ବରଗଡ଼, (ବାଘୁଆବାର୍ତ୍ତା): କେତେବେଳେ ଅଦିନିଆ ବର୍ଷା ଓ ରୋଗପୋକ ଦାଉ ସାଧୁଛି ତ ଆଉ କେତେବେଳେ ମରୁଡି ଜନିତ ଚାଷ ନଷ୍ଟ ହେଉଛି । କେତେବେଳେ ବୀମା କମ୍ପାନୀର ଶୋଷଣର ଶିକାର ହେଉଛି ତ ଆଉ କେତେବେଳେ ବିଦ୍ୟୁତ ବିଲର କଷଣରେ କଷିହେଉଛି ଚାଷୀ । ଯାହାକୁ ନେଇ ନିଜର ହକ ଓ ଅଧିକାରର ଲଢେଇ ଲଢ଼ୁଛି ଚାଷୀ । ଏହାର ଉଦାହରଣ ବରଗଡ଼ ଜିଲାରେ ଦେଖିବାକୁ ମିଳିଛି ଆଜି । ବରଗଡ଼ ଜିଲ୍ଲା ଚାଷୀ ସଙ୍ଗଠନ ସମନ୍ୱୟ ସମିତି ପକ୍ଷରୁ ପ୍ରଧାନ ମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ୧୨ ଦଫା ଦାବିନେଇ ଜିଲ୍ଲାପାଳଙ୍କ କାର୍ୟ୍ୟାଳୟ ସମ୍ମୁଖରେ ବିକ୍ଷୋଭ ପଦର୍ଶନ କରିଛନ୍ତି ଚାଷୀ । ଜୁନ, ଜୁଲାଇ ଓ ଅଗଷ୍ଟ ମାସରେ ଆଵଶ୍ୟକତା ଠାରୁ କମ ବର୍ଷା ହୋଇଥିବାରୁ ଜିଲ୍ଲାର ଅଣ ଜଳସେଚିତ ଅଞ୍ଚଳରେ ଚାଷ ନଷ୍ଟ ହୋଇଯାଇଥିବାରୁ ଉକ୍ତ ଅଣ ଜଳସେଚିତ ଅଞ୍ଚଳକୁ ସମ୍ପୂର୍ଣ୍ଣ ମରୁଡି ଘୋଷଣା କରାଯାଉ ବୋଲି ସେମାନେ ଦାବି କରିଛନ୍ତି । କୃଷି ଋଣ ଛାଡ଼ ଓ ବିଦ୍ୟୁତ ବିଲ ଛାଡ଼ କରିବା ସହ ସ୍ୱାମୀନାଥନ କମିସନ ଆଧାରରେ ଧାନର ମୂଲ୍ୟ ନିର୍ଦ୍ଧାରଣ କରାଯାଉ ଓ ଜଳସେଚିତ ଅଞ୍ଚଳରେ ଅମଳ ହୋଇଥିବା ସମ୍ପୂର୍ଣ ଧାନ ସଂଗ୍ରହ କରାଯାଉ ପରି ମୋଟ ୧୨ ଦଫା ସମ୍ବଳିତ ଏକ ଦାବି ପତ୍ର ବରଗଡ଼ ଜିଲ୍ଲାପାଳଙ୍କ ଅନୁପସ୍ଥିରେ ଅତିରିକ୍ତ ଜିଲ୍ଲାପାଳଙ୍କୁ ମୁଖ୍ୟମନ୍ତ୍ରୀ ଓ ପ୍ରଧାନମନ୍ତ୍ରୀଙ୍କ ଉଦ୍ଦେଶ୍ୟରେ ପ୍ରଦାନ କରିଛନ୍ତି ଚାଷୀ । ବରଗଡ଼ ଲୋକମଣ୍ଡପ ପଡ଼ିଆରୁ ପ୍ରାୟ ଶତାଧିକ ଚାଷୀ ଏକ ଶୋଭାଯାତ୍ରାରେ ବାହାରି ଗାନ୍ଧିଛକ ଦେଇ ଜିଲ୍ଲାପାଳଙ୍କ କାର୍ୟ୍ୟାଳୟ ସମ୍ମୁଖରେ ପହଞ୍ଚିଥିଲେ ।ସେଠାରେ ବିକ୍ଷୋଭ ପଦର୍ଶନ କରିବା ସହ ୧୨ଦଫା ଦାବି ଉପସ୍ଥାପନ କରିଥିଲେ । ପରେ ଅତିରିକ୍ତ ଜିଲ୍ଲାପାଳ ମିର୍ଧା ଟପ୍ପୋଙ୍କୁ ରାଜ୍ୟ ସରକାର ଓ କେନ୍ଦ୍ର ସରକାରଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରିଥିଲେ । ଏହାର ପ୍ରତିକାର ଓ ସମାଧାନ ସରକାର ନକଲେ ଆଗକୁ ଆନ୍ଦୋଳନ ତୀବ୍ରତର ହେବ ବୋଲି ଚେତାବନୀ ଦେଇଛନ୍ତି ଚାଷୀ ।
