ସାର ଦୋକାନରେ କୃଷି ବିଭାଗର ଚଢ଼ାଉ, ଦୋକାନ ସିଲ୍

ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲାରେ ସାରର ବ୍ୟାପକ କଳାବଜାରୀ ହେଉଥିବା ନେଇ ଅଭିଯୋଗ ଆସୁଥିବା ବେଳେ ଆଜି ଜିଲ୍ଲାପାଳ ଡ. ପୋମା ଟୁଡୁଙ୍କ ନିର୍ଦ୍ଦେଶରେ ଜିଲ୍ଲା କୃଷି ଅଧିକାରୀ ଆୟୁର୍ଦେହୀ ମିଶ୍ରଙ୍କ ନେତୃତ୍ୱରେ ଚଢ଼ାଉ କରାଯାଇଥିଲା । ଇଟାମାଟିର ଏକ ସାର ଦୋକାନରେ ବହୁ ପରିମାଣରେ ସାର ଗଚ୍ଛିତ ଥିବା ଖବର ପାଇ ଏହି ଚଢ଼ାଉ କରାଯାଇଥିବା ବେଳେ ଏଠାରେ ଆନୁମାନିକ ଶହେ ମେଟ୍ରିକ ଟନ୍ ସାର ଗଚ୍ଛିତ କରାଯାଇ କଳାବଜାରୀ ପାଇଁ ରଖାଯାଇଥିବା ଦେଖାଯାଇଥିଲା । ଯାହାକୁ ନେଇ ନୟାଗଡ଼ ତହସିଲଦାର ଭିକାରୀ ସାହୁଙ୍କ ଉପସ୍ଥିତିରେ ଇଟାମାଟି ବଜାର ସ୍ଥିତ ଉମେଶ କୁମାର ସାହୁଙ୍କ ସାର ଗୋଦାମ ଏବଂ ଦୋକାନକୁ ସିଲ୍ କରାଯାଇଥିବା ଜଣାଯାଇଛି । ଏଠାରେ କେତେ ପରିମାଣର ସାର ମହଜୁଦ ରହିଥିଲା ତାହାର ଆକଳ କୃଷି ବିଭାଗ କର୍ମଚାରୀମାନେ କରୁଥିବା ବେଳେ ଆଗାମୀ ଦିନରେ ଜିଲ୍ଲାର ସବୁ ଅଂଚଳରେ ଚଢ଼ାଉ କରାଯିବ ବୋଲି ସୂଚନା ମିଳିଛି ।