ବରଗଡ, (ବାଘୁଆବାର୍ତ୍ତା): ବରଗଡରେ ସ୍କ୍ରବ୍ ଟାଇଫସ୍ ଆତଙ୍କ ନେଇ ରିପୋର୍ଟ ତଲବ । ବରଗଡ ଜିଲ୍ଲା ପ୍ରଶାସନକୁ ସ୍ବାସ୍ଥ୍ୟ ନିର୍ଦ୍ଦେଶାଳୟ ରିପୋର୍ଟ ମାଗିଛି । ଏ ନେଇ ସ୍ବାସ୍ଥ୍ୟ ନିର୍ଦ୍ଦେଶକ ସୂଚନା ପ୍ରଦାନ କରିଛନ୍ତି । ରାଜ୍ୟରେ ସ୍କ୍ରବ୍ ଟାଇଫସ୍ ଯୋଗୁଁ ୬ ଜଣଙ୍କ ମୃତ୍ୟୁ ହେଲାଣି । ବରଗଡ଼ରେ ସର୍ବାଧିକ ୫ ଜଣଙ୍କ ମୃତ୍ୟୁ ହୋଇଥିବା ବେଳେ ସୁନ୍ଦରଗଡ଼ରେ ଜଣେ ରୋଗୀଙ୍କ ଜୀବନ ନେଇଛି ସ୍କ୍ରବ୍ ଟାଇଫସ୍ । ଏକ ପ୍ରକାର କ୍ଷୁଦ୍ର କୀଟ କାମୁଡ଼ିବା ପରେ ସ୍କ୍ରବ୍ ଟାଇଫସ୍ ରୋଗରେ ଲୋକେ ଆକ୍ରାନ୍ତ ହେଉଛନ୍ତି । ବିଶେଷ କରି ପଶ୍ଚିମ ଓଡ଼ିଶାରେ ବଢ଼ିଚାଲିଛି ସ୍କ୍ରବ୍ ଟାଇଫସ୍ ରୋଗୀଙ୍କ ସଂଖ୍ୟା । ବରଗଡ଼ରେ ଗତ ୧୦ ଦିନ ମଧ୍ୟରେ ୫ ଜଣଙ୍କ ମୃତ୍ୟୁ ହୋଇଥିବା ବେଳେ ଆଉ ୪ ଜଣଙ୍କ ନମୂନା ପଜିଟିଭ ଆସିଛି । ସ୍କ୍ରବ୍ ଟାଇଫସ୍ରେ ମୃତ୍ୟୁ ହୋଇଥିବା ରୋଗୀମାନଙ୍କ ମଧ୍ୟରୁ ଅତାବିରା ବ୍ଲକ୍ରୁ ଜଣେ, ସୋହେଲା ବ୍ଲକ୍ରୁ ଦୁଇ ଜଣ, ବରପାଲି ଓ ଭେଡେନ୍ ବ୍ଲକ୍ରୁ ଜଣେ ଲେଖାଏଁ ରୋଗୀଙ୍କର ମୃତ୍ୟୁ ହୋଇଛି । ହାଲକା ନାଲିଆ ଓ କଳା ରଙ୍ଗର ଏହି କ୍ଷୁଦ୍ର କୀଟ କାମୁଡ଼ିବା ଫଳରେ ଲୋକଙ୍କୁ ଜ୍ବର ହେବା ସହ ଶରୀର ଦୁର୍ବଳ ହୋଇପଡ଼ୁଛି । ଉଚିତ ସମୟରେ ଚିକିତ୍ସା କରାଗଲେ ରୋଗୀ ସୁସ୍ଥ ହୋଇପାରିବ ବୋଲି ବରଗଡ଼ ସିଡିଏମଓ କହିଛନ୍ତି । ସେପଟେ ସୁନ୍ଦରଗଡ଼ ଜିଲ୍ଲାରେ ମଧ୍ୟ ସ୍କ୍ରବ୍ ଟାଇଫସ୍ ଆତଙ୍କ । ଗତ ଜାନୁଆରୀ ମାସରୁ ବର୍ତ୍ତମାନ ସୁଦ୍ଧା ୧୩୨ ଜଣ ରୋଗୀ ଚିହ୍ନଟ ହୋଇଛନ୍ତି । ଜିଲ୍ଲାରେ ସ୍କ୍ରବ୍ ଟାଇଫସ୍ରେ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ସମସ୍ତ ରୋଗୀ ସୁସ୍ଥ ଅଛନ୍ତି ବୋଲି ଭାରପ୍ରାପ୍ତ CDMO କହିଛନ୍ତି । ଝାରସୁଗୁଡ଼ାରେ ଏପର୍ଯ୍ୟନ୍ତ ସ୍କ୍ରବ୍ ଟାଇଫସ୍ ରୋଗରେ କେହି ଆକ୍ରାନ୍ତ ହୋଇନଥିବା ବେଳେ ପଡ଼ୋଶୀ ବରଗଡ଼ ଓ ସମ୍ବଲପୁର ଜିଲ୍ଲାର ସ୍ଥିତି ଦେଖି ଜିଲ୍ଲା ସ୍ବାସ୍ଥ୍ୟ ବିଭାଗ ସତର୍କ ହୋଇଛି । ଏହି ରୋଗର ମୁକାବିଲା ପାଇଁ ସମସ୍ତ ବ୍ୟବସ୍ଥା ଗ୍ରହଣ କରାଯାଇଥିବା ଝାରସୁଗୁଡ଼ା CDMO କହିଛନ୍ତି । ଏକ ପ୍ରକାର କ୍ଷୁଦ୍ର କୀଟ କାମୁଡ଼ିବା ପରେ ସ୍କ୍ରବ୍ ଟାଇଫସ୍ ରୋଗରେ ଆକ୍ରାନ୍ତ ହେଉଛନ୍ତି ଲୋକେ । ଏହି ପୋକ ଖାଲି ଆଖିକୁ ଦେଖାଯାଉନାହିଁ । ଏମିତିରେ ଏହି ପୋକଠାରୁ ଦୂରେଇ ରହିବା ମୁସ୍କିଲ୍ । ଏହି ପୋକ ଖାସ୍ କରି ବୁଦାଳିଆ ବା ବିଲ ବଣରେ କାମ କରୁଥିବା ଲୋକଙ୍କୁ କାମୁଡ଼ିଥାଏ । କାମୁଡ଼ିବା ସ୍ଥାନରେ ଏକ କଳା ଦାଗ ହୋଇଯାଏ । ଜଳାପୋଡ଼ା ହୁଏ । ଜ୍ବର ହୁଏ । ତେବେ ଏହି ରୋଗରେ ଆକ୍ରାନ୍ତ ରୋଗୀ ଚିକିତ୍ସା ଦ୍ବାରା ଭଲ ହୋଇପାରୁଛନ୍ତି । ତେବେ ସ୍କ୍ରବ୍ ଟାଇଫସ୍ ରୋଗୀ ଭୟ ନକରି ତୁରନ୍ତ ଡାକ୍ତରଙ୍କ ପରାମର୍ଶରେ ଚିକିତ୍ସିତ ହେବା ଦରକାର ।
ସ୍କ୍ରବ୍ ଟାଇଫସ୍ ଆତଙ୍କ, ପ୍ରଶାସନକୁ ରିପୋର୍ଟ ମାଗିଲା ସ୍ୱାସ୍ଥ୍ୟ ନିର୍ଦ୍ଦେଶାଳୟ
