ଗୋପାଳପୁର, (ବାଘୁଆବାର୍ତ୍ତା): ଆମେ ୩ ମାସରୁ ବି କମ୍ ସମୟ ହଷ୍ଟେଲ୍ରେ ରହିଛୁ। କିନ୍ତୁ ବର୍ଷକ ପାଇଁ ହଷ୍ଟେଲ୍ ଫି’ ଜମା କରିଛୁ। ଯେତିକି ଦିନ ହଷ୍ଟେଲରେ ରହିଛୁ, ସେତିକି ଦିନର ଅର୍ଥ କାଟି ବଳକା ଅର୍ଥ ରି-ଆଡ୍ମିଶନ୍ ଫି ଜମା ବେଳେ ଆଡଜଷ୍ଟ କରାଯାଉ। ଏଭଳି ଦାବି ନେଇ ବ୍ରହ୍ମପୁର ବିଶ୍ବବିଦ୍ୟାଳୟ ଛାତ୍ରାବାସ ଛାତ୍ରୀନିବାସର ଅନ୍ତେବାସୀ, ଅନ୍ତେବାସିନୀମାନେ ଗୁରୁବାର ପ୍ରାଶାସନିକ ଭବନ ଆଗରେ ଧାରଣା ଦେଇଛନ୍ତି। ଖରାକୁ ଖାତିର ନକରି ସେମାନେ ଛତା ମୁଣ୍ଡାଇ ମାର୍ବଲ ଟାଇଲ୍ ଚଟାଣ ଉପରେ ମଧ୍ୟାହ୍ନ ୧୨ଟାରୁ ଧାରଣା ଜାରି ରଖିଛନ୍ତି। ହଷ୍ଟେଲ କର୍ତ୍ତୃପକ୍ଷ ୫୦୦ ଟଙ୍କା ଫି କଟାଯାଇଛି, ଆହୁରି ୧ ହଜାର ଟଙ୍କା ହ୍ରାସ ନେଇ ବିଚାର କରାଯିବ ବୋଲି ଆଶ୍ୱାସନା ଦେଇଥିଲେ ହେଁ ରାଜି ହୋଇ ନାହାନ୍ତି ହଷ୍ଟେଲ୍ରେ ରହୁଥିବା ଛାତ୍ରଛାତ୍ରୀ। କୁଳପତି ପ୍ରଫେସର୍ ଗୋବିନ୍ଦ ଜେ.ଚକ୍ରପାଣି ଆନ୍ଦୋଳନରତ ଛାତ୍ରଛାତ୍ରୀଙ୍କ ସହ ଆଲୋଚନା କରିଥିଲେ ହେଁ ସୁଫଳ ମିଳିନି। ରିପୋର୍ଟ ଲେଖାଯିବା ବେଳକୁ ଛାତ୍ରଛାତ୍ରୀଙ୍କ ଆନ୍ଦୋଳନ ଜାରି ରହିଛି। ମଙ୍ଗଳବାର ଅପରାହ୍ନରେ ଛାତ୍ରଛାତ୍ରୀମାନେ ୱାର୍ଡନଙ୍କୁ ଅଭିଯୋଗପତ୍ର ପ୍ରଦାନ କରିଥିଲେ। କିନ୍ତୁ କୌଣସି ସୁଫଳ ନମିଳିବାରୁ ସେମାନେ ଗୁରୁବାର ଆନ୍ଦୋଳନକୁ ଓହ୍ଲାଇଛନ୍ତି।
