ଶ୍ୟାମବନ୍ଧୁ ଉଚ୍ଚ ବିଦ୍ୟାଳୟ ଛାତ୍ରଙ୍କୁ ମାଡ଼ ଘଟଣା, ଶିଶୁ ଅଦାଲତରେ ୧୦ ନାବାଳକ ହାଜର

ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ବ୍ଲକ ଅନ୍ତର୍ଗତ ମାଛିପଡ଼ା ଶ୍ୟାମବନ୍ଧୁ ଉଚ୍ଚ ବିଦ୍ୟାଳୟରେ ସବର୍ଣ୍ଣ ଓ ଅସବର୍ଣ୍ଣ ଛାତ୍ରଛାତ୍ରୀଙ୍କ ମଧ୍ୟରେ ରହିଥିବା ବିବାଦ ଘଟଣାକୁ ନେଇ ଶୁକ୍ରବାର ବିଦ୍ୟାଳୟ ରଣକ୍ଷେତ୍ର ପାଲଟିଥିଲା । ଅସବର୍ଣ୍ଣ ଛାତ୍ରମାନେ ସଂଘବଦ୍ଧ ଭାବେ ସବର୍ଣ୍ଣ ଛାତ୍ରଙ୍କୁ ଆକ୍ରମଣ କରିଥିଲେ । ଦୁଇ ଛାତ୍ର ଗୁରୁତର ଅବସ୍ଥାରେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତୀ ହୋଇଥିଲେ । ଘଟଣାକୁ ନେଇ ବିଦ୍ୟାଳୟ ପ୍ରଧାନଶିକ୍ଷକ ଫକିର ପ୍ରଧାନ ଥାନାରେ ଅଭିଯୋଗ କରିଥିଲେ । ସଦରଥାନା ପୁଲିସ ଏକ ମାମଲା ରୁଜୁ କରିଥିବା ବେଳେ ଥାନା ଅଧିକାରୀ ବିଜୟା ସାହୁ ଏହାର ତଦନ୍ତ ଦାୟିତ୍ୱରେ ରହିଥିଲେ । ମାମଲାରେ ସଂଶ୍ଲିଷ୍ଟ ଉଭୟ ପକ୍ଷର ୧୦ ଜଣ ନାବାଳକଙ୍କୁ ପୁଲିସ ଆଜି ଶିଶୁ ଅଦାଲତରେ ହାଜର କରିଥିବା ଥାନା ଅଧିକାରୀ ବିଜୟା ସାହୁ ସୂଚନା ଦେଇଛନ୍ତି ।