କୋର୍ଟ ଭିତରେ ଦବଙ୍ଗଗିରି, ଜେଲ୍ ଗଲେ ଶିକ୍ଷକ

ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ରଣପୁର କୋର୍ଟ ପରିସରରେ ଗତକାଲି ଜଣେ ଶିକ୍ଷକ ପୁଲିସ ଉପସ୍ଥିତିରେ ଦବଙ୍ଗଗିରି ଦେଖାଇଥିବାରୁ ଆଜି ଗିରଫ ହୋଇଛନ୍ତି । ସୂଚନାନୁସାରେ, ରଣପୁର ଥାନା ବଧିପାଟଣା ଗ୍ରାମର ଜଣେ ବ୍ୟକ୍ତି ପୁରୀରେ ରହୁଥିବା ବେଳେ ତାଙ୍କ ନାବାଳିକା ଝିଅ ପୁରୀରୁ ଜୁନ ମାସରେ ନିଖୋଜ ହୋଇଥିଲା । ପୁଲିସ ତାଙ୍କ ପ୍ରଥମେ ଉଦ୍ଧାର କରିଥିବା ବେଳେ ସେ ଏଇ କିଛିଦିନ ହେବ ପୁଣି ନିଖୋଜ ହୋଇ ଯାଇଥିଲା । ଗତକାଲି ପୁଲିସ ତାଙ୍କ ଉଦ୍ଧାର କରି କୋର୍ଟରେ ହାଜର କରିଥିବା ବେଳେ ଉକ୍ତ ଗ୍ରାମର ରଘୁନାଥ ରଣସିଂହଙ୍କ ପୁଅ ନବକିଶୋର ରଣସିଂହ କୋର୍ଟ ଭିତରେ ପଶି ଭଦ୍ରଲୋକି ଦେଖାଇବାକୁ ଯାଇ ନିଜର ଦବଙ୍ଗଗିରି ଦେଖାଇଥିଲେ । ଏପରିକି ପୁଲିସକୁ କିଛି ଜଣାନାହିଁ ବୋଲି କୋର୍ଟ ଭିତରେ ହୋହାଲ୍ଲା କରିଥିବା ଜଣାଯାଇଛି । ଯାହାକୁ ନେଇ ରଣପୁର ଥାନା ଅନ୍ତର୍ଗତ ସୁନାଖଳା ଫାଣ୍ଡି ଅଧିକାରୀଙ୍କ ଅଭିଯୋଗରେ ରଣପୁର ଥାନାରେ ଏକ ମାମଲା ରୁଜୁ କରାଯାଇ ନବକିଶୋରଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି । କୋର୍ଟରେ ତାଙ୍କ ଜାମିନ ନାମାଞ୍ଜୁର ହେବାରୁ ତାଙ୍କୁ ଜେଲ୍ ଯିବାକୁ ପଡ଼ିଛି । ନବକିଶୋର କୁଳାସର ଉଚ୍ଚ ବିଦ୍ୟାଳୟର ସହକାରୀ ପ୍ରଧାନଶିକ୍ଷକ ବୋଲି ସୂଚନା ମିଳିଛି ।