କାବୁଲ, (ବାଘୁଆବାର୍ତ୍ତା): ଆଫଗାନିସ୍ତାନରେ ତାଲିବାନର କବ୍ଜା ପରେ ରକ୍ତପାତ ଜାରି ରହିଛି। ଆଫଗାନୀ ଓ ଆମେରିକୀୟ ନାଗରିକଙ୍କୁ ସୁରକ୍ଷିତ ଭାବରେ ବାହାର କରିବା ପାଇଁ ଆମେରିକାର ସୈନିକ ସେଠାରେ ରହିଛନ୍ତି। ବିମାନବନ୍ଦରରେ ଆମେରିକା ସୈନିକ ଏହି କାମରେ ଖୁବ୍ ଜୋରଦାର ଭାବରେ ଲାଗି ପଡିଛନ୍ତି। ଏହି ସମୟରେ କିଛି ମହିଳା ନିଜ ନିଜର ଛୋଟ ଛୋଟ ପିଲାଙ୍କୁ ସୁରକ୍ଷିତ ସ୍ଥାନକୁ ନେଇ ଯିବାକୁ ଚେଷ୍ଟା କରୁଛନ୍ତି। ଏହି ସମୟର ଫଟୋ ଓ ଭିଡିଓ ଏବେ ଭାଇରାଲ ହେଉଛି। ଏହା ଭିତରେ ଆମେରିକା ସୈନିକଙ୍କର ଏକ ହୃଦୟସ୍ପର୍ଶୀ ଫଟୋ ଦେଖିବାକୁ ମିଳିଛି। ଆମେରିକାର ସୈନିକମାନେ ଛୋଟ ପିଲାଙ୍କୁ କୋଳରେ ଧରି ତାଙ୍କୁ ଗେହ୍ଲା କରୁଥିବାର ଦେଖିପାରିବେ। ଆଫଗାନିସ୍ତାନରେ ହାମିଦ୍ କରଜଇ ଅନ୍ତର୍ଜାତୀୟ ବିମାନ ବନ୍ଦରରେ ଛୋଟ ପିଲାଙ୍କୁ କୋଳରେ ଧରି ବୁଝାଇ ସୁଝାଇ ତାଙ୍କର କାନ୍ଦ ବନ୍ଦ କରିବାର ଚେଷ୍ଟା କରୁଥିଲେ। ସୈନିକଙ୍କ ଏହି ଫଟୋ ଆମେରିକାର ପ୍ରତିରକ୍ଷା ବିଭାଗ ନିଜର ଅଫିସିଆଲ ଟ୍ବିଟର ଆକାଉଣ୍ଟ ଜରିଆରେ ସେୟାର କରିଛି। ଆଫଗାନିସ୍ତାନର ଲୋକଙ୍କୁ ତାଲିବାନର ବିପଦରୁ ବଞ୍ଚାଇବାର ଚେଷ୍ଟାରେ ଥିବା ଏହି ସୈନିକଙ୍କ ଫଟୋ ସମସ୍ତଙ୍କର ହୃଦୟ ଜିଣିନେଇଛି। ଚାରିଆଡେ ରକ୍ତପାତ ଚାଲିଥିବା ବେଳେ ସୈନିକଙ୍କ ମୁହଁରେ ମମତାର ଭାବନା ଖୁବ୍ ଶାନ୍ତିଦାୟକ ଥିଲା। ଟ୍ବିଟ୍ରେ ପ୍ରତିରକ୍ଷା ବିଭାଗ ଏହି ଫଟୋ ସେୟାର କରି ଲେଖିଛି, ଆମେରିକା ସୈନ୍ୟ ସେବାର ସଦସ୍ୟ ଆଫଗାନିସ୍ତାନର କାବୁଲର ହମିଦ କରଜଇ ଅନ୍ତର୍ଜାତୀୟ ବିମାନବନ୍ଦରରେ ଛୋଟ ଶିଶୁଙ୍କର ଯତ୍ନ ନେଉଥିବାର ଦେଖିବାକୁ ମିଳିଥିଲେ। ଆଫଗାନିସ୍ତାନରୁ ଏପର୍ୟ୍ୟନ୍ତ ପଳାଇବାରେ ବିଫଳ ଥିବା ଲୋକ ବିଶେଷ କରି ମା’ମାନେ ନିଜର ପିଲାଙ୍କ ସୁରକ୍ଷା ପାଇଁ ତାଙ୍କୁ ଆମେରିକା ସୈନିକଙ୍କ ହାତରେ ଦେଇଥିଲେ। ବିମାନବନ୍ଦରରେ ଥିବା କଣ୍ଟାଳିଆ ତାର ବାଡ ପାର କରି ନିଜର ପିଲାଙ୍କୁ ଧରି ଆମେରିକା ସୈନିକଙ୍କ ହାତରେ ଦେଉଥିବାର ଫଟୋ ଭାଇରାଲ ହେଉଛି।
ବିମାନବନ୍ଦରରେ ଆଫଗାନି ଶିଶୁଙ୍କୁ କୋଳରେ ଧରି ହୃଦୟ ଛୁଇଁ ନେଲେ ଆମେରିକୀୟ ସୈନିକ
