରୁଛନ୍ତି । ଏହାର ସୁଫଳ ପ୍ରକୃତ ହିତାଧିକାରୀଙ୍କ ନିକଟରେ ପହଞ୍ଚି ପାରୁ ନଥିବା ବେଳେ ଅନେକ ଜୀବନ ଏବେବି ମୈାଳିକ ସୁବିଧା ପାଇବାରୁ ବଂଚିତ ହେଉଛନ୍ତି । ଯାହା ଫଳରେ ଦୁର୍ଦ୍ଦଶାର ଗନ୍ତାଘର ପାଲଟି ଯାଉଛି ଅନେକ ଗ୍ରାମର ଭାଗ୍ୟ ଓ ଭବିଷ୍ୟତ । ନୟାଗଡ଼ ଜିଲ୍ଲା ଖଣ୍ଡପଡ଼ା ବ୍ଳକ ଗଡ଼ିଆସାହି ପଂଚାୟତ ସାଧୁଆପଲ୍ଲୀ ଗ୍ରାମର ଏହାର ଏକ ଦୃଷ୍ଟାନ୍ତ । ନୟାଗଡ଼ କଣ୍ଟିଲୋ ମୁଖ୍ୟ ରାସ୍ତାର ଖଳିସାହି ଛକଠାରୁ ଠାରୁ ପ୍ରାୟ ୬ କିଲୋମିଟର ଦୂରତା ଏହି ଗାଁକୁ ଆଜି ପର୍ଯ୍ୟନ୍ତ ପକ୍କା ରାସ୍ତାଟିଏ ନିର୍ମାଣ ହୋଇପାରିନଥିବାରୁ ପାଦରେ ଚାଲି ଯିବାକୁ ପଡିଥାଏ । ଗଡ଼ିଆସାହି ଛକଠାରୁ ୨ କିଲୋମିଟର ରାସ୍ତାରେ ଅତ୍ୟନ୍ତ କଦର୍ଯ୍ୟ ହୋଇପଡ଼ିରହଥିବା ବେଳେ ବିପତ୍ତି ସମୟରେ ଦମକଳ ଅଥବା ଅମ୍ବୁଲାନ୍ସ ମଧ୍ୟ ଯାଇପାରେ ନାହିଁ । ବର୍ଷା ରୁତୁରେ ଅନେକ ଦିନ ଧରି ଏହା ଏକପ୍ରକାର ବାହ୍ୟ ଜଗତ ଠାରୁ ବିଛିନ୍ନ ହୋଇଥାଏ । ଝାଟି ମାଟିର ନୂଆଣିଆ ନଡ଼ା ଓ ଘାସ ଛପର ଘରେ ଏହି ଗ୍ରାମର ୧୫୦ ଲୋକ ବସବାସ କରିଥାନ୍ତି । ସବୁବେଳେ ନିଆଁ ଓ ପାଣିକୁ ଡର ଥାଏ । ପ୍ରଧାନମନ୍ତ୍ରୀ ଗ୍ରାମୀଣ ଆବାସ ଯୋଜନାରେ କେତେକ ହିତାଧିକାରୀଙ୍କୁ କାର୍ଯ୍ୟାଦଶେ ମିଳିଥିଲେ ମଧ୍ୟ ଦାରିଦ୍ର୍ୟତା ମୁଖ୍ୟ ପ୍ରତିବନ୍ଧକ ସୃଷ୍ଟି କରିବାରୁ ଗୃହନିର୍ମାଣ ହୋଇପାରେ ନାହିଁ । କିମ୍ବା ଏହି ସମସ୍ୟାର ସମାଧାନ ପାଇଁ ସରକାରୀ ସ୍ତରରେ କୈାଣସି ଆନ୍ତରିକ ଉଦ୍ୟମ କରାଯାଇନାହିଁ । ତେଣୁ ଦାରିଦ୍ର୍ୟ ସୀମାରେଖା ତଳେ ବସବାସ କରୁଥିବା ୩୦ ପରିବାରର ୧୫୦ ଜଣ ଗ୍ରାମବାସୀ ସରକାରୀ ଯୋଜନାରୁ ବଂଚିତ ହେଉଥିବା ବେଳେ ଏମାନଙ୍କ ମଧ୍ୟରୁ ଅନେକଙ୍କୁ ଖାଦ୍ୟ ସୁରକ୍ଷା ଯୋଜନାରେ ଯୋଡ଼ାଯାଇ ନଥିବା