ଦୁର୍ନୀତି ପାଲଟିଛି ନୀତି, ଶପଥ ଗ୍ରହଣ ଉତ୍ସବ ହଲ ଖାଲି

ନୟାଗଡ଼,(ବାଘୁଆବାର୍ତ୍ତା): ଜିଲ୍ଲା ସ୍ତରୀୟ ଦୁର୍ନିତୀ ନିବାରଣ ସଚେତନତା ସପ୍ତାହ ପାଳନ ଅବସରରେ ଆଜି ଏକ ସାଧାରଣ ସଭା ତଥା ଆଲୋଚନା ଚକ୍ର କାର୍ଯ୍ୟକ୍ରମ ଜିଲ୍ଲା ପ୍ରଶାସନ ପକ୍ଷରୁ ଆୟୋଜନ ହୋଇଥିଲା। ଜିଲ୍ଲା ପରିଷଦ ସୃଜନ ସଭା ଗୃହରେ ଆୟୋଜିତ ଏହି ସଭାରେ ଦୁର୍ନିତୀ ମୁକ୍ତ ତଥା ନାଗରିକଙ୍କ ପାଇଁ ଶପଥ ଗ୍ରହଣ କାର୍ଯ୍ୟକ୍ରମ ରହିଥିଲା। ୧୧ ଟାରେ ଅନୁଷ୍ଠିତ ହେବାକୁ ଥିବା ଏହି କାର୍ଯ୍ୟକ୍ରମରେ ହାତ ଗଣତି ଛାତ୍ରଛାତ୍ରୀ, ସମାଜସେବୀ, ଗଣମାଧ୍ୟମ ପ୍ରତିନିଧି ଯୋଗ ଦେଇଥିଲେ। ସଭା ପରିସରର ଶୁଣ୍ୟତାକୁ ପୂର୍ଣ୍ଣ କରିବା ପାଇଁ ଏସବିଆଇ ଦ୍ଵାରା ତାଲିମ ନେଉଥିବା ମହିଳାଙ୍କୁ ବୈଠକକୁ ନିମନ୍ତ୍ରଣ କରାଯାଇଥିଲା। ଜିଲ୍ଲାପାଳ ରବୀନ୍ଦ୍ର ନାଥ ସାହୁ, ଏସପି ଅଲେଖ ପହି, ଜିଲ୍ଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ସୁବାଷ ଚନ୍ଦ୍ର ରାୟ, ଭିଜିଲାନ୍ସ ଡିଏସପି ଶ୍ରୀକାନ୍ତ କୁମାର ବେହେରା କାର୍ଯ୍ୟକ୍ରମ ଅବ୍ୟବହିତ ପୂର୍ବରୁ ପହଞ୍ଚିଥିବା ବେଳେ ସରକାରୀ କର୍ମଚାରୀ କିମ୍ୱା ଅଧିକାରୀଙ୍କ ଦେଖା ମିଳିନଥିଲା। ୬/୭ ଜଣ ସରକାରୀ କର୍ମଚାରୀ ଏହି ବୈଠକରେ ଉପସ୍ଥିତ ରହିଥିଲେ। ଦୁର୍ନୀତିକୁ ନୀତି କରିଥିବା ସରକାରୀ କର୍ମଚାରୀ ଓ ଅଧିକାରୀ ଯଦି ଶପଥ ପାଠ କରିବାର ଆବଶ୍ୟକତା ନାହିଁ, ତେବେ କାର୍ଯ୍ୟକ୍ରମ ଆୟୋଜନ କରିବାର ଆବଶ୍ୟକତା ନାହିଁ ବୋଲି ମତ ପ୍ରକାଶ ପାଇଛି।