ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ପୌରପରିଷଦ ପରିଚାଳିତ ସ୍ଥାନୀୟ ଈଶ୍ୱର କଲ୍ୟାଣ ମଣ୍ଡପ ସଙ୍ଗରୋଧ କେନ୍ଦ୍ରରେ ଗତ ମେ ୩ ତାରିଖରୁ ଆଶ୍ରୟ ନେଇଥିବା ପ୍ରବାସୀ ଶ୍ରମିକମାନଙ୍କୁ ଦିନକୁ ଚାରିଥର ଖାଦ୍ୟ ଯୋଗାଇବା ପାଇଁ ପରିଚାଳନା ଦାୟିତ୍ୱ ନେଇଥିବା ନୟାଗଡ଼ ରୋଟାରୀ କ୍ଲବ୍ ଇତିମଧ୍ୟରେ ଦୁଇ ହଜାରରୁ ଊର୍ଦ୍ଧ୍ୱ ଶ୍ରମିକଙ୍କୁ ରନ୍ଧାଖାଦ୍ୟ ଯୋଗାଇ ସାରିଲାଣି । ପୌରପରିଷଦର କାର୍ଯ୍ୟନିର୍ବାହୀ ଅଧିକାରୀ ସନ୍ତୋଷ କୁମାର ଜେନା ଏବଂ ରୋଟାରୀ କ୍ଲବ୍ର ମୁଖ୍ୟ ସଂଯୋଜକ ସମାଜସେବୀ ପ୍ରମୋଦ ପଟ୍ଟନାୟକ, ସହରାଞ୍ଚଳ ମିଶନ୍ ଅଧିକାରୀ ସରୋଜ ପଣ୍ଡା, ରୋଟାରିଆନ୍ ଧିରେନ୍ କୁମାର ପଟ୍ଟନାୟକଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ସଙ୍ଗରୋଧ କେନ୍ଦ୍ରକୁ ଖାଦ୍ୟ ଯୋଗାଣ ନିୟମିତ ଭାବେ ଚାଲୁରହିଛି । ଜିଲ୍ଲାପାଳ ଡ. ପୋମା ଟୁଡୁଙ୍କ ନିର୍ଦ୍ଦେଶକ୍ରମେ ଆହାରକେନ୍ଦ୍ର ଭ୍ୟାନ୍ରେ ଆହାର କର୍ମଚାରୀମାନଙ୍କ ସହାୟତାରେ ସଙ୍ଗରୋଧ କେନ୍ଦ୍ରକୁ ପ୍ରତ୍ୟହ ଖାଦ୍ୟ ପହଞ୍ଚାଯାଇଛି । କୋଭିଡ୍-୧୯ ନିୟମାନୁଯାୟୀ କର୍ମଚାରୀମାନେ ସମସ୍ତ ପ୍ରକାର ସତର୍କତା ଅବଲମ୍ବନ କରି ସଙ୍ଗରୋଧ କେନ୍ଦ୍ରକୁ ସାହସବାନ୍ଧି ଯାଉଥିବାରୁ ଜିଲ୍ଲାପ୍ରଶାସନର ପ୍ରଶଂସାର ପାତ୍ର ହୋଇଛନ୍ତି ।
ସଙ୍ଗରୋଧ କେନ୍ଦ୍ରରେ ୨ହଜାର ଲୋକଙ୍କୁ ଖାଦ୍ୟଦେଲା ରୋଟାରୀ କ୍ଲବ୍
