ଭୁବନେଶ୍ୱର (ବାଘୁଆବାର୍ତ୍ତା): ଜଣେ ବିଧାୟକଙ୍କ ଜୀବନ ନେଇଛି କରୋନା । ସାରାଦେଶରେ କରୋନା ମହାମାରୀ ଏବେ ବ୍ୟାପକ ହେବାରେ ଲାଗିଛି । ଏହାରି ମଧ୍ୟରେ ଉତ୍ତର ପ୍ରଦେଶ ନୱାବଗଞ୍ଜ ବିଜେପି ବିଧାୟକ କେଶର ସିଂହ ଗଙ୍ଗୱାରଙ୍କ ପରଲୋକ ହୋଇଛି । କରୋନା ଆକ୍ରାନ୍ତ ହେବାପରେ ତାଙ୍କୁ ନୋଏଡାର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଠାରେ ଚିକିତ୍ସିତ ଅବସ୍ଥାରେ ତାଙ୍କର ମୃତ୍ୟୁ ଘଟିଛି । କେଶର ସିଂହ ଗଙ୍ଗୱାରଙ୍କ ସମେତ ବର୍ତ୍ତମାନ ସୁଦ୍ଧା ଉତ୍ତର ପ୍ରଦେଶ ବିଜେପିର୩ ଜଣ ବିଧାୟକ କରୋନାରେ ଆକ୍ରାନ୍ତ ହୋଇ ଜୀବନ ହାରିସାରିଲେଣି । ବିଧାୟକଙ୍କ ଦେହାନ୍ତରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଶୋକ ବ୍ୟକ୍ତ କରିଛନ୍ତି । ଏହା ପୂର୍ବରୁ ଓରେୟା ବିଜେପି ବିଧାୟକ ରମେଶ ଦିବାକର ଏବଂ ପଶ୍ଚିମ ଲକ୍ଷନୌରୁ ବିଜେପି ବିଧାୟକ ସୁରେଶ ଶ୍ରୀବାସ୍ତବଙ୍କର କରୋନା ସଂକ୍ରମଣରେ ଦେହାନ୍ତ ହୋଇଥିଲା । କରୋନାରେ ସଂକ୍ରମିତ ହୋଇ ସୁରେଶ ଶ୍ରୀବାସ୍ତବଙ୍କ ପତ୍ନୀଙ୍କର ମଧ୍ୟ ଦେହାନ୍ତ ହୋଇଥିଲା ।
