ପ୍ରାଧ୍ୟାପକ ଡକ୍ଟର ଲଳିତ କୁମାର ପଟ୍ଟନାୟକଙ୍କ ବିୟୋଗରେ ଶ୍ରଦ୍ଧାଞ୍ଜଳି

ନୟାଗଡ଼, (ବାଘୁଆବାର୍ତ୍ତା): ଶ୍ରୀରାମକୃଷ୍ଣ ଆଦର୍ଶ ଶିକ୍ଷାକେନ୍ଦ୍ର ନୟାଗଡ଼ ପରିସରରେ ବିଦ୍ୟାଳୟର ଉପଦେଷ୍ଟା ଡକ୍ଟର ଲଳିତ କୁମାର ପଟ୍ଟନାୟକଙ୍କ ଉଦ୍ଦେଶ୍ଯରେ ସାମାଜିକ ଦୂରତା ରକ୍ଷା କରି ଏକ ସ୍ମୁତିଚାରଣ ସଭା ଅନୁଷ୍ଠିତ ହୋଇଯାଇଛି। ବିଦ୍ଯାଳୟର ପ୍ରତିଷ୍ଠାତା ସଂପାଦକ ଶ୍ରୀଧର ସାହୁଙ୍କ ଅଧ୍ଯକ୍ଷତାରେ ଅନୁଷ୍ଠିତ ଏହି ଶୋକ ସଭାରେ ବିଦ୍ୟାଳୟର ଗୁରୁଜୀଗୁରୁମା ମାନେ ଯୋଗ ଦେଇଥିବା ବେଳେ ସମାଜସେବୀ ପ୍ରମୋଦ ପଟ୍ଟନାୟକ, ଅବସରପ୍ରାପ୍ତ ପ୍ରଧାନ ଶିକ୍ଷକ ହରିହର ପାତ୍ର,କବି ଗୋଦାବରୀଶ ମିଶ୍ର, ଶିକ୍ଷାବିତ୍ ଅନାଦି ଚରଣ ମହାନ୍ତି, ଅଧ୍ୟାପକ ପ୍ରସନ୍ନ କୁମାର ବସନ୍ତିଆ ଓ ଯୁଗ୍ମ ସଂପାଦକ ସନ୍ତୋଷ କୁମାର ନାୟକ ଯୋଗ ଦେଇଥିଲେ। ଡକ୍ଟର ପଟ୍ଟନାୟକ ଜଣେ ଆଦର୍ଶ ପ୍ରାଧ୍ୟାପକ , ବିଶିଷ୍ଟ ମନସ୍ତତ୍ତ୍ୱବିତ୍ ଭାବେ ଯେତିକି ସୁଖ୍ଯାତି ଅର୍ଜନ କରିଥିଲେ ଜଣେ ଦରଦୀ ମଣିଷ ହିସାବରେ ସେତିକି ପରିଚିତ ହୋଇ ପାରିଥିଲେ। ବିଦ୍ଯାଳୟର ଉପଦେଷ୍ଟା ଭାବେ ପ୍ରତ୍ଯେକ ସମୟରେ ବିଦ୍ଯାଳୟର ଉନ୍ନତି ପାଇଁ ସୁଚିନ୍ତିତ ପରାମର୍ଶ ଦେଉଥିଲେ। ବିଦ୍ୟାଳୟର ବିଭିନ୍ନ ପର୍ବ ପାର୍ବାଣୀରେ ଯୋଗ ଦେବା ସହିତ ବାର୍ଷିକ ଉତ୍ସବରେ ଅଧ୍ଯକ୍ଷତା କରନ୍ତି। ତାଙ୍କ ବିୟୋଗରେ ବିଦ୍ଯାଳୟ ଜଣେ ମୁରବୀଙ୍କୁ ହରାଇଲା ବୋଲି ସଂପାଦକ ଶ୍ରୀଯୁକ୍ତ ସାହୁ ମତବ୍ୟକ୍ତ କରିଥିଲେ।