ନୟାଗଡ଼ (ବାଘୁଆବାର୍ତ୍ତା) : ଏକ ଚେକ୍ ବାଉନ୍ସ ମାମଲାରେ ଶିକ୍ଷୟତ୍ରୀଙ୍କୁ ୬ ମାସ ଜେଲ ଦଣ୍ଡ ଶୁଣାଇଛନ୍ତି ନୟାଗଡ଼ ଏସ.ଡିଜେ.ଏମ୍ ସଦ୍ୟସ୍ନାତା ପତି । ସୂଚନାନୁସାରେ, ନୟାଗଡ଼ ଜିଲ୍ଲା ଓଡ଼ଗାଁ ବ୍ଲକର ନନ୍ଦିଘର ଉଚ୍ଚ ବିଦ୍ୟାଳୟର ହିନ୍ଦୀ ଶିକ୍ଷୟତ୍ରୀ ଉର୍ମୀଳା ପରିଡ଼ାଙ୍କର ଭୀମଭୋଇ ଗ୍ରାମ୍ୟ ଉନ୍ନୟନ ସଂସଦ ନାମରେ ଏକ ଏନଜିଓ ରହିଛି । ଏହି ଏନଜିଓ ପାଇଁ ସେ ତାଙ୍କ ପିଉସା ବୈାରାଗୀ ପେଣ୍ଠୋଇଙ୍କୁ ୨୦୧୬ ମସିହା ଅଗଷ୍ଟ ମାସ ୧୦ ତାରିଖରେ ୨୫ ଲକ୍ଷ ଟଙ୍କା ଧାର ମାଗିଥିଲେ । ଏକ ମାସ ମଧ୍ୟରେ ସବୁ ଟଙ୍କା ଏନଜିଓ ଅନୁଦାନ ମିଳିବା ପରେ ଫେରାଇବେ ବୋଲି ପ୍ରତିଶୃତି ଦେଇଥିଲେ । ଉକ୍ତ କଥାକୁ ବିଶ୍ୱାସକୁ ନେଇ ଶ୍ରୀଯୁକ୍ତ ପେଣ୍ଠୋଇ ୧୦ ଦିନ ପରେ ୨୨ ଲକ୍ଷ ୪୦ ହଜାର ଟଙ୍କା ଯୋଗାଡ଼ କରି କିଛି ଲୋକଙ୍କ ଉପସ୍ଥିତିରେ ତାଙ୍କୁ ଦେଇଥିଲେ । ଏକମାସ ପରେ ଟଙ୍କା ଫେରସ୍ତ ମାଗିବାରୁ ସେ ୧୩ ଲକ୍ଷ ୬୦ ହଜାର ଟଙ୍କାର ଏକ ଚେକ୍ ପ୍ରଦାନ କରିଥିଲେ । ଏହି ଘଟଣାର କିଛିଦିନ ପରେ ଅବଶିଷ୍ଟ ୮ ଲକ୍ଷ ୮୦ ହଜାର ଟଙ୍କାର ଆଉ ଏକ ଚେକ୍ ପ୍ରଦାନ କରିଥିଲେ । ମାତ୍ର ଶ୍ରୀଯୁକ୍ତ ପେଣ୍ଠୋଇ ବ୍ୟାଙ୍କରେ ଏହା ଜମା କରିବା ପରେ ଆକାଉଣ୍ଟରେ ଟଙ୍କା ନଥିବା କାରଣରୁ ଚେକ ବାଉନ୍ସ ହୋଇଯାଇଥିଲା । ଉକ୍ତ ଘଟଣାକୁ ନେଇ ଶ୍ରୀଯୁକ୍ତ ପେଣ୍ଟୋଇଙ୍କ ଅଭିଯୋଗ କ୍ରମରେ ନୟାଗଡ଼ ଏସଡିଜଏଏମଗ କୋର୍ଟରେ ଏକ କେସ୍ ରୁଜୁ ହୋଇ ଏହାର ବିଚାର ଚାଲିଥିଲା । ସମସ୍ତ ସାକ୍ଷ୍ୟ, ପ୍ରମାଣକୁ ବିଚାର କରି କୋର୍ଟ ଶିକ୍ଷୟତ୍ରୀ ଉର୍ମୀଳା ପରିଡ଼ାଙ୍କୁ ୬ ମାସ ହେଲ ଦଣ୍ଡାଦେଶ ସହ ୨୫ ଲକ୍ଷ ଟଙ୍କା କ୍ଷତିପୂରଣ ଭରଣା କରିବାକୁ ଆଦେଶ ହୋଇଥିବା ବୈାରଗୀ ପେଣ୍ଠୋଇଙ୍କ ଓକିଲ ବଳଭଦ୍ର ମହାନ୍ତି ସୂଚନା ଦେଇଛନ୍ତି ।
