ହସ୍ପିଟାଲରେ ଅକ୍ସିଜେନ ସିଲିଣ୍ଡର ପହଞ୍ଚାଇଲେ ସୋନୁ ସୁଦ : ବଞ୍ଚିଗଲା ୨୨ ଆକ୍ରାନ୍ତଙ୍କ ଜୀବନ

ନୂଆଦିଲ୍ଲୀ (ବାଘୁଆବାର୍ତ୍ତା): ଦେଶରେ କରୋନା ସଂକ୍ରମଣ ବ୍ୟାପକ ହେଉଥିବା ବେଳେ ସଂକ୍ରମିତଙ୍କୁ ସହାନୁଭୁତି ଦେଖାଇବା ଦୂରର କଥା ସେମାନଙ୍କ ପାଖ ମାଡିବାକୁ ଅନେକ ଲୋକ କୁଣ୍ଠାବୋଧ କରୁଛନ୍ତି । ଏମିତି ବି କିଛି ବ୍ୟକ୍ତିତ୍ୱ ଅଛନ୍ତି ଯେ କି ଦିନ ରାତି କରୋନା ଆକ୍ରାନ୍ତଙ୍କ ଠାରୁ ଆରମ୍ଭ କରି ପ୍ରବାସୀ, ଗରିବ, ଦିନ ମଜୁରିଆଙ୍କୁ ଅନବରତ ଭାବେ ସାହାଯ୍ୟ ଯୋଗାଇ ଆସୁଛନ୍ତି । ସେମାନଙ୍କ ମଧ୍ୟରୁ ଅଭିନେତା ସୋନୁ ସୁଦ ଅନ୍ୟତମ । କରୋନା ସଂକ୍ରମଣ ଆରମ୍ଭ ହେବାପରଠୁ ସେ ଲୋକମାନଙ୍କୁ ସାହାଯ୍ୟ ସହଯୋଗ ଯୋଗାଇ ଆସୁଛନ୍ତି । ଦିନ ରାତି ସେ ତାଙ୍କ ଟିମ ସହ ମିଶି କରୋନାରେ ପ୍ରଭାବିତ ଲୋକମାନଙ୍କୁ ସାହାଯ୍ୟ କରିବାରେ ଲାଗିପଡିଛନ୍ତି । କେତେବେଳେ ରୋଗୀଙ୍କ ପାଇଁ ଅକ୍ସିଜେନ ସିଲିଣ୍ଡର ଯୋଗାଇଦେଉଛନ୍ତି ତ କେତେବେଳେ କାହାର ପ୍ଳାଜା ଦରକାର ହେଲେ ତୁରନ୍ତ ପହଞ୍ଚିଯାଉଛନ୍ତି । ନିକଟରେ ବେଙ୍ଗାଲୁରୁରେ ୨୨ ଜଣ କରୋନା ଆକ୍ରାନ୍ତଙ୍କ ଜୀବନ ବଞ୍ଚାଇ ଲୋକଙ୍କ ନଜରରେ ସୋନୁ ସୁଦ ପୁଣିଥରେ ମହାନ ହୋଇଯାଇଛନ୍ତି । ଗତ ମଙ୍ଗଳବାର ସୋନୁଙ୍କ ଟିମରେ କାମ କରୁଥିବା ଜଣେ ସଦସ୍ୟଙ୍କ ନିକଟକୁ ବେଙ୍ଗାଲୁରୁ ୟେଲାହାଙ୍କା ଟାଉନରୁ ଜଣେ ପୋଲିସ ଅଧିକାରୀଙ୍କ ଫୋନ ଆସିଥିଲା । ଏଆରଏକେ ହସ୍ପିଟାଲରେ ଅକ୍ସିଜେନ ସଙ୍କଟ ବ୍ୟାପକ ହେଉଥିବା ଜଣାଇଥିଲେ । ସୋନୁଙ୍କୁ ଏହି ଖବର ମିଳିବା ପରେ, ସେ ଏବଂ ତାଙ୍କ ଟିମ ମଧ୍ୟ ରାତ୍ରିରେ ହିଁ ୧୫ଟି ଅକ୍ସିଜେନ ସିଲିଣ୍ଡର ହସ୍ପିଟାଲରେ ପହଞ୍ଚାଇଥିଲେ । ପରେ ହସ୍ପିଟାଲରେ ଭର୍ତ୍ତି ଥିବା ପ୍ରାୟ ୨୨ ଜଣ ରୋଗୀଙ୍କୁ ତୁରନ୍ତ ଅକ୍ସିଜେନ ଲଗାଇଯାଇଥିଲା । ଯାହାଫଳରେ ରୋଗୀଙ୍କ ଜୀବନ ରକ୍ଷା ପାଇଯାଇଥିଲା । ଘଟଣାକୁ ନେଇ ସୋନୁ ମଧ୍ୟ ନିଜର ପ୍ରତିକ୍ରିୟା ରଖିଛନ୍ତି । ସେ ଏହାର ଶ୍ରେୟ ନିଜ ଟିମକୁ ଦେଇଛନ୍ତି । ସୋନୁ କହିଛନ୍ତି, ‘ମିଶନରେ ସାମିଲ ଥିବା ସମସ୍ତଙ୍କୁ ଧନ୍ୟବାଦ । ଏତେ ସଙ୍କଟ ମଧ୍ୟରେ ଅଧରାତିରେ ସେମାନେ ତୁରନ୍ତ ଅକ୍ସିଜେନ ନେଇ ହସ୍ପିଟାଲରେ ପହଞ୍ଚିଥିଲେ ଏବଂ ୨୨ ଜଣଙ୍କ ଜୀବନ ରକ୍ଷା ପାଇଯାଇଥିଲା ।