ରାଷ୍ଟ୍ର ବିରୋଧୀ ସ୍ଲୋଗାନ ଦେଇ ଦୁଇ ଯୁବକ ଗିରଫ

କଟକ, (ବାଘୁଆବାର୍ତ୍ତା): ରାଷ୍ଟ୍ର ବିରୋଧୀ ସ୍ଲୋଗାନ ଦେବା ଅଭିଯୋଗରେ କଟକର ଦୁଇ ଯୁବକଙ୍କୁ ଗିରଫ କରି ତଦନ୍ତ କରୁଛି ଚାଉଳିଆଗଞ୍ଜ ଥାନା ପୋଲିସ। ଗତ ୧୫ ତାରିଖ ଦିନ ମହାନଦୀ କୂଳ ଗାନ୍ଧିପଲ୍ଲୀ ଗଡ଼ା ନିକଟରେ ଏହି ରାଷ୍ଟ୍ର ବିରୋଧୀ ସ୍ଲୋଗାନ ଦେଇଥିଲେ ଦୁଇ ଯୁବକ। ସୂଚନା ଅନୁଯାୟୀ, ଅଭିଯୁକ୍ତ ସୌରଭ କୁମାର ସାହୁ “ପାକିସ୍ତାନ ଜିନ୍ଦାବାଦ” ନାରା ଦେଇଥିଲେ, ଆଉ ଗୌତମ ଲେଙ୍କା ନାମକ ଜଣେ ବ୍ୟକ୍ତି ଏହାକୁ ମୋବାଇଲରେ ରେକର୍ଡ କରିଥିଲା। ପରେ ଏହାକୁ ଜାଣିଶୁଣି ଭାଇରାଲ୍ କରିଥିଲେ ଅଭିଯୁକ୍ତ। ଦୁଇଟି ମୋବାଇଲ ଫୋନ୍ ଜବତ୍ କରିଛି ଚାଉଳିଆଗଞ୍ଜ ଥାନା ପୋଲିସ। ତେବେ ଗିରଫ ସୌରଭ ନାଁରେ ପୂର୍ବରୁ ଚାଉଳିଆଗଞ୍ଜ ଥାନାରେ ଦୁଇଟି ମାମଲା ଥିବାବେଳେ, ଗୌତମ ନାଁରେ ମର୍କତ ନଗର ଥାନାରେ ଗୋଟିଏ ମାମଲା ରହିଥିବା ସୂଚନା ଦେଇଛି କମିଶନରେଟ ପୋଲିସ। ଏହା ସହ ପୋଲିସର ସୂଚନା ଅନୁଯାୟୀ, ସୌରଭ କୁମାର ସାହୁ ଓ ଗୌତମ ଲେଙ୍କାକୁ ରବିବାର ଗିରଫ କରାଯାଇଛି। ଘଟଣାରେ ଆଉ କାହା କାହାର ସଂପୃକ୍ତି ରହିଛି ସେ ନେଇ ଅଧିକ ତଦନ୍ତ ଜାରି ରଖିଛି ପୋଲିସ୍। ଗିରଫ ଅଭିଯୁକ୍ତ ଗୌତମ ଲେଙ୍କାଙ୍କର ଏକ ରାଇଫଲ ଧରି ଥିବା ଫଟୋ ମଧ୍ୟ ଭାଇରାଲ୍ ହେଉଥିବାବେଳେ, ଏହି ଫଟୋ ସମ୍ପର୍କରେ ଖୋଳତାଡ଼ ଜାରି ରହିଛି ଏବଂ ଦୁଇ ଅଭିଯୁକ୍ତ କଟକ ସହରର ସାମ୍ପ୍ରଦୟିକ ସଦଭାବ, ସମନ୍ୱୟକୁ ନଷ୍ଟ କରି ହିଂସା ସୃଷ୍ଟି କରିବାକୁ ଉଦ୍ୟମ କରିଥିବା କମିଶନରେଟ ପୋଲିସ ପକ୍ଷରୁ ସୂଚନା ଦିଆଯାଇଛି।