ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲାରେ କରୋନା ଭୟାବହତାକୁ ଦୃଷ୍ଟିରେ ଦେଇ ନୟାଗଡ଼ ବଜାର ସମେତ ସାରା ଜିଲ୍ଲାର ଦୋକାନ ବଜାର ଖୋଲିବା ନିୟମରେ ଜିଲ୍ଲାପାଳ ପରିବର୍ତ୍ତନ କରିଛନ୍ତି । ସକାଳ ୬ ଘଟିକାରୁ ଦିନ ୧ଟା ପର୍ଯ୍ୟନ୍ତ ଜିଲ୍ଲାରେ ବ୍ୟବସାୟ ପ୍ରତିଷ୍ଠାନ ଖୋଲିବାକୁ ନିୟମ କରିଛନ୍ତି । ଏପରିସ୍ଥିତିରେ ନୟାଗଡ଼ ବ୍ୟବସାୟୀମାନେ କିନ୍ତୁ ସମୟ ଅପେକ୍ଷା ଏସ୍ଆଇ ଧର୍ମେନ୍ଦ୍ର ଶିଆଳଙ୍କ ଡାକରକୁ ଅଧିକ ଗୁରୁତ୍ୱ ଦେଉଛନ୍ତି । ଦିନ ୧ଟା ବାଜିବା ପରେ ମଧ୍ୟ ବ୍ୟବାସାୟୀମାନେ ଦୋକାନ ବଜାର ବନ୍ଦ କରୁନଥିବା ବେଳେ ଏସ୍ଆଇଙ୍କ ଗୋଟିଏ ଡାକରାରେ ଧଡ଼ା ଧଡ଼ ଦୋକାନ ବନ୍ଦ କରୁଛନ୍ତି । ଟ୍ରାଫିକ ଛକରୁ ସାଇରନ୍ ମାରି ଡାକରା ଛାଡ଼ିଲେ ଓଡ଼ଗାଁ ରାସ୍ତା ପର୍ଯ୍ୟନ୍ତ ଥିବା ସବୁ ଦୋକାନରେ ସଟର୍ ପଡ଼ୁଥିବା ବେଳେ ଖଣ୍ଡପଡ଼ା ରାସ୍ତାର ବନଖଣ୍ଡ ଅଧିକାରୀଙ୍କ କାର୍ଯ୍ୟାଳୟ ପାଶ୍ୱର୍ରୁ ଡାକିଲେ ହାଟ ପଡ଼ିଆ ଯାଏଁ ସଟର୍ ପଡ଼ୁଥିବା ଦେଖିବାକୁ ମିଳୁଛି । ଦୋକାନୀଙ୍କ ଭିତରେ ଶିଆଳ ଡାକରାକୁ ନେଇ ଯେତିକି ଭୟ ରହିଛି, ଜଣେ କର୍ତ୍ତବ୍ୟ ପରାୟଣ ପୁଲିସ କର୍ମଚାରୀଙ୍କ ପାଇଁ ସେତିକି ସମ୍ମାନ ରହିଥିବା ଜଣାଯାଇଛି । ଅନ୍ୟପକ୍ଷେ, ବ୍ୟବସାୟୀଙ୍କଠାରୁ ଆରମ୍ଭ କରି ବୁଦ୍ଧିଜୀବୀ ପର୍ଯ୍ୟନ୍ତ ଏସ୍ଆଇ ଧର୍ମେନ୍ଦ୍ର ଶିଆଳଙ୍କୁ ବିଗତ ଦିନର ରାମଶିଆଳଙ୍କ ସହ ତୁଳନା କରୁଛନ୍ତି । ସ୍ୱର୍ଗତ ଭାଗବତ ବେହେରା ମନ୍ତ୍ରୀ ଥିବା ବେଳେ ନୟାଗଡ଼କୁ ଜଣେ ଆପିଏସ୍ ଅଫିସର୍ ଏସଡିପିଓ ଭାବେ ଆସିଥିଲେ । ସେହି ସମୟରେ ଉକ୍ତ ଅଫିସର ଜଣଙ୍କ ପୁଲିସ କ୍ଷମତା ପ୍ରୟୋଗ କରି ନୟାଗଡ଼ର ବାତରା, ଚୋର, ଖଣ୍ଡ ତଥା ଅସମାଜିକ ବ୍ୟକ୍ତିଙ୍କ ବ୍ୟାଣ୍ଡ ବଜାଇ ଦେଇଥିଲେ । ନୟାଗଡ଼ ବାସୀ ଉକ୍ତ ଆପିଏସ୍ ଅଫିସରଙ୍କ କାର୍ଯ୍ୟ କରିବାର ଢଙ୍ଗ ଏବଂ ଦକ୍ଷତାକୁ ନେଇ ତାଙ୍କୁ ରାମଶିଆଳ ନାମ ଦେଇଥିଲେ । ଉକ୍ତ ରାମଶିଆଳଙ୍କ କାର୍ଯ୍ୟକୁ ଆଜି ପର୍ଯ୍ୟନ୍ତ ନୟାଗଡ଼ ବାସୀ ମନେ ରଖିଥିବା ବେଳେ ଏବେ ଧର୍ମେନ୍ଦ୍ର ଶିଆଳଙ୍କୁ ଦେଖି ରାମଶିଆଳଙ୍କ କଥା ସ୍ମରଣ କରୁଛନ୍ତି । ୫ଟି ଓ ମୋ ସରକାର ଢାଞ୍ଚାକୁ ସଠିକ୍ ଆପଣାଇଥିବା ଏସ୍ଆଇ ଶିଆଳ, ରାମଶିଆଳ ନହୋଇ ପାରିଲେ ବି ଲୋକଙ୍କ ମନରେ ଅନେକ ଦିନ ରହିବେ ବୋଲି ଅନେକ ମତ ଦେଇଛନ୍ତି । ନିଜର ପୁଲିସିଆ ଢଙ୍ଗଠାରୁ ବହୁ ଦୂରରେ ଥିବା ଏବଂ ଲୋକ ସଂମ୍ପର୍କ ଦିଗରେ ବହୁ ଆଗରେ ଥିବା ଏହି ଏସ୍ଆଇଙ୍କ ଡାକରାକୁ ନେଇ ଏବେ ଲୋକେ କହୁଛନ୍ତି, ‘ଶିଆଳ ଡାକିଲାରେ’ ।
