ନୟାଗଡ଼,(ବାଘୁଆବାର୍ତ୍ତା): କରୋନା ପାଇଁ ସବୁଆଡେ ଲକ୍ଡାଉନ୍ ଥିବାବେଳେ ସ୍କୁଲ କଲେଜ ଗୁଡିକ ବନ୍ଦ ରହିଛି । ବିଭିନ୍ନ ବେସରକାରୀ ସ୍କୁଲରେ ଅନ୍ଲାଇନ୍ ମାଧ୍ୟମରେ ପାଠପଢ଼ା ଚାଲିଥିଲା ବେଳେ ସରକାରୀ ସ୍କୁଲରେ ପଢୁଥିବା ଛାତ୍ରଛାତ୍ରୀମାନେ କିପରି ଘରେ ରହି ପାଠ ପଢିପାରିବେ ସେଥିପାଇଁ ରାଜ୍ୟ ସରକାର ତତ୍ପର ହୋଇ ଉଠିଛନ୍ତି । ପ୍ରଥମରୁ ଅଷ୍ଟମ ଶ୍ରେଣୀ ପଢୁଥିବା ଛାତ୍ରଛାତ୍ରୀମାନଙ୍କ ପାଇଁ ଘରେ କିପରି ବହି ପହଞ୍ଚିବ ସେଥିପାଇଁ ରାଜ୍ୟ ସରକାରଙ୍କର ଗଣଶିକ୍ଷା ବିଭାଗ ତତ୍ପର ହୋଇ ଉଠିଛି । ଓଡ଼ିଶା ବିଦ୍ୟାଳୟ ପ୍ରାଧିକରଣ ଓ ରାଜ୍ୟ ଓପେପାର ପ୍ରକଳ୍ପ ନିର୍ଦ୍ଦେଶକ ଭୁପେନ୍ଦ୍ର ସିଂ ପୁନିଆ ସମସ୍ତ ଜିଲ୍ଲାର ଜିଲ୍ଲାପାଳ, ଜିଲ୍ଲା ଶିକ୍ଷାଅଧିକାରୀ ଓ ବ୍ଲକ୍ ଶିକ୍ଷାଅଧିକାରୀଙ୍କୁ ଛାତ୍ରଛାତ୍ରୀମାନଙ୍କ ଘରେ କିପରି ପୁସ୍ତକ ପହଞ୍ଚିବ ଏହା ଉପରେ ନିର୍ଦ୍ଦେଶନାମା ଜାରି କରିଛନ୍ତି । ପ୍ରତ୍ୟେକ ବ୍ଲକ୍ ଶିକ୍ଷା ଅଧିକାରୀ ସ୍କୁଲର ପ୍ରଧାନ ଶିକ୍ଷକଙ୍କ ସହ ଯୋଗାଯୋଗ କରି ସଂପୃକ୍ତ ସ୍କୁଲରେ ନେଇ ବହି ପହଞ୍ଚାଇବେ । ଛାତ୍ରଛାତ୍ରୀ ତଥା ଅଭିବାବକମାନେ ସାମାଜିକ ଦୂରତା ଓ ଶାନ୍ତି ଶୃଙ୍ଖଳାର ସହିତ ସଂପୃକ୍ତ ସ୍କୁଲରୁ ଆସି ବହି ଗ୍ରହଣ କରିବେ । ଯେଉଁମାନେ ସଂପୃକ୍ତ ସ୍କୁଲକୁ ଆସିପାରିବେ ନାହିଁ ସ୍କୁଲର ପ୍ରଧାନ ଶିକ୍ଷକ ସେମାନଙ୍କ ଘରେ କିପରି ବହି ପହଞ୍ଚିବ ଏହାର ବ୍ୟବସ୍ଥା କରିବେ ବୋଲି ନିର୍ଦ୍ଦେଶନାମା ଜାରି ରହିଛି ।
ଘରେ ପହଞ୍ଚିବ ସ୍କୁଲ ବହି
