ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲାପାଳ ଡ. ପୋମା ଟୁଡୁଙ୍କ ନିର୍ଦ୍ଦେଶରେ ଜିଲ୍ଲା ସଦର ମହକୁମାରେ ଅବସ୍ଥିତ ମୁଖ୍ୟ ଚିକିତ୍ସାଳୟରେ ଟେଲି ମେଡିସିନ୍ ସେବା ଆରମ୍ଭ କରାଯାଇଛି । ଏହି ସେବା ଦ୍ୱାରା ଲୋକମାନେ ଘରେ ରହି ବିଭିନ୍ନ ବିଭାଗର ଡାକ୍ତରଙ୍କ ସହିତ ମୋବାଇଲ ଦ୍ୱାରା ହ୍ୱାଟସ୍ଅପ୍ ଭଏସ୍ କଲ ଓ ଭିଡିଓ କଲ ମାଧ୍ୟମରେ ପରାମର୍ଶ କରିପାରିବେ । ଏହି ସେବା ପ୍ରତ୍ୟେହ ସକାଳ ୮ଘଟିକା ଠାରୁ ମଧ୍ୟାହ୍ନ ୧୨ଘଟିକା ପର୍ଯ୍ୟନ୍ତ ଉପଲବ୍ଧ ହେବ । ଜନସାଧାରଣ ଏହି ସେବାର ସୁଯୋଗ ନେବା ପାଇଁ ଜିଲ୍ଲାପାଳ ଡ. ଟୁଡୁ ଜିଲ୍ଲାବାସୀଙ୍କୁ ପରାମର୍ଶ ଦେଇଛନ୍ତି । ଯାହା ଫଳରେ ଆଜି ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରେ ଏହି ସେବା ଆରମ୍ଭ ହୋଇଥିବା ବେଳେ ଜିଲ୍ଲା ମୁଖ୍ୟ ଚିକିତ୍ସାଳୟ ଖାଁ ଖାଁ ହୋଇପଡ଼ିଛି । ଆଜି ବିଭିନ୍ନ ବିଭାଗର ଡାକ୍ତରମାନଙ୍କ ପାଖକୁ ଫୋନ ମାଧ୍ୟମରେ ରୋଗୀ ଏବଂ ରୋଗୀ ସଂମ୍ପର୍କୀୟମାନେ ଫୋନ କରିଥିବା ଜଣାଯାଇଛି । ଡାକ୍ତରମାନେ ରୋଗୀଙ୍କୁ ଫୋନ ମାଧ୍ୟମରେ ଔଷଧ ଓ ଚିକିତ୍ସା ସୁବିଧା ସଂପର୍କରେ ପରାମର୍ଶ ଦେଇଥିବା ଜଣାଯାଇଛି ।
