ନୂଆଦିଲ୍ଲୀ, (ବାଘୁଆବାର୍ତ୍ତା): ଉତ୍ତର ପ୍ରଦେଶ ରାଜଧାନୀ ଲକ୍ଷ୍ନୌର ଏକ ଅଦାଲତ ବୀର ସାବରକରଙ୍କ ଉପରେ ଟିପ୍ପଣୀକୁ ନେଇ ସାଂସଦ ରାହୁଲ ଗାନ୍ଧୀଙ୍କ ଉପରେ ୨୦୦ ଟଙ୍କା ଜରିମାନା ଲଗାଇଛନ୍ତି । ମୁଖ୍ୟ ନ୍ୟାୟିକ ମାଜିଷ୍ଟ୍ରେଟ୍ କୋର୍ଟ ଲଗାତାର ଶୁଣାଣିରେ ଗାଏବ ରହିବା କାରଣରୁ ରାହୁଲ ଗାନ୍ଧୀଙ୍କ ଉପରେ ଜରିମାନା ଲଗାଇଛନ୍ତି । ଏହାସହ ମୁଖ୍ୟ ନ୍ୟାୟିକ ମାଜିଷ୍ଟ୍ରେଟ୍ ଚେତାବନୀ ଦେଇଛନ୍ତି ଯେ ୨୦୨୫ ଏପ୍ରିଲ୍ ୧୪ରେ ରାହୁଲ ଗାନ୍ଧୀଙ୍କୁ ଯେକୌଣସି ପରିସ୍ଥିତିରେ ଉପସ୍ଥିତ ରହିବାକୁ ପଡ଼ିବ । ଯଦି ଏହି ତାରିଖରେ ସେ ଉପସ୍ଥିତ ନହୁଅନ୍ତି ତେବେ ତାଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ହୋଇପାରେ । ଆଇନଜୀବୀ ନୃପେନ୍ଦ୍ର ପାଣ୍ଡେୟ ୨୦୨୨ରେ ଧାରା ୧୫୬ (୩) ଦଣ୍ଡ ପ୍ରକ୍ରିୟା ସଂହିତା (ସିଆରପିଏଫ୍) ଅଧିନରେ ରାହୁଲ ଗାନ୍ଧୀଙ୍କ ବିରୋଧରେ ଏତଲା ଦେଇଥିଲେ । ଅଭିଯୋଗ ଉପରେ ଶୁଣାଣି କରି କୋର୍ଟ ରାହୁଲ ଗାନ୍ଧୀଙ୍କୁ ସମନ ଜାରି ହାଜର ହେବାକୁ କହିଥିଲେ । ଓକିଲ ନୃପେନ୍ଦ୍ର ପାଣ୍ଡେୟ ଅଭିଯୋଗ କରିଥିଲେ ଯେ ରାହୁଲ ଗାନ୍ଧୀ ୨୦୨୨ ଡିସେମ୍ୱର ୧୭ରେ ମହାରାଷ୍ଟ୍ରର ଓକୋଲାରେ ଏକ ସାମ୍ୱାଦିକ ସମ୍ମିଳନୀ ବେଳେ ବୀର ସାବରକରଙ୍କୁ ଇଂରେଜଙ୍କ ଚାକର ଓ ପେନ୍ସେନ୍ ନେଇଥିବା ବ୍ୟକ୍ତି ବୋଲି କରିଥିଲେ । ଆଇନଜୀବୀ କହିଥିଲେ ଯେ ଏହି ବୟାନ ସମାଜରେ ବିଦ୍ୱେଷ ସୃଷ୍ଟି କରିବା ଉଦ୍ଦେଶ୍ୟରେ ଦିଆଯାଇଛି । ସେ କହିଛନ୍ତି ଯେ କୋର୍ଟ ତାଙ୍କର ବୟାନ ଓ ସାକ୍ଷୀଙ୍କ ବୟାନକୁ ଗମ୍ଭୀରତାର ସହ ନେଇଥିଲେ । ସମସ୍ତ ସାକ୍ଷ୍ୟର ଅନୁଧ୍ୟାନ କରି କୋର୍ଟ ଜାଣିବାକୁ ପାଇଥିଲେ ଯେ ରାହୁଲ ଗାନ୍ଧୀଙ୍କ ବୟାନ ସମାଜରେ ଘୃଣା ସୃଷ୍ଟିକାରୀ ଥିଲା, ଯାହା ଭାରତୀୟ ଦଣ୍ଡ ସଂହିତାର ଧାରା ୧୫୩ (ଏ) ଓ ୫୦୫ ଅଧିନରେ ଦଣ୍ଡନୀୟ ଅପରାଧ ଅଟେ । ୨୦୨୩ ଅକ୍ଟୋବର ୧ରେ ଆବେଦନକାରୀ ନୃପେନ୍ଦ୍ର ପାଣ୍ଡେୟ ଏମ୍ପି/ଏମ୍ଏଲ୍ଏର ସ୍ୱତନ୍ତ୍ର ଏସିଜେଏମ୍ ଅମ୍ୱରୀଷ କୁମାର ଶ୍ରୀବାସ୍ତବଙ୍କ କୋର୍ଟ ରାହୁଲ ଗାନ୍ଧୀଙ୍କ ବିରୋଧରେ ମାମଲା ରୁଜୁ କରିବା ଦାବିକୁ ଅନୁମତି ଦେଇଥିଲେ । କଂଗ୍ରେସ ନେତା ରାହୁଲ ଗାନ୍ଧୀଙ୍କ ଅନୁପସ୍ଥିତିରେ କୋର୍ଟ ୨୦୦ ଟଙ୍କା ଜରିମାନା ଲଗାଇ ପରବର୍ତ୍ତୀ ଶୁଣାଣି ତାରିଖରେ ହାଜର ହେବା ପାଇଁ କହିଛନ୍ତି । କୋର୍ଟ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ ଯଦି ଏହି ତିଥିରେ ବି ରାହୁଲ ଗାନ୍ଧୀ ବ୍ୟକ୍ତିଗତ ରୂପେ ହାଜର ନହୁଅନ୍ତି ତେବେ ତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ ।
ରାହୁଲ ଗାନ୍ଧୀଙ୍କ ଉପରେ ୨୦୦ ଟଙ୍କା ଜରିମାନା ଲଗାଇଲେ ଲକ୍ଷ୍ନୌ କୋର୍ଟ
