ନୟାଗଡ଼, (ବାଘୁଆବାର୍ତ୍ତା) : ନାବାଳିକାକୁ ନେଇ ସ୍ୱାମୀ ଫେରାର ହୋଇଯାଇଥିବା ବେଳେ ନ୍ୟାୟ ପାଇବା ପାଇ ଆଜି ଜଣେ ମହିଳା ପୁଲିସ ମୁଖ୍ୟାଳୟକୁ ଆସି ଅରକ୍ଷୀ ଅଧିକ୍ଷକଙ୍କ ଅନୁପସ୍ଥିତିରେ ଅତିରିକ୍ତ ଆରକ୍ଷୀ ଅଧିକ୍ଷକଙ୍କୁ ଭେଟିଛନ୍ତି । ସୂଚନାନୁସାରେ, ନୟାଗଡ଼ ଜିଲ୍ଲା ଖଣ୍ଡପଡ଼ା ଥାନା ବେଣାଗାଡ଼ିଆ ପଂଚାୟତ ଅନ୍ତର୍ଗତ ତେନ୍ତୁଳିଆପଲ୍ଲୀ ଗ୍ରାମର ପିତାମ୍ବର ମଲ୍ଲଙ୍କ ଝିଅ ମୋତିମାଳା ମଲ୍ଲ ଦୀର୍ଘଦିନ ତଳେ ଗଣିଆ ଥାନା ଅନ୍ତର୍ଗତ ବେଲପାଟଣା ଗ୍ରାମର ବିଭୂତି ଭୂଷଣ ଗଣ୍ଠିଆଙ୍କୁ ବିବାହ କରିଥିଲେ । ବିବାହର କିଛି ଦିନ ପରେ ସ୍ୱାମୀ, ଶାଶୁ, ଶ୍ୱସୁର ଏବଂ ନଣନ୍ଦମାନେ ଯୌତୁକ ନିର୍ଯ୍ୟାତନା ଦେଇଥିଲେ । ଏସମ୍ବନ୍ଧରେ ଗଣିଆ ଥାନାରେ ଏକ ମୋତିମାଳା ଅଭିଯୋଗ କରିବା ପରେ ଏକ ମାମଲା ରୁଜୁ ହୋଇଥିଲା । ମାତ ଏହାର କୈଣସି ସୁଫଳ ନମିଳିବାରୁ ଏହି ମାମଲା ଏବେ ଦଶପଲ୍ଲା କୋର୍ଟରେ ବିଚାରଧିନ ଅଛି । ବିଚାରଧିନ ଅବସ୍ଥା ଥିବା ବେଳେ ମୋତିଙ୍କ ସ୍ୱାମୀ ବିଭୂତି କାନପୁରଥାନା ଅନ୍ତର୍ଗତ ଏକ ଗ୍ରାମରୁ ଜଣେ ନାବାଳିକାକୁ ନେଇ ଫେରାର ହୋଇଯାଇଥିବା ଅଭିଯୋଗ ହୋଇଛି । ଏଥିରେ ବିଭୂତିଙ୍କୁ ତାଙ୍କ ସାନ ଭଉଣୀ ସହଯୋଗ କରିଥିବା ନେଇ ମୋତି କହିଛନ୍ତି । ଅନ୍ୟପକ୍ଷେ ଏନେଇ ଆଜି ମୋତି ନୟାଗଡ଼ ଏସ.ପିଙ୍କ କାର୍ଯ୍ୟାଳୟକୁ ଆସିବା ବେଳକୁ ସେହି ବସରେ ଆସୁଥିବା ତାଙ୍କ ଶ୍ୱସୁର ତାଙ୍କୁ ହତ୍ୟା ଧମକ ଦେଇଥିବା ଅଭିଯୋଗ ହୋଇଛି । ଯାହାକୁ ନେଇ ସେ ଅତିରିକ୍ତ ଆରକ୍ଷୀ ଅଧିକ୍ଷକଙ୍କୁ ଅଭିଯୋଗ କରିଥିବା ଜଣାପଡ଼ିଛି ।
