ରଣପୁର ଝିଅ ଆଇନ ବିଭାଗରେ ଟପ୍ପର: ମିଳିଲା ସ୍ବର୍ଣ୍ଣପଦକ

ନୟାଗଡ଼, (ବାଘୁଆବାର୍ତ୍ତା): ବ୍ରହ୍ମପୁର ବିଶ୍ୱ ବିଦ୍ୟାଳୟ ଆଇନ ବିଭାଗ ସ୍ନାତକୋତ୍ତର ୨୦୧୯ ପରୀକ୍ଷାରେ ଟପ୍ପର ହୋଇଥିବା ନୟାଗଡ଼ ଜିଲ୍ଲା ରଣପୁର ଝିଅ ପୂର୍ବାଶା ପ୍ରିୟଦର୍ଶିନୀ ସାମନ୍ତରାୟଙ୍କୁ ମିଳିଲା ସ୍ବର୍ଣ୍ଣପଦକ । ଏ ନେଇ ଆୟୋଜିତ ସମ୍ବର୍ଦ୍ଧିତ ଉତ୍ସବରେ ଭରଚୁଆଲ ମାଧ୍ୟମରେ ରାଜ୍ୟପାଳ ପ୍ରଫେସର ଗଣେଶୀ ଲାଲ ଯୋଗଦେଇ ଛାତ୍ରଛାତ୍ରୀଙ୍କୁ ଉତ୍ସାହିତ କରିଥିବାବେଳେ ବିଶ୍ୱବିଦ୍ୟାଳୟର କୁଳପତି ପ୍ରଫେସର ଗୋବିନ୍ଦ ଜେ ଚକ୍ରପାଣି, ପିଜି କାଉନସିଲ ଅଧ୍ୟକ୍ଷା ପ୍ରଫେସର ଅରୁନ୍ଧତୀ ରଥ ପ୍ରମୁଖ ଉପସ୍ଥିତ ଥିଲେ। ବ୍ରହ୍ମପୁର ବିଶ୍ୱବିଦ୍ୟାଳୟ ଆନୁକୂଲ୍ୟରେ ପରିଚାଳିତ ଆଇନ୍ ସ୍ନାତକୋତ୍ତର ପରୀକ୍ଷାରେ ରଣପୁର ନିବାସୀ ଦେବୀପ୍ରସାଦ ସାମନ୍ତରାୟ ଓ ମାତା ଗୀତାରାଣୀ ସାମନ୍ତରାୟଙ୍କ ଝିଅ ପୂର୍ବାଶା ପ୍ରିୟଦର୍ଶିନୀ ସାମନ୍ତରାୟ ସର୍ବୋଚ୍ଚ ନମ୍ବର ରଖି ଟପ୍ପର ହୋଇଥିଲେ । ସେ ଆଇନ୍ ସ୍ନାତକୋତ୍ତର ପରୀକ୍ଷାରେ ସମୁଦାୟ ୨ ହଜାର ନମ୍ବରରୁ ୧୪୦୮ ନମ୍ବର ରଖି ସ୍ୱର୍ଣ୍ଣ ପଦକ ହାସଲ କରିବା ପାଇଁ ଯୋଗ୍ୟ ବିବେଚିତା ହୋଇଥିଲେ । ସ୍ୱାଧିନତା ସଂଗ୍ରାମୀ ସ୍ୱର୍ଗତ ମଧୁସୂଦନ ସାମନ୍ତରାୟଙ୍କ ଅଣନାତୁଣୀ ଅଟନ୍ତି ପୂର୍ବାଶା । ପୂର୍ବାଶା ଆଇନ ପାଠପଢା ସମେତ ଗୀତ ଓ ଅଭିନୟରେ ମଧ୍ୟ ପାରଦର୍ଶିତା ଲାଭ କରିଛନ୍ତି । ଏହି ସଫଳତା ପାଇବା ପରେ ପୂର୍ବାଶାଙ୍କୁ ବିଭିନ୍ନ ମହଲରୁ ଶୁଭେଛାର ସୁଅ ଛୁଟୁଅଛି । ସେ ବର୍ତ୍ତମାନ ରାଜ୍ୟ ଉଚ୍ଚନ୍ୟାୟାଳୟ ଓ ରଣପୁର କୋର୍ଟରେ ଆଇନିଜୀବୀ ଭାବେ ନିଜର କ୍ୟାରିଅର ଆରମ୍ଭ କରିଛନ୍ତି ।