ପୁରୀ, (ବାଘୁଆବାର୍ତ୍ତା): ପୁଲିସର ଗଳା କାଟିଦେଲା ଚୋର । ଚୋରକୁ ଧରିବାକୁ ଯାଇ ରାମଚଣ୍ଡୀ ଥାନାର ଜଣେ କନେଷ୍ଟବଳ ହେଲେ ରକ୍ତାକ୍ତ । କିନ୍ତୁ ଛୁରାମାଡ ଖାଇ ମଧ୍ୟ ଚୋରକୁ ଛାଡ଼ିନଥିଲେ । ଚୋରକୁ ମାଡିବସି ଥାନାକୁ ନେଇଥିଲେ । ଏହାପରେ ତାକୁ ଗିରଫ କରାଯାଇଛି । ଏଭଳି କାଣ୍ଡ ଘଟାଇଥିବା ଅଭିଯୁକ୍ତ ହେଲା ଏହି ଥାନା ଅଧୀନ ଭୂଆଁ ଗ୍ରାମର ରାଜୁ ବେହେରା (୨୫) । ଛୁରାମାଡ ଖାଇ ଆହତ ହୋଇଥିବା କନଷ୍ଟେବଲ ହେଲେ ମନୋଜ କୁମାର ନାୟକ । ଏଭଳି ସାହସିକତା ପାଇଁ ଅଞ୍ଚଳରେ ତାଙ୍କୁ ବେଶ୍ ପ୍ରଶଂସା କରାଯାଇଛି । ବହୁ ମାମଲାରେ ଜଡ଼ିତ ଥିବା ଏହି ଥାନା ଅଧୀନ ତରକୋର ଗ୍ରାମର ଦିଲୀପ କୁମାର ସାହୁ(୨୬)ନାମକ ଜଣେ ଅଭିଯୁକ୍ତକୁ କୋଣାର୍କ ଥାନା ପୁଲିସ ଖୋଜୁଥିଲା । ଦିଲୀପ ନିକଟ ଅତୀତରେ ପିପିଲି ଥାନାର ଏକ ମାମଲାରେ ଜେଲ୍ ଯାଇ ଏବେ ଜାମିନରେ ଆସିଥିଲା । ଦିଲୀପର ଅନ୍ତରଙ୍ଗ ସାଙ୍ଗ ଥିଲା ରାଜୁ । ଉଭୟ ବିଭିନ୍ନ ଥାନା ଅଞ୍ଚଳର ଏକାଧିକ ଚୋରି ଓ ଲୁଟ୍ପାଟ୍ କରି ଆତଙ୍କ ଖେଳାଉଥିବା ପୁଲିସ କହିଛି । ତେଣୁ କୋଣାର୍କ ଥାନା ପୁଲିସ ଦିଲୀପକୁ ଗିରଫ କରିବା ପାଇଁ ରାମଚଣ୍ଡୀ ଥାନା ପୁଲିସର ସହଯୋଗ ଲୋଡିଥିଲା । ଶନିବାର ସନ୍ଧ୍ୟା ୫ଟାରେ ତରକୋର ଗ୍ରାମରେ ଚଢଉ କରି ରାମଚଣ୍ଡୀ ଥାନା ପୁଲିସ ଟିମ୍ ଦିଲୀପକୁ କାବୁ କରିବାରେ ସକ୍ଷମ ହୋଇଥିଲା । ହେଲେ ଏହି ସମୟରେ ତା’ ପାଖରେ ଥିବା ରାଜୁ ଖସି ପଳାଇଥିଲା । ଦିଲୀପକୁ ପଚରା ଉଚରା କରିବାବେଳେ ଲୁଟ୍ପାଟ୍ କରିବାକୁ ଉଭୟ ଯୋଜନା କରୁଥିଲେ ବୋଲି ପୁଲିସ ଜାଣିବାକୁ ପାଇଥିଲା । ବିଳମ୍ବ କଲେ ରାଜୁ ଫେରାର୍ ହୋଇଯିବା ଆଶଙ୍କା କରି ପରଦିନ ଅର୍ଥାତ୍ ରବିବାର ପୂର୍ବାହ୍ନରେ ରାମଚଣ୍ଡୀ ଥାନା ପୁଲିସ ଚଢଉ କରିଥିଲା । ଦିଲୀପକୁ ଧରିବାବେଳେ ଯାଇଥିବା ପୁଲିସ ଟିମ୍କୁ ରାଜୁ ଦେଖିଥିବାରୁ ଚିହ୍ନିଯିବା ଆଶଙ୍କା କରି ଏଥର ଅନ୍ୟ ପୁଲିସ କର୍ମଚାରୀ ଯାଇଥିଲେ । ଏହି ଟିମ୍ରେ ଥିଲେ କନଷ୍ଟେବଲ ମନୋଜ । ବାଲିଘାଇ ଠାରେ ରାଜୁ ବୁଲୁଥିବା ଜାଣି ଆଇଆଇସି ଶରତ ନାୟକଙ୍କ ନିର୍ଦ୍ଦେଶ କ୍ରମେ ପୁଲିସ ଟିମ୍ ତାକୁ ମାଡି ବସିଥିଲେ । ହେଲେ ରାଜୁ ପାଖରେ ରଖିଥିବା ଛୁରୀ ବାହାର କରି ମନୋଜଙ୍କ ତଣ୍ଟିକୁ କାଟି ଦେଇଥିଲା । ଗଳା କଟିଥିଲେ ମଧ୍ୟ ଆତଙ୍କିତ ହୋଇ ନଥିଲେ ମନୋଜ । ପାଖକୁ ଆସିଲେ ଭୁସିଦେବ ବୋଲି ରାଜୁ ଚିତ୍କାର କରୁଥିଲେ ବି ମନୋଜ ଭୟ ନକରି ସାହାସର ସହ ତାକୁ ମାଡି ବସିଥିଲେ । ପରେ ତାକୁ ଚିକିତ୍ସା କରାଯାଇଥିଲା । ଏନେଇ ପୁଲିସ ହତ୍ୟା ଉଦ୍ୟମ ମାମଲା ରୁଜୁ କରି ରାଜୁକୁ ଗିରଫ କରିଥିବା କହିଛନ୍ତି ଆଇଆଇସି ନାୟକ । ସୋମବାର ତାକୁ କୋର୍ଟ ଚାଲାଣ କରାଯାଇଛି । ଜାମିନ୍ ନାମଞ୍ଜୁର ହେବାରୁ ରାଜୁକୁ ଜେଲ୍ ପଠାଇ ଦିଆଯାଇଛି । ଦିଲୀପକୁ କୋଣାର୍କ ଥାନା ପୁଲିସ ଜିମା ଦିଆଯାଇଥିବା ମଧ୍ୟ ଆଇଆଇସି କହିଛନ୍ତି । ସେପଟେ କନଷ୍ଟେବଲ ମନୋଜଙ୍କ ସାହସିକତା ପାଇଁ ତାଙ୍କୁ ବିଭାଗ ପକ୍ଷରୁ ପୁରସ୍କୃତ କରାଯାଉ ବୋଲି ବିଭିନ୍ନ ମହଲରେ ଦାବି ହୋଇଛି । ଘଟଣା ସମ୍ପର୍କରେ ବୁଝିବେ ବୋଲି କହିଛନ୍ତି ଅତିରିକ୍ତ ଏସ୍ପି ମିହିର୍ ପଣ୍ଡା ।
ଚୋର ର ଛୁରାମାଡ଼ ଖାଇ ମଧ୍ୟ ଚୋରକୁ ଛାଡ଼ି ନଥିଲେ ସାହସିକ କନେଷ୍ଟବଳ
