ନୟାଗଡ଼, ୧୭ା୧(ସମିସ) : ଜିଲ୍ଲାସ୍ତରୀୟ ଶାନ୍ତି କମିଟି ପ୍ରଥମ ବାର୍ଷିକ ଉତ୍ସବ ଏବଂ ସାଧାରଣ ବୈଠକ ଗମ୍ଭାରିଡିହି ନୀଳକଣ୍ଠେଶ୍ୱର ମନ୍ଦିର ନିକଟରେ ଅନୁଷ୍ଠିତ ହୋଇ ଯାଇଛି । ସ୍ଥାନୀୟ ସରପଞ୍ଚ ଦିବାକର ମିଶ୍ରଙ୍କ ଆବାହକତ୍ୱରେ ଅନୁଷ୍ଠିତ ଏହି ବୈଠକ ନୟାଗଡ଼ ଜିଲ୍ଲାର ୮ ଟି ବ୍ଲକର ଶାନ୍ତି କମିଟିର ସଦସ୍ୟ ତଥା ନ୍ୟାୟପ୍ରଦାନ କ୍ଷେତ୍ରରେ ମୁଖ୍ୟ ଭୂମିକା ଗ୍ରହଣ କରି ଆସୁଥିବା ବ୍ୟକ୍ତିମାନେ ଯୋଗ ଦେଇଥିଲେ । କାର୍ଯ୍ୟକ୍ରମରେ ବ୍ରଜବନ୍ଧୁ ସାହୁ ଏବଂ କୃଷ୍ଣମୋହନ ପାଲଟା ସିଂହ ଅତିଥି ଭାବେ ଯୋଗ ଦେଇଥିଲେ । ଗ୍ରାମାଞ୍ଚଳଠାରୁ ସହର ପର୍ଯ୍ୟନ୍ତ ବିଭିନ୍ନ ସମସ୍ୟାର ସମାଧାନ ପାଇଁ ଏହି ଶାନ୍ତି କମିଟି ବିଭିନ୍ନ ଜିଲ୍ଲାରେ କିପରି ଅଧିକ କ୍ରିୟାଶୀଳ ହୋଇପାରିବ ସେ ଉପରେ ଆଲୋଚନା କରିଥିଲେ । ଆଜିର ଏହି ବୈଠକରେ ନୟାଗଡ଼ ଜିଲ୍ଲାସ୍ତରୀୟ ଓ ବ୍ଲକସ୍ତରୀୟ ଶାନ୍ତି କମିଟି ଗଠନ କରାଯାଇଥିଲା । ନୟାଗଡ଼ ଜିଲ୍ଲା ସ୍ତରୀୟ ସଭାପତି ଭାବେ ଦର୍ପନାରାୟଣପୁର ସଂକର୍ଷଣ ବିଶ୍ୱାଳ ମନୋନୀତ ହୋଇଥିବା ବେଳେ ଜିଲ୍ଲା ସାଧାରଣ ସମ୍ପାଦକ ଭାବେ ରଣପୁର କୃଷ୍ଣମୋହନ ସାହୁ, କୋଷାଧ୍ୟକ୍ଷ ଭାବେ ବିରୁଡା ସରପଞ୍ଚ ଅଜୟ ସ୍ୱାଇଁ ମନୋନୀତ ହୋଇଥିଲେ । ସେହିପରି ନୟାଗଡ଼ ବ୍ଲକ ମୁଖ୍ୟ ଭାବେ ଦିବାକର ମିଶ୍ର, ରଣପୁରରୁ ସତ୍ୟ ମହାପାତ୍ର, ନୂଆଗାଁରୁ ଧ୍ରୁବ ସାହୁ, ଖଣ୍ଡପଡ଼ାରୁ ଯୁଗୋଳ ସାହୁ, ଓଡ଼ଗାଁରୁ ଜୀବନ ରାୟ, ଗଣିଆରୁ ଅନ୍ତର୍ଯ୍ୟାମୀ ମିଶ୍ର, ଭାପୁରରୁ କବିରାଜ ମହାପାତ୍ର ଓ ଦଶପଲ୍ଲାରୁ ରବୀନ୍ଦ୍ର ସାହୁଙ୍କୁ ମନୋନୀତ କରାଯାଇଛି । ସେହିପରି ଆଇନ ସହାୟକ ଓ ପରାମର୍ଶଦାତା ଭାବେ ପ୍ରମୋଦ ବିଶ୍ୱାଳ, ସୁରେଶ ମିଶ୍ର, ଭାଗିରଥି ସାହୁ ଓ ଗୋଲକ ମୁଦୁଲିଙ୍କୁ ସର୍ବସମ୍ମତି ଭାବେ ମନୋନୀତ କରାଯାଇଥିଲା । ଏହି ବୈଠକରେ ୮ଟି ବ୍ଲକର ଶତାଧିକ ବରିଷ୍ଠ ଏବଂ ସମ୍ମାନସ୍ପଦ ବ୍ୟକ୍ତି ଅଂଶଗ୍ରହଣ କରିଥିଲେ ।
