କରୋନାରୁ ମୁକ୍ତି ପାଇଁ ଚୋବାଇଲେ ମଲା ବିଷାକ୍ତ ସାପ, ଗିରଫ ସହ ସାତ ହଜାର ଜୋରିମାନା

ମଦୁରାଇ (ବାଘୁଆବାର୍ତ୍ତା): ତାମିଲନାଡୁ ମଦୁରାଇ ଜିଲ୍ଲାର ଜଣେ ୫୦ ବର୍ଷ ବୟସ୍କ କୃଷି କର୍ମଚାରୀଙ୍କୁ ଗୁରୁବାର ଦିନ ଗିରଫ କରିଛି ବନ ବିଭାଗ । ବ୍ୟକ୍ତି ଜଣଙ୍କ ଏକ ମୃତ ସାପକୁ ଚୋବାଉଥିବାର ଭିଡିଓ ସାଇବର ସ୍ପେସରେ ଭାଇରାଲ୍ ହୋଇଥିଲ। । ପେରୁମାପାଟୀ ନିବାସୀ ଭାଡିଭେଲୁ ନାମକ ବ୍ୟକ୍ତିଙ୍କୁ ଗିରଫ କରିବା ସହ ୭,୦୦୦ ଟଙ୍କା ଜରିମନା କରିଛି ବନ ବିଭାଗ । ଭାଇରାଲ୍ ଭିଡିଓରେ ଭାଡିଭେଲୁ ଏକ ବିଷାକ୍ତ ସାପକୁ ଚୋବାଉଥିବା ନଜର ଆସିଥିଲେ । ସାପଗୁଡିକ କୋଭିଡ୍-୧୯ର ଆଣ୍ଟିଡୋଟ୍ ବୋଲି ଭାଡିଭେଲୁ ଦାବି କରୁଥିବା ଦେଖିବାକୁ ମିଳିଛି । ଏହି ଭିଡିଓରେ ଭାଡିଭେଲୁ କହିଛନ୍ତି ଯେ, କରୋନା ଭାଇରସରୁ ନିଜକୁ ରକ୍ଷା କରିବା ପାଇଁ ସେ ସାପକୁ ଚୋବାଇଥିଲେ । ଏକ ରିପୋର୍ଟ ଅନୁଯାୟୀ, ଜିଲ୍ଲା ବନ ଅଧିକାରୀ (ଡିଏଫ୍ଓ) ଏସ ଆନନ୍ଦ ଭାଇରାଲ୍ ଭିଡିଓ ଦେଖିବା ପରେ ପେରୁମାପାଟୀରୁ ଉକ୍ତ ବ୍ୟକ୍ତିଙ୍କୁ ଖୋଜି ବାହାର କରିବା ପାଇଁ ଏକ ଟିମ୍ କୁ ନିର୍ଦ୍ଦେଶ ଦେଇଥିଲେ । ପରେ ଭାଡିଭେଲୁକୁ ଗିରଫ କରାଯାଇଥିଲା । ସାପ ଚୋବାଇବା ପାଇଁ ତାଙ୍କ ଉପରେ ୭,୦୦୦ ଟଙ୍କାର ଜରିମନା ଲଗାଯାଇଛି । ଡିଏଫଓ କହିଛନ୍ତି ଯେ, ଅଭିଯୁକ୍ତ କହିଛି କିଛି ଲୋକ ତାଙ୍କୁ ସାପ ଖାଇବାକୁ ବାଧ୍ୟ କରିଥିଲେ । ଘଟଣା ସମୟରେ ସେ ମଦ୍ୟପାନ କରିଥିଲେ ବୋଲି ଡିଏଫଓ କହିଛନ୍ତି । ଭାଡିଭେଲୁ ପୂର୍ବରୁ ମରିଯାଇଥିବା ସାପକୁ ଚୋବାଇଥିଲେ । ସେ ଭାଗ୍ୟବାନ ଥିଲେ ଯେ ସେ ସାପର ବିଷ ଗ୍ରନ୍ଥିରେ କାମୁଡିନଥିଲେ । ଏହି ସାପ ବିଷରେ ନ୍ୟୁରୋଟକ୍ସିନ୍ ଥାଏ ଯାହା ମଣିଷକୁ ପକ୍ଷାଘାତ କରିପାରେ ବୋଲି ରିପୋର୍ଟରେ ଦର୍ଶାଯାଇଛି ବୋଲି ଡିଏଫ୍ଓ କହିଥିଲେ ।