ଭୁବନେଶ୍ୱର, (ବାଘୁଆବାର୍ତ୍ତା): ଏଣିକି ସମସ୍ତ କଲେଜ, ବିଶ୍ୱବିଦ୍ୟାଳୟର ୱେବ୍ସାଇଟ୍କୁ ଠିକ୍ ଭାବେ ପରିଚାଳନା କରାଯିବ । ପ୍ରତିଟି ସୂଚନା ରହିବ । ଏପରିକି ପବ୍ଲିକ୍ ସେଲ୍ଫ ଡିସ୍କ୍ଲୋଜର ବାଧ୍ୟତାମୂଳକ ହେବ । ଏପରି ନିର୍ଦ୍ଦେଶ ଦେଇଛି ବିଶ୍ୱବିଦ୍ୟାଳୟ ଅନୁଦାନ ଆୟୋଗ (ୟୁଜିସି)। ୟୁଜିସି ପକ୍ଷରୁ କୁହାଯାଇଛି ଯେ, ଜାତୀୟ ଶିକ୍ଷା ନୀତି ୨୦୨୦ ଅନୁଯାୟୀ ସମସ୍ତ ବିଷୟକୁ ସ୍ୱଚ୍ଛତାର ସହ କରାଯିବ । ଏହି ଆଧାରରେ ୱେବ୍ସାଇଟ୍ରେ ସମସ୍ତ ଜରୁରି ସୂଚନା ରହିବ । ସବୁର ଲିଙ୍କ୍ ରଖାଯିବ । ଶିକ୍ଷାନୁଷ୍ଠାନ ବିଷୟରେ ସଂପୂର୍ଣ୍ଣ ତଥ୍ୟ ରହିବ । ବିଶ୍ୱବିଦ୍ୟାଳୟ ଆଇନ ଓ ନିୟମ ସଂପର୍କରେ ଉଲ୍ଲେଖ କରାଯିବ । ବିଶ୍ୱବିଦ୍ୟାଳୟ ଅଧୀନରେ ଥିବା ସମସ୍ତ କଲେଜ, ଦୂରନିରନ୍ତର ପାଠ୍ୟକ୍ରମ ସଂପର୍କରେ ଉଲ୍ଲେଖ କରାଯିବ । ନାକ୍, ଏନ୍ଆଇଆର୍ଏଫ୍ ର୍ୟାଙ୍କିଂ, ଅନୁବନ୍ଧନ ଏବଂ ବାର୍ଷିକ ରିପୋର୍ଟ ମଧ୍ୟ ୱେବ୍ସାଇଟ୍ରେ ସ୍ଥାନ ପାଇବ । ବିଶ୍ୱବିଦ୍ୟାଳୟ, କଲେଜକୁ ମିଳିଥିବା ଅନୁମତି, ଅନୁମୋଦନ ସଂପର୍କିତ ତଥ୍ୟ ରହିବ । ଏପରିକି ସ୍ୱଚ୍ଛତା ଆଣିବା ପାଇଁ ବାର୍ଷିକ ଆକାଉଣ୍ଟ ରିପୋର୍ଟ, ବାଲାନ୍ସ ସିଟ୍, ଆୟ ବ୍ୟୟ ଖର୍ଚ୍ଚ ଉପସ୍ଥାପନ କରାଯିବା ସହ ଅଡିଟ୍ ରିପୋର୍ଟ ରଖିବା ବାଧ୍ୟତାମୂଳକ ହେବ । ସେହିପରି କୁଳାଧିପତି, କୁଳପତି, ଉପକୁଳପତି, କୁଳସଚିବ, ଅଧ୍ୟକ୍ଷ, ପରୀକ୍ଷା ନିୟନ୍ତ୍ରକ, ପିଜି କାଉନ୍ସିଲ ଅଧ୍ୟକ୍ଷ, ମୁଖ୍ୟ ଭିଜିଲାନ୍ସ ଅଫିସରଙ୍କଠୁ ଆରମ୍ଭ କରି ସମସ୍ତ ଏକାଡେମିକ୍ ଲିଡରସିପ୍ଙ୍କ ଫଟୋ ସହ ସେମାନଙ୍କ ବିଷୟରେ ଉଲ୍ଲେଖ କରାଯିବ । ଏକାଡେମିକ୍ କ୍ୟାଲେଣ୍ଡର, କୋର୍ସ, ବିଭାଗ, ସ୍କୁଲ, ଲାଇବ୍ରେରୀ ଆଦି ବିଷୟ ସ୍ଥାନ ପାଇବ । ନାମଲେଖା ଫି, ଫି ଫେରସ୍ତ ନିୟମ ଆଦି ସଂପର୍କରେ ଉଲ୍ଲେଖ ହେବ । ରିସର୍ଚ୍ଚ ଆଣ୍ଡ ଡେଭଲପମେଣ୍ଟ ସେଲ୍, ଇକ୍ୟୁବେସନ୍ ସେଣ୍ଟର, କେନ୍ଦ୍ରୀୟ ସୁବିଧା କେନ୍ଦ୍ର ରଖାଯିବ । ଖେଳ ସୁବିଧା, ଏନ୍ସିସି, ଏନ୍ଏସ୍ଏସ୍, ଛାତ୍ରାବାସ, ପ୍ଲେସ୍ମେଣ୍ଟ ସେଲ୍, ସ୍ୱାସ୍ଥ୍ୟ ସୁବିଧା, ଆଣ୍ଟି ର୍ୟାଗିଂ ସେଲ୍, ଆଭ୍ୟନ୍ତରୀଣ ଅଭିଯୋଗ କମିଟି, ସମାନତା ସୁବିଧା ସେଲ୍, ସୋସିଓ-ଇକୋନୋମିକ୍ ସେଲ, ଭିନ୍ନକ୍ଷମ ପାଇଁ ସୁବିଧା ସୁଯୋଗ ଆଦି ସଂପର୍କରେ ଉଲ୍ଲେଖ ରହିବ । ଆରଟିଆଇ, ନ୍ୟୁଜ୍ ଲେଟର, ନିଯୁକ୍ତି, ନୋଟିସ୍, ନାମଲେଖା ପ୍ରକ୍ରିୟା, ଏଥିସହ ସମସ୍ତ ଯୋଗାଯୋଗ ନମ୍ବର ରହିବ ।
କଲେଜ, ବିଶ୍ୱବିଦ୍ୟାଳୟକୁ ୟୁଜିସିର ନିର୍ଦ୍ଦେଶ, ୱେବ୍ସାଇଟ୍ରେ ରହିବ ସମସ୍ତ ତଥ୍ୟ
