ଆସନ୍ତା କାଲି ଅପରାହ୍ନରେ ଯୁକ୍ତ ଦୁଇ ରେଜଲ୍ଟ

ଭୁବନେଶ୍ବର, (ବାଘୁଆବାର୍ତ୍ତା): ଅପେକ୍ଷାର ଘଟିଲା ଅନ୍ତ। ବୁଧବାର ପ୍ରକାଶ ପାଇବ ଚଳିତ ବର୍ଷର +୨ ରେଜଲ୍ଟ। ଅପରାହ୍ନ ୪ଟାରେ ପ୍ରକାଶ ପାଇବ ପରୀକ୍ଷାଫଳ । ଏନେଇ ଉଚ୍ଚ ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ସୂଚନା ଦିଆଯାଇଛି। ଏହା ସହ ବୋର୍ଡ ପକ୍ଷରୁ ଦିଆଯାଇଥିବା ସୂଚନା ଅନୁସାରେ ଏକାସଙ୍ଗରେ କଳା, ବାଣିଜ୍ୟ ଏବଂ ବିଜ୍ଞାନ ବିଷୟର ରେଜଲ୍ଟ ପ୍ରକାଶ କରାଯିବ। ପୂର୍ବରୁ ମଙ୍ଗଳବାର ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ସୂଚନା ଦେଇ ଦିନେ କିମ୍ବା ଦୁଇ ଦିନ ମଧ୍ୟରେ ଯୁକ୍ତ ଦୁଇ ପରୀକ୍ଷା ଫଳ ପ୍ରକାଶ ପାଇବ ବୋଲି କହିଥିଲେ। ସୂଚନାଥାଉକି, ଚଳିତ ବର୍ଷ ଫେବ୍ରୁଆରୀ ୧୮ ତାରିଖରୁ ଆରମ୍ଭ ହୋଇ ମାର୍ଚ୍ଚ ୨୮ରେ ଶେଷ ହୋଇଥିଲା ଯୁକ୍ତ ଦୁଇ ପରୀକ୍ଷା। ଚଳିତ ବର୍ଷ ୩ ଲକ୍ଷ ୯୩ ହଜାର ୬୧୬ ପରୀକ୍ଷାର୍ଥୀ ପରୀକ୍ଷା ଦେଇଥିଲେ।ମେ’ ୧ ତାରିଖ ସୁଦ୍ଧା ଖାତା ଦେଖା ଶେଷ ହୋଇଥିଲା। ତେବେ ରେଜଲ୍ଟ ପ୍ରକାଶ ତାରିଖ ଘୋଷଣା ଛାତ୍ରଛାତ୍ରୀଙ୍କୁ ନିଶ୍ଚୟ ଆଶ୍ବସ୍ତି ଦେବ। କାରଣ ଏହା ସହ ଯୁକ୍ତ ୩ ନାମଲେଖା ପାଇଁ ଥିବା ନ୍ଦ୍ବନ୍ଦ୍ବ ଦୂର ହୋଇଛି। କାରଣ ଏପର୍ଯ୍ୟନ୍ତ ଯୁକ୍ତ ଦୁଇ ରେଜଲ୍ଟ ବାହାରିନଥିବାବେଳେ ମଙ୍ଗଳବାର ସରୁଥିଲା ଯୁକ୍ତ ତିନି ଆବେଦନ ଅବଧି। ଅବଶ୍ୟ ବିବାଦକୁ ଦେଖି ଆବେଦନ ତାରିଖକୁ ଜୁନ୍ ୧ ପର୍ଯ୍ୟନ୍ତ ବୃଦ୍ଧି କରିଛନ୍ତି ରାଜ୍ୟ ସରକାର। ଆଉ ପୂର୍ବରୁ CAFରେ ଆବେଦନ କରିଥିବା ଛାତ୍ରଛାତ୍ରୀ ରେଜଲ୍ଟ ଜାଣିବା ପରେ ମାର୍କସିଟ୍ ଅପଲୋଡ୍ କରିପାରିବେ।