କରୋନା ସ୍ଥିତି ସମୀକ୍ଷା, ଆସନ୍ତାକାଲି ସବୁ ରାଜ୍ୟ ସହ ବୈଠକ

ଭୁବନେଶ୍ୱର, (ବାଘୁଆବାର୍ତ୍ତା): ପୁଣି ଫେରିଛି କରୋନା । ଦିନକୁ ଦିନ ସଂକ୍ରମଣ ମାମଲା ବଢୁଛି । ଦେଶରେ ମୋଟ ଆକ୍ଟିଭ କେସ୍ ହଜାରେ ଟପିଛି । ଯାହା ଚିନ୍ତାର କାରଣ ହୋଇଛି । ରାଜ୍ୟରେ ଗୋଟିଏ ମାମଲା ଚିହ୍ନଟ ହୋଇଛି । ବଢୁଥିବା ସଂକ୍ରମଣକୁ ନେଇ ସତର୍କ ରହିଛି ସ୍ୱାସ୍ଥ୍ୟବିଭାଗ । ଆସନ୍ତାକାଲି (ବୁଧବାର) ଅପରାହ୍ଣ ୧୨ଟାରେ ସବୁ ରାଜ୍ୟ ସହ କୋଭିଡ୍ ସ୍ଥିତି ନେଇ ବୈଠକ କରିବେ କେନ୍ଦ୍ର ସ୍ୱାସ୍ଥ୍ୟ ସଚିବ । ସେହିପରି ରାଜ୍ୟରେ କୋଭିଡ୍ ସ୍ଥିତି ନେଇ ଜନସ୍ୱାସ୍ଥ୍ୟ ନିର୍ଦ୍ଦେଶକ ଡାକ୍ତର ନୀଳକଣ୍ଠ ମିଶ୍ର କହିଛନ୍ତି, ” ସ୍ଥିତି ନିୟନ୍ତ୍ରଣରେ ଅଛି । ଯେଉଁ ଦୁଇଟି ଭାରିଆଣ୍ଟ ନେଇ ସଂକ୍ରମଣ ବଢୁଛି ତାହା ଏତେ ମାରାତ୍ମକ ନୁହେଁ । ଓଡ଼ିଶାରେ ଗୋଟେ ହିଁ କେସ୍ ଚିହ୍ନଟ ହୋଇଛି । ଏବେ ତାଙ୍କର ସ୍ୱାସ୍ଥ୍ୟ ଭଲ ଅଛି । ତାଙ୍କ ପରିବାରରେ କାହାର ଲକ୍ଷଣ ନାହିଁ । ଗାଇଡଲାଇନ୍ ପରିବର୍ତ୍ତନ ହୋଇଛି । ଲକ୍ଷଣ ନଥିଲେ, ପରିବାର ଲୋକଙ୍କ ଟେଷ୍ଟ ହେବନି । ସ୍ୱାସ୍ଥ୍ୟ ବିଭାଗ କେନ୍ଦ୍ର, ICMR,WHO ସହ ସମ୍ପର୍କରେ ଅଛି । ବ୍ୟସ୍ତ ହେବାର ନାହିଁ । କେବଳ ସତର୍କ ରୁହନ୍ତୁ । ବର୍ତ୍ତମାନ ଦେଶରେ ୧୦୧୦ ସଂକ୍ରମଣ ମାମଲା ରହିଛି । ମହାରାଷ୍ଟ୍ର ଓ କେରଳରେ ସ୍ଥିତି ସଙ୍ଗୀନ ରହିଛି । ୧୫୪ ନୂଆ ମାମଲା ସହିତ ମହାରାଷ୍ଟ୍ରରେ ୨୧୦ କେସ୍ ରହିଛି । କେରଳରେ ୪୩୦ ସହ ୩୩୫ ନୂଆ କେସ୍ ରହିଛି ।