ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ବାଣିଗୋଛା ଥାନା କୁଜାମେଣ୍ଡି ପଞ୍ଚାୟତ ଗଙ୍ଗାଡିହ ଗାଁ ପାର୍ଶ୍ୱ ଜଙ୍ଗଲୀ ରାସ୍ତାରେ ମହିଳାଙ୍କୁ ହତ୍ୟା ଘଟଣାରେ ପୁଲିସ ତିନି ଜଣଙ୍କୁ ଗିରଫ କରିଛି । ଗିରଫ ଅଭିଯୁକ୍ତମାନେ ହେଲେ ତୋଟାଗୁଡ଼ା ଗ୍ରାମର ସୁବାସିନୀ ବେହେରା, ଦିଲ୍ଲୀପ କୁମାର ବେହେରା ଏବଂ ଦିଲ୍ଲୀପର ଶଳା ଦଶନିପଡ଼ା ଗ୍ରାମର ପ୍ରଦୀପ ନାୟକ । ମୃତ ମହିଳାଙ୍କ କନ୍ଧମାଳ ଜିଲ୍ଲା ଚକାପାଦ ଥାନା ଅନ୍ତର୍ଗତ ତଟାଗୁଡ଼ା ଗାଁର ଅବସରପ୍ରାପ୍ତ ସ୍ୱର୍ଗତ ଶିକ୍ଷକ ଅଭିମନ୍ୟୁ ବେହେରାଙ୍କ ଅବିବାହିତ ଝିଅ ସୁକାନ୍ତି ବେହେରା । ସୁକାନ୍ତି ଏବଂ ସୁବାସିନୀ ଉଭୟ ଭଲ ବନ୍ଧୁ । ସୁବାସିନୀ ଅବିବାହିତ ଥିବାରୁ ତାଙ୍କ ପାଖରେ ଅବସରପ୍ରାପ୍ତ ଶିକ୍ଷକ ବାପାଙ୍କ ପେନସନ ଟଙ୍କା ଏବଂ ସୁଧ କାରାବର ଲାଭ ଟଙ୍କା ରହିଥିଲା ।
ଯାହାକୁ ହାତେଇବା ଉଦ୍ଦେଶ୍ୟ ରଖି ସୁବାସିନୀ ତାଙ୍କୁ ହତ୍ୟା କରିବା ପାଇଁ ଯୋଜନା କରିଥିବା ପୁଲିସ ସୂଚନା ଦେଇଛି । ଘଟଣା ଦିନ ଯୋଜନା ମୁତାବକ ସୁବାସିନୀ ଓ ସୁକାନ୍ତି ବସ ଯୋଗେ କୁଜାମୁଣ୍ଢିରେ ପହଞ୍ଚିଥିଲେ । ସେଠାରୁ ଯୋଜନା ଅନୁସାରେ ଏକ ଅଟୋ ଡକାଇ ଥିଲେ । କୁଜାମେଣ୍ଡିରେ ପହଞ୍ଚିବା ପରେ ସୁବାସିନୀ ଅଟୋରେ ବସି ସୁକାନ୍ତିଙ୍କୁ ନେଇ ଓଡ଼ମ୍ବା ଛକ ଆଡ଼େ ନେଇଯାଇଥିଲେ । ଚତୁରତାର ସହ ଗଙ୍ଗାଡିହ ଜଙ୍ଗଲକୁ ନେଇ ତାଙ୍କୁ ଅନ୍ୟ ଦୁଇ ଅଭିଯୁକ୍ତଙ୍କ ସହାୟତାରେ ହତ୍ୟା କରିଥିଲେ । ପୁଲିସ ସୁବାସିନୀ ଏବଂ ଅନ୍ୟ ଦୁଇ ଜଣଙ୍କୁ ଗିରଫ କରିଥିବା ସୂଚନା ମିଳିଛି । ସୁବାସିନୀ ଘରୁ ପୁଲିସ ଏକ ସୁନାହାର ଜବତ କରିଥିବା ବେଳେ ହତ୍ୟାରେ ବ୍ୟବହୃତ ଛୁରୀ ଏବଂ ଏକ ଜରୀ ବସ୍ତା ଜବତ କରିଛି । ଏହି ହତ୍ୟାକାଣ୍ଡର ଅଭିଯୁକ୍ତଙ୍କୁ ଆଜି କୋର୍ଟ ଚାଲାଣ କରାଯାଇଥିବା ବେଳେ ନୟାଗବ ଅତିରିକ୍ତ ଆରକ୍ଷୀ ଅଧିକ୍ଷକ ସୁବାଷ ପଣ୍ଡା ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ।
