ନୂଆଦିଲ୍ଲୀ, (ବାଘୁଆବାର୍ତ୍ତା): କେନ୍ଦ୍ର ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ମନ୍ତ୍ରଣାଳୟ ଫେବ୍ରୁଆରୀ ୨୫ରେ ଏକ ଗେଜେଟ ବିଜ୍ଞପ୍ତି ଜରିଆରେ ନୂଆ ଆଇଟି ନିୟମ ଜାରି କରିଥିଲା । ତେବେ ଏ ପର୍ୟ୍ୟନ୍ତ ଅଧିକାଂଶ ପ୍ରମୁଖ ସୋସିଆଲ ମିଡିଆ ସଂସ୍ଥା ଏହି ନିୟମକୁ ଲାଗୁ କରିସାରିଲେଣି । ୩ ମାସ ମଧ୍ୟରେ ଏହି ନିୟମକୁ ପାଳନ କରିବା ପାଇଁ ସୋସିଆଲ ମିଡିଆ କମ୍ପାନିଗୁଡ଼ିକୁ ନିର୍ଦ୍ଦେଶ ଦେଇଥିଲା । ଏ ପର୍ୟ୍ୟନ୍ତ ଟ୍ୱିଟର ଏହାକୁ ମାନିନାହିଁ । ମନ୍ତ୍ରଣାଳୟ ସୂତ୍ରରୁ ଜଣାପଡ଼ିଛି ଯେ ଗୁଗୁଲ, ଫେସବୁକ, ହ୍ୱାଟ୍ସଆପ, କୁ, ସେୟାରଚାଟ, ଟେଲିଗ୍ରାମ ଓ ଲିଙ୍କଡଇନ ଭଳି ପ୍ରମୁଖ ସୋସିଆଲ ମିଡିଆ ସଂସ୍ଥା ଭାରତର ନୂଆ ଆଇଟି ନିୟମକୁ ଗ୍ରହଣ କରିସାରିଲେଣି । ଏହା ଅନୁସାରେ ସେମାନେ ମୁଖ୍ୟ ଅନୁପାଳନ ଅଧିକାରୀ, ନୋଡାଲ କଣ୍ଟାକ୍ଟ ପର୍ସନ ଓ ଅଭିଯୋଗ ପ୍ରତିକାର ଅଧିକାରୀଙ୍କ ବିବରଣୀ ଆଦି ସେୟାର କରିସାରିଲେଣି । ହେଲେ ଟ୍ୱିଟର ଏ ପର୍ୟ୍ୟନ୍ତ ଏହାକୁ ଗ୍ରହଣ କରିନାହିଁ । ଏମିତି କି ଦୁଇଦିନ ତଳେ ଏହା ସରକାରଙ୍କଠାରୁ ୩ ମାସ ଅତିରିକ୍ତ ସମୟ ମାଗିସାରିଛି । ନୂଆ ଆଇଟି ନିୟମକୁ ନେଇ କେନ୍ଦ୍ର ସରକାର ଏବଂ ଟ୍ୱିଟର ମଧ୍ୟରେ ଜୋରଦାର ମୁହାଁମୁହିଁ ଜାରି ରହିଛି । ଟ୍ୱିଟର ପକ୍ଷରୁ ହେଉଥିବା ଅଭିଯୋଗ ଉପରେ କେନ୍ଦ୍ର ସରକାର ଜବାବ ଦେଇଛନ୍ତି । ଆଇଟି ମନ୍ତ୍ରଣାଳୟ କହିଛି ଯେ ଟ୍ୱିଟରର ଧମକପୂର୍ଣ୍ଣ ଅଭିଯୋଗ ଭିତ୍ତିହୀନ । ଦିଲ୍ଲୀ ପୁଲିସ ମଧ୍ୟ ଟ୍ୱିଟରର ବିବୃତିକୁ ମିଥ୍ୟା ବୋଲି କହିସାରିଛି । ଟ୍ୱିଟର ଭାରତରେ ପ୍ରଚଳିତ ବ୍ୟବସ୍ଥାକୁ ଦୁର୍ବଳ କରିବାକୁ ଚାହୁଁଛି । ବିଶ୍ୱର ସବୁଠୁ ବଡ଼ ଗଣତନ୍ତ୍ର ଉପରେ ନିଜର ସର୍ତ୍ତ ଲାଗୁ ପାଇଁ ଚେଷ୍ଟା କରୁଛି ଟ୍ୱିଟର ।
