ନୟାଗଡ଼, (ବାଘୁଆବାର୍ତ୍ତା) :ଦଶପଲ୍ଲା,୧୮/୧୧ ଭଉଣୀ ଘରେ ଅଷ୍ଟମୀ ଭାର ଦେଇ ହସଖୁସିରେ ଫେରୁଥିଲେ । ହେଲେ ମର୍ମନ୍ତୁଦ ସଡକ ଦୁର୍ଘଟଣାରେ ସ୍ୱାମୀଙ୍କ ମୃତ୍ୟୁ ହୋଇଥିବା ବେଳେ ପତ୍ନୀ ଗୁରୁତର ଥିବା ଜଣାପଡିଛି । ଖୋର୍ଦ୍ଧା-ବଲାଙ୍ଗୀର ୫୭ ନମ୍ବର ଜାତୀୟ ରାଜପଥର ସ୍ଥାନୀୟ ରଥଗାଁ ନିକଟରେ ଏକ ଟ୍ରକ ଓ ବାଇକ ମଧ୍ୟରେ ଏଭଳି ଦୁର୍ଘଟଣା ଘଟିଛି । ସୂଚନା ଯୋଗ୍ୟ ଯେ ଟାକରା ପଂଚାୟତ ଝିଂଟିକାବାରୀ ଗ୍ରାମର ପ୍ରଫୁଲ୍ଲ ନାୟକ ପତ୍ନୀ ସୁଜାତାଙ୍କୁ ସାଥିରେ ଧରି ଦଶପଲ୍ଲା ଢିପିସାହି ସ୍ଥିତ ଭଉଣୀଙ୍କ ଘରକୁ ଅଷ୍ଟମୀ ଭାର ଧରି ଆସିଥିଲେ । ଅପରାହ୍ନ ପ୍ରାୟ ସାଢେ ୨ଟା ରେ ଉଭୟ (ଓଡି ୨୫ ଏଫ୍ ୭୧୭୦) ବାଇକ ଯୋଗେ ଘରକୁ ଫେରୁଥିବା ବେଳେ ବିପରୀତ ଦିଗରୁ ଦଶପଲ୍ଲା ଅଭିମୁଖେ ଆସୁଥିବା (ଓଡି ୦୭ ଏନ୍ ୧୭୮୯) ଟ୍ରକ ସହ ମୁହାଁମୁହିଁ ଧକ୍କା ହୋଇଥିଲା । ଘଟଣାସ୍ଥଳରେ ପ୍ରଫୁଲ୍ଲଙ୍କ ମୃତ୍ୟୁ ହୋଇଥିବା ବେଳେ ସୁଜାତା ଗୁରୁତର ହୋଇ ପଡିଥିଲେ । ଖବରପାଇ ଦଶପଲ୍ଲା ଦମକଳ ବାହିନୀ ଘଟଣା ସ୍ଥଳରେ ପହଁଚି ଉଭୟଙ୍କୁ ଉଦ୍ଧାର କରି ଦଶପଲ୍ଲା ଗୋଷ୍ଠି ସ୍ୱାସ୍ଥ୍ୟକେନ୍ଦ୍ରରେ ଭର୍ତି କରିଥିଲେ । ସୂଜାତା ଟାକରା ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ଜଣେ ୪ର୍ଥ ଶ୍ରେଣୀ କର୍ମଚାରୀ । ପୁଲିସ ଘଟଣାସ୍ଥଳରେ ପହଁଚି ଦୁର୍ଘଟଣାଗ୍ରସ୍ତ ଗାଡିକୁ ଜବତ କରିବା ସହ ଡ୍ରାଇଭରକୁ ଥାନାରେ ଅଟକ ରଖିଥିବା ଜଣାପଡିଛି ।
