କୋଲକତା (ବାଘୁଆବାର୍ତ୍ତା): ବହୁଚର୍ଚ୍ଚିତ ନାରଦା ଷ୍ଟିଙ୍ଗ ଅପରେସନ ମାମଲାରେ ଗିରଫ ହୋଇଥିବା ପଶ୍ଚିମବଙ୍ଗର ଦୁଇ ମନ୍ତ୍ରୀଙ୍କ ସମେତ ୪ ଟିଏମସି ନେତାଙ୍କୁ ଗୃହବନ୍ଦୀ କରି ରଖିବାକୁ ଆଜି କୋଲକେତା ହାଇକୋର୍ଟ ନିର୍ଦ୍ଦେଶ ଦେଇଛନ୍ତି । ସିବିଆଇ ନାରଦା ଲାଞ୍ଚ କାରବାର ମାମଲାରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ମନ୍ତ୍ରିମଣ୍ଡଳରେ ଥିବା ଫିରହଦ ହକିମ ଓ ସୁବ୍ରତ ମୁଖାର୍ଜୀଙ୍କ ସହ ଦୁଇ ପୂର୍ବତନ ମନ୍ତ୍ରୀ ମଦନ ମିତ୍ର ଏବଂ ସୋଭନ ଚାଟାର୍ଜୀଙ୍କୁ ଗିରଫ କରିଥିଲା । ସେମାନେ ହାଇକୋର୍ଟରେ ଜାମିନ ଆବେଦନ କରିଥିଲେ । କୋଲକତା ହାଇକୋର୍ଟ ବେଞ୍ଚର ଜଷ୍ଟିସ ଅରଜିତ ବାନାର୍ଜୀ ସମସ୍ତଙ୍କୁ ଅନ୍ତରୀଣ ଜାମିନ ଦେବାକୁ ରାଜି ହୋଇଥିଲେ । କିନ୍ତୁ ଆକ୍ଟିଂ ମୁଖ୍ୟ ବିଚାରପତି ଜଷ୍ଟିସ ରାଜେଶ ବିନ୍ଦଲ ଏହା ଉପରେ ରୋକ ଲଗାଇ ସମସ୍ତଙ୍କୁ ଗୃହବନ୍ଦୀ କରି ରଖିବାକୁ ନିର୍ଦ୍ଦେଶ ଦେଇଛନ୍ତି । ଏବେ ଅନ୍ତରୀଣ ଜାମିନ ଆବେଦନର ଶୁଣାଣି ଗୋଟିଏ ବୃହତର ବେଞ୍ଚରେ କରାଯିବ । ସେ ଯାଏ ଗିରଫ ନେତାମାନେ ଗୃହବନ୍ଦୀ ହୋଇ ରହିବେ । ସୋମବାର ସିବିଆଇ ସମସ୍ତଙ୍କୁ ଗିରଫ କରିବା ପରେ କୋଲକତାରେ ହାଇଡ୍ରାମା ଦେଖିବାକୁ ମିଳିଥିଲା । ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଶତାଧିକ ଟିଏମସି କର୍ମୀ ବିକ୍ଷୋପ ପ୍ରଦର୍ଶନ କରିଥିଲେ । ଏହି କାରଣରୁ ସିବିଆଇ ମାମଲାର ବିଚାର ପ୍ରକ୍ରିୟାକୁ ରାଜ୍ୟ ବାହାରକୁ ସ୍ଥାନାନ୍ତର କରିବାକୁ ଆବେଦନ କରିଛନ୍ତି । ସୋମବାର ଗିରଫ ହେବାର କିଛି ଘଣ୍ଟା ପରେ ୪ ନେତାଙ୍କୁ ସିବିଆଇର ସ୍ୱତନ୍ତ୍ର କୋର୍ଟ ଜାମିନ ଦେଇଥିଲେ । ହେଲେ ସେମାନେ ଜେଲରୁ ମୁକୁଳିବା ପୂର୍ବରୁ ହିଁ କୋଲକତା ହାଇକୋର୍ଟ ଜାମିନ ଉପରେ ରୋକ ଲଗାଇ ଦେଇଥିଲେ । ଫଳରେ ସେମାନଙ୍କୁ ବିଚାର ବିଭାଗୀୟ ହାଜତରେ ରହିବାକୁ ପଡିଥିଲା ।
