ଅଖ ଅନୁକୂଳ, ଓରା କାମ ଆରମ୍ଭ

ପୁରୀ, (ବାଘୁଆବାର୍ତ୍ତା): ଗୁରୁବାର ରଥ ଅଖ କାମ ଅନୁକୂଳ ହୋଇଛି । ମହାପ୍ରଭୁଙ୍କ ମାଳ ମାହାର୍ଦ୍ଦ ସମର୍ପଣ କରି ତିନି ରଥର ମୁଖ୍ୟ ବିଶ୍ୱକର୍ମା ନାହାକା ଅଖ ତିଆରି ଆରମ୍ଭ କରିଛନ୍ତି । ଅଖର ଦୁଇ ପାଶ୍ୱର୍ରେ ବାରିସି ଚଳାଇ ଗୋଲେଇ କରୁଛନ୍ତି । ପ୍ରତି ରଥର ନାହାକା ଅଖ କାମ ଆରମ୍ଭ ହୋଇଛି । ଧଉରା କାଠରେ ତିଆରି ହେଉଛି ଅଖ । ରଥ ଖଳାରେ ଚକ ନିର୍ମାଣ ଚାଲିଛି । ଆଜି ସୁଦ୍ଧା ୩୭ଟି ଚକର ଘେର(ବଳକା ଅଂଶ) କାଟିଛନ୍ତି କରତି ସେବକ । ନାହାକା ଚକରେ ପଇତା ପିନ୍ଧାଉଛନ୍ତି ବିଶ୍ୱକର୍ମା । ରଥର ଓରା କାମ ଆରମ୍ଭ ହୋଇଛି । ଓରା ହେଉଛି ରଥର ଉପରି ଭାଗ ଭୂଇଁର ଏକ ଅଂଶ । ପହିର ମଝି ଅଂଶରେ ଅଢ଼େଇ ଇଞ୍ଚର ଏକ ବିଟ ଭଳି ବଳୟକୁ ରଥ ଖଳାରେ କୁହନ୍ତି ‘ପଇତା’ । ଚକର ସୌନ୍ଦର୍ଯ୍ୟ ବୃଦ୍ଧି କରେ ପଇତା । ଗୁରୁବାର ସୁଦ୍ଧା ତିନି ରଥର ୧୨ଟି ଚକ ତିଆରି ପ୍ରାୟ ଶେଷ । ବଳକା ଚକର ପହିରେ ବିନ୍ଧ କରୁଛନ୍ତି ବିଶ୍ୱକର୍ମା । ପରେ ବିଲେଇ ବାଡ଼ିଆ ପଦ୍ଧତିରେ ପହି ପିନ୍ଧା ଯାଇ ଶେଷକୁ କିଳା ବାଡ଼ିଆ ହେଉଛି । ତିନି ରଥର ରୂପକାର ସେବକମାନେ ଗୁଜରେ ନୃସିଂହ ରୂପ ଖୋଦେଇ କରୁଛନ୍ତି । ରଥର ସାଲଗୁଜ, ତୀଖଗୁଜ, ଜଳଯନ୍ତ୍ର ଚଉପଟ ଚାଲିଛି । ବିଶ୍ୱକର୍ମାମାନେ ଧଉରା କାଠ ଚଉପଟ କରି ରୂପକାରଙ୍କୁ ଯୋଗାଉଛନ୍ତି । ରୂପକାର ସେଥିରେ ସିଂହବିରାଳ ମୂର୍ତ୍ତି ତିଆରିରେ ବ୍ୟସ୍ତ । ତୁମ୍ବରେ ଅର ଭୁଞ୍ଜି ସିଙ୍ଗଡ଼ା ପ୍ରସ୍ତୁତ ପରେ ମେସିନ୍ ସାହାଯ୍ୟରେ ଅଖ ପାଇଁ ବିନ୍ଧ ତିଆରି ହେଉଛି । ୧୮ଟି ତୁମ୍ବରେ ଅଖ ବିନ୍ଧ ସରିଛି । ରଥଖଳାରେ ବିଲେଇ ବାଡ଼ିଆ ପଦ୍ଧତିରେ ଚକ ପ୍ରସ୍ତୁତ ହେଉଛି । କମାର ଶାଳରେ ଓଝା ସେବକମାନେ ରଥର ଉଛୁଳା ଚକ ପାଇଁ ପନ୍ଦାରି ଏବଂ ବଳା ନିର୍ମାଣ କରୁଛନ୍ତି । ତିନି ରଥ ପାଇଁ ବିଶ୍ୱକର୍ମା ୭୮ଜଣ, ଭୋଇ ସେବକ ୬୫ଜଣ, କରତି ସେବକ ୪ଜଣ, କମାର ସେବକ ୧୫ ଜଣ, ରୂପକାର ସେବକ ୨୧ଜଣ, ତୁମ୍ବ ବିନ୍ଧ କାରିଗର ୨ ଓ ଜଣେ ରଥଖଳା ସହାୟକ ସମେତ ମୋଟ ୧୮୮ ଜଣ ରଥ କାମରେ ନିୟୋଜିତ ଅଛନ୍ତି ।