ମାର୍କ କମ ଥିବାରୁ ମା’ କରିଥିଲେ ଆକଟ, ମଶାଣିରୁ ଅର୍ଦ୍ଧଦଗ୍ଧ ଅବସ୍ଥାରେ ନାବାଳିକାଙ୍କ ଶବ ଜବତ

କୋଣାର୍କ, (ବାଘୁଆବାର୍ତ୍ତା): କୋଣାର୍କ ଥାନା ଅନ୍ତର୍ଗତ ନୁହଡି ଗ୍ରାମରେ ଘଟିଛି ଅଭାବନୀୟ ଘଟଣା । ରାତିଅଧରେ ନାବାଳିକାକୁ ମଶାଣିରେ ପୋଡିଦେବା ଘଟଣାକୁ ନେଇ କୋଣାର୍କ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି । ସେପଟେ ଶବକୁ ପୋଡିଦେଉଥିବା ବେଳେ କୋଣାର୍କ ପୋଲିସ ବିଶେଷ ସୂତ୍ରରୁ ଖବର ପାଇ ଅର୍ଦ୍ଧଦଗ୍ଧ ଅବସ୍ଥାରେ ଶବକୁ ଜବତ କରିବା ସହିତ ମଶାଣିରେ ରାତି ସାରା ଜଗିରହିଥିଲା । ନୁହାଡି ଗ୍ରାମର ନୃସିଂହ ପରିଡାଙ୍କ ଏକ ମାତ୍ର ଝିଅ ମାମି ଜଣେ ମେଧାବୀ ଛାତ୍ରୀ ଥିଲେ । ଅଷ୍ଟମ ପରୀକ୍ଷାରେ ମାର୍କ କମ୍ ଥିବାରୁ ତାଙ୍କ ମା’ ତାଙ୍କୁ ଆକଟ କରିଥିଲେ । ଫଳରେ ମାମି ମଙ୍ଗଳବାର ଅପରାହ୍ନରେ ନିଜ ରୁମରେ ଦୀର୍ଘ ସମୟ କବାଟ ବନ୍ଦ କରି ରହିଥିଲେ । ଘର ଲୋକ ଡାକିଲା ପରେ କବାଟ ଖୋଲିନଥିଲେ । ପରେ ପରିବାର ଲୋକ କବାଟ ଭାଙ୍ଗି ଘର ଭିତରକୁ ପଶି ଦେଖିବାକୁ ପାଇଲେ ଫ୍ୟାନରେ ଓଢଣୀ ବାନ୍ଧି ଫାଶୀ ଲଗାଇଦେଇଥିଲେ ବୋଲି ପରିବାର ଲୋକ କହିଥିଲେ । ନାବାଳିକାଙ୍କ ମୃତ୍ୟୁ ହେବା ପରେ ଗ୍ରାମବାସୀଙ୍କ ସାହାଯ୍ୟରେ ମଶାଣିରେ ପୋଡିବା ସମୟରେ ବିଶେଷ ସୂତ୍ରରୁ ଖବର ପାଇଥିଲା କୋଣାର୍କ ପୋଲିସ । ଘଟଣାସ୍ଥଳରେ ପହଞ୍ଚି ଚମ୍ପହାର ଅଗ୍ନିଶମ ବିଭାଗ ସାହାଯ୍ୟରେ ଜୁଇ ଲିଭାଇ ଅର୍ଦ୍ଧଦଗ୍ଧ ଅବସ୍ଥାରେ ଶବ ଜବତ କରି ରାତିସାରା ଜଗିରହିଥିଲା ପୋଲିସ । ହତ୍ୟା ସନ୍ଦେହରେ ପୋଲିସ ନିଜଆଡୁ ଏକ ମାମଲା ରୁଜୁକରି ତଦନ୍ତ କରୁଥିବା ବେଳେ ଘଟଣାସ୍ଥଳରେ ସାଇଣ୍ଟିଫିକ ଟିମ୍ ପହଞ୍ଚି ଅଧିକ ତଦନ୍ତ କରୁଛି । ପରବର୍ତ୍ତୀ ସମୟରେ ଶବ ବ୍ୟବଚ୍ଛେଦ ପାଇଁ ପଠାଯିବ ଓ ମେଡିକାଲ ରିପୋର୍ଟ ଆସିବା ପରେ ସମ୍ପୂର୍ଣ୍ଣ ସତ୍ୟାସତ୍ୟ ସାମ୍ନାକୁ ଆସିବ ବୋଲି ପୋଲିସ ପକ୍ଷରୁ ସୂଚନା ମିଳିଛି।