ସେଦିନ ଥିଲା ମଙ୍ଗଳବାର ସଂନ୍ଧ୍ୟା । ଖବର ଆସିଲା, ନୟାଗଡ଼ ସହରରେ ଅବସ୍ଥିତ ଡିଏଭି ସ୍କୁଲ ଅଧ୍ୟକ୍ଷଙ୍କ ପରଲୋକ ହୋଇଛି । ହଠାତ୍ ନୟାଗଡ଼ ସହରର ଲୋକଙ୍କ ମନରେ ଏକ ଛନକା ପଶି ଗଲା । ଅଭୟ ଭାଇ ଚାଲିଗଲେ ? ଏହି ପ୍ରଶ୍ନ ଅନେକଙ୍କ ମନ ଭିତରେ ସୃଷ୍ଟି ହେବା ସହ ଅଭୟଙ୍କୁ ଜାଣିଥିବା ଲୋକଙ୍କ ମଧ୍ୟରୁ କିଛି ଧାଇଁ ଯାଇଥିଲେ ଜିଲ୍ଲା ମୁଖ୍ୟ ଚିକିତ୍ସାଳୟକୁ । କିଛି ସମୟ ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟ ଏବଂ ଅଭୟଙ୍କ ଘର ଲୋକାରୁଣ୍ୟ ହୋଇ ଉଠିଥିଲା । ଏହା ଭିତରେ ବର୍ଷେ ବିତିଗଲାଣି । କିନ୍ତୁ ଏବେ ବି ଅଭୟ ସମସ୍ତଙ୍କ ମନରେ ଏକ ଭିନ୍ନ ପୁରୁଷ ଭାବେ ପ୍ରତିପାଦିତ ହୋଇ ରହି ଯାଇଛନ୍ତି । ରାମସାହୁ ଗଳିରେ ଗଲା ବେଳେ ମନରେ ଚାଲି ଆସୁଛି ଅଭୟଙ୍କ ମୁହଁ । ଯିଏ ବି ତାଙ୍କୁ ଚିହ୍ନିଥିଲେ, ଡିଏଭି ନାଁ ଶୁଣିଲେ ତାଙ୍କ ଆଖିରେ ନାଚି ଉଠୁଛି ଅଭୟଙ୍କ ହସ । ଆଜି ତାଙ୍କର ପ୍ରଥମ ଶ୍ରାଦ୍ଧ ବାର୍ଷିକ । ନୟାଗଡ଼ ବାସୀଙ୍କ ମଧ୍ୟରୁ ଅନେକ ପ୍ରିୟ ଅଭୟ ଥିଲେ ପ୍ରଧାନ ପରିବାରର ଗର୍ବ ଓ ଗୈାରବ । ଆଜି ତାଙ୍କର ଶ୍ରାଦ୍ଧ ବାର୍ଷିକ ଅବସରରେ ପରିବାର ଓ ସଂମ୍ପର୍କୀୟଙ୍କ ପକ୍ଷରୁ ଅଶ୍ରୁଳ ଶ୍ରଦ୍ଧାଞ୍ଜଳୀ ଜ୍ଞାପନ କରାଯାଇଥିବା ବେଳେ ତାଙ୍କର ନିକଟତ୍ତମ ବନ୍ଧୁ ମାନେ ତାଙ୍କ ଆତ୍ମା ପରମଶାନ୍ତି ଲାଭ କରୁ ବୋଲି କହିଛନ୍ତି ।
