କେନ୍ଦୁଝର, (ବାଘୁଆବାର୍ତ୍ତା): କେନ୍ଦୁଝର ଭିଜିଲାନ୍ସ ବିଭାଗର ମହିଳା କନେଷ୍ଟବଳ ସାଗରିକା ବାରିକ ନିଲମ୍ବିତ ହୋଇଛନ୍ତି । ମହିଳା କନେଷ୍ଟବଳ ସାଗରିକା ବାରିକ ଜଣେ ମୁଦାଲାଙ୍କୁ ଲାଞ୍ଚ ମାଗିବାର ଅଡିଓ ଭାଇରାଲ୍ ହେବା ପରେ ତାଙ୍କୁ ପ୍ରଥମେ ତୁରନ୍ତ ବାଲେଶ୍ୱର ଭିଜିଲାନ୍ସ ହେଡକ୍ୱାର୍ଟରକୁ ବଦଳି କରାଯାଇଥିଲା । ଏହାସହ ପ୍ରାଥମିକ ତଦନ୍ତ ପରେ ସାଗରିକାକୁ ନିଲମ୍ବନ କରାଯାଇଛି । ଏ ନେଇ ଅଧିକ ତଦନ୍ତ ଜାରି ରହିଥିବା ଭିଜିଲାନ୍ସ ଏସପି ନରହରି ନାୟକ ସୂଚନା ଦେଇଛନ୍ତି । ଏହାସହ ଅଡିଓରେ ମହିଳା କନେଷ୍ଟବଳ ଯେଉଁମାନଙ୍କ ନାମ ନେଉଛନ୍ତି ସେ ସମ୍ପର୍କରେ ମଧ୍ୟ ତଦନ୍ତ ହେବ ବୋଲି ସେ ସୂଚନା ଦେଇଛନ୍ତି । ଗତ କିଛି ଦିନ ଧରି ସାରା କେନ୍ଦୁଝର ଜିଲ୍ଲାରେ ଭିଜିଲାନ୍ସ ବିଭାଗର ମହିଳା କନେଷ୍ଟବଳ ସାଗରିକା ବାରିକଙ୍କ ଅଡ଼ିଓ ଏ ମୋବାଇଲରୁ ସେ ମୋବାଇଲକୁ ଘୁରି ବୁଲୁଛି । ଆଉ ସେ କଥା ହେଉଥିବା ବ୍ୟକ୍ତି ଜଣଙ୍କ ଭିଜିଲାନ୍ସ ଜାଲରେ ପଡିଥିବା ଜଣେ ବ୍ୟକ୍ତି ବୋଲି ଜଣାପଡିଛି । ଯାହାଙ୍କର ମାମଲା ଏବେ କେନ୍ଦୁଝର ସ୍ୱତନ୍ତ୍ର ଭିଜିଲାନ୍ସ କୋର୍ଟରେ ବିଚାରାଧୀନ ରହିଛି ।

ମୋବାଇଲ ମାଧ୍ୟମରେ ମାମଲାକୁ ରଫାଦଫା କରିବାକୁ ଏବଂ କେଶ କିପରି ଦୁର୍ବଳ ହେବ ସେଥିପାଇଁ ସାକ୍ଷୀମାନଙ୍କୁ ପ୍ରଭାବିତ କରିବାକୁ କିଛି ମାଲ୍ ଖର୍ଚ୍ଚ କରିବାକୁ ପଡିବ ବୋଲି ମହିଳା କର୍ମଚାରୀ ଜଣଙ୍କ କହୁଥିବା ଅଡିଓରେ ଶୁଣା ଯାଉଛି । ଉପରୁ ତଳ ପର୍ୟ୍ୟନ୍ତ ସରକାରୀ ଓକିଲ ସମସ୍ତେ ନେବେ, କେତେ ଖର୍ଚ୍ଚ କରିପାରିବ ବୋଲି ମହିଳା କର୍ମଚାରୀ ପଚାରୁଛନ୍ତି । ମୁଁ ସବୁ କରେଇ ପାରିବି ଆଗରୁ ଏମିତି ବହୁତ ଲୋକଙ୍କ କାମ କରାଯାଇଛି ବୋଲି କହୁଛନ୍ତି । ମହିଳା ଜଣଙ୍କ ଟଙ୍କା ପାଇଁ ଏତେ ତଳକୁ ଖସି ଯାଇଛନ୍ତି ଯେ ଦୁନିଆରେ କେହି ସଚ୍ଚୋଟ ନୁହଁ । ଏପରିକି ତାଙ୍କ ବାପା-ମା’ ବି ମିଛୁଆ, ମିଛ କହି ତାଙ୍କୁ ଜନ୍ମ କରିଛନ୍ତି । ଖର୍ଚ୍ଚ କଲେ ସବୁ ସମ୍ଭବ ବୋଲି ମଧ୍ୟ କହୁଛନ୍ତି । ତେବେ ଦୁର୍ନୀତିଖୋର ଲୋକଙ୍କୁ ଭିଜିଲାନ୍ସ ଧରୁଥିବା ବେଳେ ଭିଜିଲାନ୍ସର ଜଣେ ମହିଳା କର୍ମଚାରୀଙ୍କ ଏହି ଅଡିଓ ଏବେ ଭିଜିଲାନ୍ସ ବିଭାଗକୁ ଅଡ଼ୁଆରେ ପକାଇଥିଲା । ଚଳିତ ମାସ ୨୬ ତାରିଖରେ ବାଲେଶ୍ଵର ଭିଜିଲାନ୍ସ ଏସପି କେନ୍ଦୁଝର ଜିଲ୍ଲା ଗସ୍ତ ରେ ଥିବା ବେଳେ ସେ ଏ ଘଟଣା ସଂପର୍କରେ ଗଣମାଧ୍ୟମରୁ ଜାଣିବାକୁ ପାଇଥିଲେ । ପରେ ପରେ ତୁରନ୍ତ ସାଗରିକାଙ୍କୁ ବାଲେଶ୍ଵର ହେଡକ୍ୱାର୍ଟରକୁ ବଦଳି କରିଥିଲେ ଓ ପ୍ରାଥମିକ ତଦନ୍ତ ପରେ ତାଙ୍କୁ ଏବେ ଚିକିରିରୁ ନିଲମ୍ବିତ କରାଯିବା ସହ ତଦନ୍ତ ଜାରି ରହିଥିବା ଏସପି ସୂଚନା ଦେଇଛନ୍ତି ।





