ବରିଷ୍ଠ ନାଗରିକଙ୍କ ମୁହଁରେ ଫୁଟିବ ହସ, ହାତ ବଢ଼ାଇଲା ସମ୍ବଲପୁର ପୋଲିସ

ସମ୍ବଲପୁର (ବାଘୁଆବାର୍ତ୍ତା): ଅଲୋଡା, ଅସହାୟ ଅବସ୍ଥାରେ ଦିନ କାଟୁଥିବା ବରିଷ୍ଠ ନାଗରିକଙ୍କ ମୁହଁରେ ହସ ଫୁଟାଇବ ପୁଲିସ । ଦ୍ୱାର ମୁହଁକୁ ଯାଇ ସେମାନଙ୍କ ଦୁଃଖ ବୁଝିବା ସହ ସମସ୍ତ ପ୍ରକାର ସହାୟତା ଯୋଗାଇଦେବ । ଆବଶ୍ୟକସ୍ଥଳେ ପ୍ରତିଦିନ ରନ୍ଧା ଖାଦ୍ୟ ଘରେ ନେଇ ପହଞ୍ଚାଇବ । କରୋନା କାଳରେ ଏସପି ସାଗରିକା ନାଥଙ୍କ ତତ୍ତ୍ୱାବଧାନରେ ସୁନ୍ଦରଗଡ଼ ପୁଲିସ ଆରମ୍ଭ କରିଛି ଏହି ଅଭିନବ ମାନବୀୟ କାର୍ଯ୍ୟକ୍ରମ । ପ୍ରଥମ କରି ସୁନ୍ଦରଗଡ଼ ପୁଲିସ ଜିଲ୍ଲାର ସୁନ୍ଦରଗଡ଼, ବୀରମିତ୍ରପୁର, ରାଜଗାଙ୍ଗପୁର ପୌରାଞ୍ଚଳରେ ଏହି ଅଭିଯାନକୁ କାର୍ଯ୍ୟକାରୀ ହେବାକୁ ଯାଉଛି । ଆଜି ଏସପି ଅଫିସ ସମ୍ମିଳନୀ କକ୍ଷରେ ଆୟୋଜିତ ସାମ୍ବାଦିକ ସମ୍ମିଳନୀରେ ଏସପି ସାଗରିକା ଏହି କାର୍ଯ୍ୟକ୍ରମ ସମ୍ପର୍କରେ ସବିଶେଷ ସୂଚନା ଦେଇଥିଲେ । ୩ ସହରରୁ ଏଥିପାଇଁ ୫ଶହ ବରିଷ୍ଠ ନାଗରିକଙ୍କୁ ଚିହ୍ନଟ କରାଯାଇଛି । ସମସ୍ତଙ୍କୁ ପୁଲିସ ପକ୍ଷରୁ ପ୍ରସ୍ତୁତ ଏକ ସ୍ୱତନ୍ତ୍ର ପରିଚୟପତ୍ର ପ୍ରଦାନ କରାଯିବ । ଯେଉଁଠି ବରିଷ୍ଠ ନାଗରିକଙ୍କ ସବିଶେଷ ଠିକଣା ସହ ପୁଲିସର ଯୋଗାଯୋଗ ମୋବାଇଲ ନମ୍ବର ରହିଛି । ବରିଷ୍ଠମାନେ କୌଣସି ସମୟରେ କୌଣସି ଅସୁବିଧା ବା ସମସ୍ୟାରେ ପଡିଲେ ତୁରନ୍ତ ଉକ୍ତ ନମ୍ବର କଲ ଅଥବା ହ୍ୱାଟସ ଆପରେ ବାର୍ତ୍ତା ଦେଇ ସହଯୋଗ ଲୋଡିପାରିବେ । ଏହି କାର୍ଯ୍ୟକ୍ରମରେ ପୁଲିସ ବରିଷ୍ଠ ନାଗରିକଙ୍କୁ ଖାଦ୍ୟ, ଔଷଧ ଓ ଆବଶ୍ୟକତା ଅନୁସାରେ ଅନ୍ୟ ସହାୟତା ଯୋଗାଇବେ ।