ନୟାଗଡ଼,(ବାଘୁଆବାର୍ତ୍ତା): ଓଡ଼ିଶାର ପାକୃତିକ ପର୍ଯ୍ୟଟନ ସ୍ଥଳୀ ମଧ୍ୟରୁ ଅନ୍ୟତମ କୁଆଁରିଆ ଡ୍ୟାମ ଏବଂ ହରିଣ ପାର୍କ । ଏଠାକାର ଶାନ୍ତ ପରିବେଶ ଏବଂ ମନୋଲୋଭା ଦୃଶ୍ୟ ପର୍ଯ୍ୟଟକଙ୍କୁ ଆକୃଷ୍ଠ କରିଥାଏ । ଏଠାକୁ ଆସିବାକୁ ଚାହୁଁଥିବା ପର୍ଯ୍ୟଟକ ଭୁବନେଶ୍ୱରରୁ କନ୍ଧମାଳ କିମ୍ବା ବୈାଦ୍ଧ ବସ ଯୋଗେ ଖୋର୍ଦ୍ଧା ବଲାଙ୍ଗୀର ଜାତୀୟ ରାଜପଥରେ ୧୨୫ କିଲୋମିଟର ଆସିବା ପଡ଼େ ପଡ଼ିଥାଏ କୁଆଁରିଆ ଛକ । ସେଠାରୁ ମାତ୍ର ଦୁଇ କିଲୋମିଟର ଦୂରରେ ଅବସ୍ଥିତି କୁଆଁରିଆ ଜଳସେଚନ ପ୍ରକଳ୍ପ । ଜଳସେଚନ ବିଭାଗ ଦ୍ୱାରା ନିର୍ମିତ ଏହି ଡ୍ୟାମ ଏବେ ପର୍ଯ୍ୟଟକଙ୍କ ଆକର୍ଷଣର କେନ୍ଦ୍ର ବିନ୍ଦୁ ପାଲଟିଛି ।
ପାହାଡ଼ ପର୍ବତ ଘେରା ଏହି ଜଳାଶୟ ନିକଟରେ ଭୋଜିଭାତ କରିବା ପାଇଁ ପର୍ଯ୍ୟଟନ ବିଭାଗ ପିଣ୍ଡି ନିର୍ମାଣ କରିଛି । ଜଙ୍ଗଲ ପାହାଡ଼ ଘେରା ଏଠାକାର ଶାନ୍ତ ପରିବେଶ ଏବଂ ନୀଳ ଜଳରାଶି ମନରେ ଶୀହରଣ ଜାଗ୍ରତ କରିଥାଏ । ପାଖରେ ଥିବା ପାହାଡ଼ ବୁଲିବା, ଜଳସେଚନ ପ୍ରକଳ୍ପ ବନ୍ଧ ଉପରେ ଦୀର୍ଘ ଚଲାବାଟ ଯାଇ ସୂର୍ଯ୍ୟସ୍ତକୁ ଉପଭୋଗ କରିବାକୁ ଅନେକ ପର୍ଯ୍ୟଟକ ଆସିଥାନ୍ତି । ସୂର୍ଯ୍ୟାସ୍ତ ସମୟର ଦୃଶ୍ୟ ନିଆରା ବୋଲି କୁହାଯାଏ । ନୀଳ ଜଳରାଶି ପଛରେ ରହିଥିବା ପାହାଡ଼ରେ ସୂର୍ଯ୍ୟ ଅସ୍ତ ହେବା ଅନ୍ୟ କୈାଣସି ସ୍ଥାନରେ ଦେଖିବାକୁ ମିଳିନଥାଏ । ଏଥିସହିତ ମହାନଦୀ ବନ୍ୟପ୍ରାଣୀ ଡିଭିଜନ ଅଧିନସ୍ଥ ବାଣିଗୋଚ୍ଛା ବନ୍ୟପ୍ରାଣୀ ବନାଞ୍ଚତତ୍ୱାବଧାନରେ ଏଠାରେ ଏକ ହରିଣ ପାର୍କ ରହିଛି । ୧୯୮୫ ମସିହାରେ ୭ ଟି ହରିଣକୁ ନେଇ ୭ ଏକର ଶାଳବଣରେ ଆରମ୍ଭ ହୋଇଥିବା ଏହି ପାର୍କ, ଏବେ ବୃହତ ହରିଣ ସଂଖ୍ୟାକୁ ନେଇ ସୁନାମ ଅର୍ଜ୍ଜନ କରିଛନ୍ତି । ୨୫୦ରୁ ଉଦ୍ଧ୍ୱର୍ ହରିଣ, ସମ୍ବର ଏବଂ କୋଟରାଙ୍କୁ ଏହି ପାର୍କରେ ଦେଖିବାକୁ ମିଳିଛି । ବନ୍ୟପ୍ରାଣୀ ବିଭାବ ଏବଂ ପର୍ଯ୍ୟଟନ ବିଭାଗ ଏହାର ପରିବେଶକୁ ସ୍ୱତନ୍ତ୍ର ଦୃଷ୍ଟି ଦେବା ସହ ପର୍ଯ୍ୟଟକଙ୍କ ହରିଣ ଦେଖିବା ପାଇଁ ସ୍ୱତନ୍ତ୍ର ବ୍ୟବସ୍ଥା କରିଛନ୍ତି ।
