ଭୂବନେଶ୍ୱର,(ବାଘୁଆବାର୍ତ୍ତା ବ୍ୟୁରୋ): ରାଜ୍ୟ ସରକାର କରୋନା ମୁକାବିଲା ପାଇଁ ବିଭିନ୍ନ ପଦକ୍ଷେପ ନେଇଛନ୍ତି । ମୁଖ୍ୟତଃ ରାଜ୍ୟ ଫେରନ୍ତାଙ୍କ ପାଇଁ ଚିନ୍ତା ବଢ଼ିଛି । ସେମାନଙ୍କ ପାଇଁ ସ୍ୱତନ୍ତ୍ର ଗାଇଡ୍ ଲାଇନ୍ ପ୍ରସ୍ତୁତ କରାଯାଇଛି । ଫେରିବା ପରେ ସେମାନଙ୍କୁ ୧୪ ଦିନ କ୍ୱାରେଣ୍ଟାଇନ୍ରେ ରଖାଯିବାର ବ୍ୟବସ୍ଥା କରାଯାଇଥିବା ବେଳେ, ସେମାନେ ମନଇଚ୍ଛା ଖାଇବା, ପିଇବା କରି ପାରିବେ ନାହିଁ ବୋଲି ଜଣାପଡ଼ିଛି । ସେମାନେ ଏହି ୧୪ ଦିନରେ କିଭଳି ଚଳିବେ, କ’ଣ ଖାଇବେ ତାକୁ ନେଇ ସ୍ୱତନ୍ତ୍ର ଗାଇଡ୍ ଲାଇନ୍ ପ୍ରସ୍ତୁତ କରିଛନ୍ତି ସରକାର । ସୂଚନାନୁସାରେ, ରାଜ୍ୟ ସରକାରଙ୍କର ରାଜସ୍ୱ ବିପର୍ଯ୍ୟୟ ଓ ପରିଚାଳନା ବିଭାଗ ପକ୍ଷରୁ ସ୍ୱତନ୍ତ୍ର ନୀତି ନିୟମ ପ୍ରଣୟନ କରାଯାଇଛି । ୧୪ ବର୍ଷରୁ ଉର୍ଦ୍ଧ୍ୱ ମାନଙ୍କ ପାଇଁ ଦୈନିକ ୧୨୦ ଟଙ୍କା ଖାଦ୍ୟ ବାବଦ ଅର୍ଥ ମଂଜୁର କରାଯାଇଥିବା ବେଳେ ୧୪ ବର୍ଷରୁ କମ ବୟସ ପାଇଁ ୧ ଶହ ଟଙ୍କାର ଖାଦ୍ୟ ବ୍ୟବସ୍ଥା କରାଯାଇଛି । ସକାଳ ଜଳଖିଆ, ମଧ୍ୟାହ୍ନ ଭୋଜନ, ସଂନ୍ଧ୍ୟା କାଳୀନ ଜଳଖିଆ ଏବ ରାତ୍ର କାଳୀନ ଖାଦ୍ୟ ଯୋଗାଇ ଦିଆଯିବାର ବ୍ୟବସ୍ଥା କରାଯାଇଛି । ପ୍ରତ୍ୟେକ ଏକ ମିଟର ବ୍ୟବଧାନରେ ଶର୍ଯ୍ୟା ରହିବ । ମହିଳା ଓ ପୁରୁଷ ମାନଙ୍କ ପାଇଁ ସ୍ୱତନ୍ତ୍ର ପାଇଖାନା ବ୍ୟବସ୍ଥା କରାଯିବାକୁ ନିର୍ଦ୍ଦେଶ ଦିଆଯାଇଛି । ସେମାନେ ପହଂଚିଲା ପରେ, ବ୍ରସ ପାତିଆଠାରୁ ଆରମ୍ଭ କରି ନିତ୍ୟ ବ୍ୟବହାର୍ଯ୍ୟ ଦ୍ରବ୍ୟ ପ୍ରଦାନ କରାଯିବାକୁ ନିୟମ ରହିଛି । ଏପରିକି ଗାଧୁଆ ପାଇଁ ପ୍ଲାଷ୍ଟିକ ବାଲଟି, ମଗ, ପାଣି ବଟଲ୍, ସାବୁନ୍ ଯୋଗାଇ ଦେବାକୁ କୁହାଯାଇଛି । ଏତଦ୍ବ୍ୟତିତ କ୍ୱାରେଣ୍ଟାଇନ୍ ଗୃହକୁ ଦିନକୁ ତିନିଥର ସଫା କରାଯିବାକୁ ନିୟମ ରହିଛି । ଗର୍ଭବତି ମହିଳା ମାନଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯିବା ସହ ସ୍ୱତନ୍ତ୍ର ଦୃଷ୍ଟି ରଖାଯିବ । ସେମାନଙ୍କ ଯେପରି କୈାଣସି ସ୍ୱାସ୍ଥ୍ୟ ଗତ ସମସ୍ୟା ନଉପୁଜେ, ସେଥିପ୍ରତି ଧ୍ୟାନ ଦିଆଯିବ । କ୍ୱାରେଣ୍ଟାଇନ୍ ଗୃହକୁ କୈାଣସି ବ୍ୟକ୍ତିଗତ ଖାଦ୍ୟ ପଠା ଯାଇ ପାରିବ ନାହିଁ କିମ୍ବା ଗୁଟଖା୍ ସିଗାରେଟ୍ ଭଳି ନିଶା ଦ୍ରବ୍ୟକୁ ବାରଣ କରାଯାଇଛି । ଦୈନନ୍ଦିନ ଏହାର ତଦାରଖ ପାଇଁ ଆଶା, ଅଙ୍ଗନୱାର୍ଡ଼ି, ଏଏନ୍ଏମ୍, ସ୍ଥାନୀୟ ଜନପ୍ରତିନିଧି ଓ ସଂପୃକ୍ତ ନୋଡାଲ୍ ଗ୍ରସ୍ତ କରିବେ । ଏଥିନିମନ୍ତେ ଏକ ସ୍ୱତନ୍ତ୍ର ରେଜିଷ୍ଟର ବ୍ୟବହୃତ କରାଯିବ । ଦୈନନ୍ଦିନର ଘଟଣାବଳୀ ଏହି ରେଜିଷ୍ଟରରେ ଲେଖାଯିବ । ସଂପୃକ୍ତ ମେଡିକାଲ ଅଫିସର୍ ଏହି ରେଜିଷ୍ଟାର ପଠନ କରି ତଦାରଖ କରିବେ । ଏଥିସହିତ କ୍ୱାରେଣ୍ଟାଇନ୍ ସେଣ୍ଟର ୨୪ ଘଣ୍ଟିଆ ବିଦ୍ୟୁତ୍ ବ୍ୟବସ୍ଥା, ସୁଦ୍ଧ ପାନୀୟ ଜଳ ସହିତ ପ୍ରର୍ଯ୍ୟାପ୍ତ ପରିମାଣର ଓଆର୍୍ଏସ୍ ବ୍ୟବସ୍ଥା କରିବାକୁ କୁହାଯାଇଛି । ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗର ପ୍ରମୂଖ ଶାସନ ସଚିବ ପ୍ରଦୀପ ଜେନା ସମସ୍ତ ଜିଲ୍ଲାପାଳ ଓ ଆରକ୍ଷୀ ଅଧିକ୍ଷକଙ୍କୁ ନିର୍ଦ୍ଦେଶ ଦେଇଛନ୍ତି ।