ଅଭିଯୋଗ ହୋଇଛି । ଗ୍ରାମରେ ଥିବା ଚାଷ ଜମିକୁ ଜଳସେଚନର ସୁବିଧା ନଥିବା ବେଳେ ଗ୍ରାମ ନିକଟରେ ଥିବା ନାଳକୁ ଭରଷା କରି ବର୍ଷକରେ ଥରେ ମାତ୍ର ଚାଷ କରାଯାଏ । ଅନ୍ୟ ପକ୍ଷରେ ଯାହାବି କିଛି ଫସଲ ହୁଏ ତାକୁ ଗାଇଗୋରୁ ଓ ମାଙ୍କଡମାନେ ଆସି ଉଜାଡି ଦିଅନ୍ତି । ଏହାର ସମାଧାନ ଅସମ୍ବବ ହୋଇ ପଡିଥିବାରୁ ବେଳେ ଗ୍ରାମବାସୀ ଏକ ଚେକଡ୍ୟାମ ନିର୍ମାଣ ପାଇଁ ଦାବି କରୁଛନ୍ତି । ଗ୍ରାମଟି ମ୍ୟାଲେରିଆ ପ୍ରବଣ ଏବଂ ଅଗମ୍ୟ ହୋଇଥିବାରୁ ସ୍ୱାସ୍ଥ୍ୟକର୍ମୀଙ୍କ ପାଦ ପଡେ ନାହିଁ । ନିକଟରେ ଥିବା ଗଡ଼ିଆସାହି ସ୍ୱାସ୍ଥ୍ୟ କେନ୍ଦ୍ର ଉପରେ ଗ୍ରାମବାସୀ ନିର୍ଭର କରୁଥିବା ବେଳେ ଅନେକ ସମୟରେ ରୋଗୀଙ୍କୁ ଦୋଳାରେ ବୋହି ନେବାକୁ ପଡ଼ୁଥିବା ଗ୍ରାମବାସୀ କହିଛନ୍ତି । ସମନ୍ୱିତ ଶିଶୁ ବିକାଶ ଯୋଜନାରେ ଆସୁଥିବା ସାମଗ୍ରୀ ହିତାଧିକାରୀଙ୍କ ନିକଟରେ ପହଞ୍ଚି ପାରୁ ନଥିବା ବେଳେ ଏହାକୁ ବାଟମାରଣା କରାଯାଉଥିବା ଅଭିଯୋଗ ହେଉଛି । ଗ୍ରାମରେ ଥିବା ବିଦ୍ୟାଳୟରେ ଥିଲେ ମଧ୍ୟ ପାଠପଢ଼ା ଠିକରେ ହେଉନଥିବା ଗ୍ରାମବାସୀ କହିଛନ୍ତି । ପାନୀୟ ଜଳର ସମସ୍ୟା ନକହିବା ଭଲ । ପାନୀୟ ଜଳ ୍ୋଗାଣ ପାଇଁ ବିଭିନ୍ନ ଦାବି ହେଉଥିଲେ ମଧ୍ୟ ସେମାନଙ୍କ ଦାବିକୁ ନେତା ଓ ପ୍ରଶାସନିକ ଅଧିକାରୀମାନେ ଅଣଦେଖା କରୁଛନ୍ତି ଫଳରେ ଗ୍ରାମରେ ଥିବା ୨ଟି ନଳକୂପ ଗ୍ରାମବାସୀଙ୍କ ତୃଷ୍ଣା ମେଣ୍ଟାଉଛି । ହେଲେ ଖରାଦିନେ ସେଥିରୁ ବାହାରୁଥିବା ପାଣି ଆବଶ୍ୟକତା ମେଣ୍ଟାଇ ପାରେ ନାହିଁ । ବିଭିନ୍ନ ସମୟରେ ଲୋକମାନେ ବିଭିନ୍ନ ସଂକ୍ରାମକ ରୋଗରେ ପିଡିତ ହୋଇଥାନ୍ତି । ଅନ୍ୟପକ୍ଷେ ପ୍ରଶାସନିକ ଅବହେଳା ଓ ନେତାଙ୍କ ଇଛା ଶକ୍ତି ଅଭାବରୁ ଏହି ଗ୍ରାମର ବିକାଶ ହୋଇ ପାରୁ ନଥିବା ଆଲୋଚନା ହେଉଛି ।
