ଜିଲ୍ଲା ସ୍ତରୀୟ ଧାନ ମଣ୍ଡି ଉଦଘାଟିତ
ନୟାଗଡ଼, (ବାଘୁଆବାର୍ତ୍ତା) : ଯୋଗାଣ ବିଭାଗ ପକ୍ଷରୁ ସରକାରୀ ଧାନ କ୍ରୟ କେନ୍ଦ୍ରର ଶୁଭ ଉଦଘାଟନ ହୋଇଯାଇଛି । ଜିଲ୍ଲା ଯୋଗାଣ ଅଧିକାରୀ ଦେବବ୍ରତ ମହାପାତ୍ରଙ୍କ ଆବାହକତ୍ୱରେ ଆୟୋଜିତ କାର୍ଯ୍ୟକ୍ରମରେ ଜିଲ୍ଲାପାଳ ଡ. ପୋମା ଟୁଡୁ ବଜାର ନିୟନ୍ତ୍ରଣ କମିଟି 
ସଂପାଦକ ଭାସ୍କର ଚନ୍ଦ୍ର ପାଣିଗ୍ରାହୀ, ସୂଚନା ଓ ଲୋକ ସଂମ୍ପର୍କ ଅଧିକାରୀ ଡ. ପ୍ରମୋଦ କୁମାର ନାୟକ, ସହକାରୀ ଯୋଗାଣ ଅଧିକାରୀ ଜୟନ୍ତ କୁମାର ଦାଶ ଯୋଗ ଦେଇଥିଲେ । ରାଜ୍ୟ ସରକାରଙ୍କର ନିର୍ଦ୍ଦେଶ କ୍ରମେ ଏବର୍ଷ ନଭେମ୍ବର ମାସରୁ ସମସ୍ତ ଜିଲ୍ଲାରେ ଧାନ ମଣ୍ଡି ଉଦଘାଟନ କରାଯାଇଛି । ସେହିପରି ଭାବେ ନୟାଗଡ଼ ଜିଲ୍ଲାରେ ଜିଲ୍ଲା ସ୍ତରୀୟ ଧାନ ମଣ୍ଡିକୁ ଉଦଘାଟନ କରାଯାଇଛି । ଏବର୍ଷ ବର୍ତ୍ତମାନ ଯାଉଁ ୪୦ ହଜାର ୮୦୧ ଜଣ ଚାଷୀ ଧାନ ବିକ୍ରୟ କରିବା ପାଇଁ ନାମ ପଂଜିକରଣ କରିଛନ୍ତି । ଚାଷୀଙ୍କଠାରୁ ଏବର୍ଷ ୧୦ ଲକ୍ଷ କ୍ୱିଣ୍ଟାଲ ଧାନ କିଣାଯିବ 
ବୋଲି ଜିଲ୍ଲା ଯୋଗାଣ ଅଧିକାରୀ କହିଛନ୍ତି । ସରକାରଙ୍କ ନିୟମ ଅନୁସାରେ ସାଧାରଣ ଧାନ କ୍ୱିଣ୍ଟାଲ ପିଛା ୧୮୧୫ ଟଙ୍କା ଥିବା ବେଳେ ଏ ଗ୍ରେଡ ଧାନ ପାଇଁ ୧୮୩୫ ଟଙ୍କା ମୁଲ୍ୟ ରହିଥିବା ଜଣାପଡ଼ିଛି । ଏବର୍ଷ ଜିଲ୍ଲାରେ ୧୫୯ ଟି ମଣ୍ଡି ଖୋଲା ଯିବାର ବ୍ୟବସ୍ଥା କରାଯାଇଛି । ଡିସେମ୍ବର ମାସ ୧୮ ତାରିଖରୁ ଧାନ କିଣା ଆରମ୍ଭ ହେବ ବୋଲି ସୂଚନା ମିଳିଛି । ମୁଖ୍ୟତଃ ରାଜ୍ୟ ସରକାରଙ୍କ ନିୟମନୁସାରେ ଟୋକନ କାଟିଥିବା ଚାଷୀମାନେ ଧାନ ବିକ୍ରୟ କରି ପାରିବେ ବୋଲି ଜଣାପଡ଼ିଛି । ଏହି ପ୍ରରିପେକ୍ଷିରେ ଜିଲ୍ଲାପାଳ ତାଙ୍କ ଅଭିଭାଷଣରେ ବିନା ଟୋକନରେ ଧାନ କିଣାଯାଇ ପାରିବ ନାହିଁ ବୋଲି କହିବା ସହ ଚାଷୀମାନଙ୍କୁ ଉପଦେଶ ଦେଇ ସଫା ଓ ଶୁଖିଲା ଧାନ ବିକ୍ରି କରି ଅଧିକ ଅର୍ଥ ପାଇପାରିବେ ବୋଲି କହିଥିଲେ । ଏଥିନିମନ୍ତେ ଗ୍ରାମାଞ୍ଚଳ ସ୍ତରରେ ପ୍ରଚାର ଓ ପ୍ରସାର ବ୍ୟାପକ କରାଯିବା ପାଇଁ ଜିଲ୍ଲାପାଳ ନିର୍ଦ୍ଦେଶ ଦେଇଥିଲେ ।
