ସମ୍ୱଲପୁର, (ବାଘୁଆବାର୍ତ୍ତା): ତିନି ମାସ ପରେ କାଲିଠୁ ଭକ୍ତଙ୍କୁ ଦର୍ଶନ ଦେବେ ସମ୍ୱଲପୁରର ଅଧିଷ୍ଠାତ୍ରୀ ଦେବୀ ମାଆ ସମଲେଶ୍ୱରୀ । ସର୍ବସାଧାରଣ ଦର୍ଶନ ପାଇଁ ସମଲେଶ୍ୱରୀ ମନ୍ଦିର ଖୋଲିବ । ସମଲେଶ୍ୱରୀ ମନ୍ଦିରରେ ସକାଳ ୬ଟାରୁ ସାଢ଼େ ୧୧ଟା ଓ ଅପରାହ୍ଣ ୩ଟାରୁ ସାଢ଼େ ୭ଟା ଯାଏ ସର୍ବସାଧାରଣ ଦର୍ଶନ ଚାଲିବ । କୌଣସି ଭକ୍ତ ମନ୍ଦିରକୁ ଭୋଗ ନେଇ ଆସିପାରିବେ ନାହିଁ । କୌଣସି ଧର୍ମାନୁଷ୍ଠାନରେ ଭୋଗ କିମ୍ବା ପ୍ରସାଦ କରିପାରିବେ ନାହିଁ ଶ୍ରଦ୍ଧାଳୁ । ମନ୍ଦିର ଖୋଲିବା ନେଇ ଗାଇଡଲାଇନ୍ – ୬୫ ବର୍ଷରୁ ଅଧିକ ବୟସ୍କ, ଗୁରୁତର ରୋଗ ଥିବା ବ୍ୟକ୍ତିଙ୍କୁ ମନ୍ଦିର ଆସିବା ମନା । ଗର୍ଭବତୀ ମହିଳା ଓ ୧୦ ବର୍ଷରୁ କମ୍ ଶିଶୁଙ୍କ ଉପରେ କଟକଣା । ଶୃଙ୍ଖଳିତ ଦର୍ଶନ ପାଇଁ ଧାଡ଼ି ବ୍ୟବସ୍ଥା କରାଯାଇଛି । ପ୍ରବେଶ ପଥରେ ଶ୍ରଦ୍ଧାଳୁଙ୍କର ଥର୍ମାଲ ସ୍କ୍ରିନିଂ କରାଯିବ। ଗୋଟିଏ ପଟରେ ପ୍ରବେଶ ଓ ଅନ୍ୟପଟେ ପ୍ରସ୍ଥାନ ବ୍ୟବସ୍ଥା। ମାସ୍କ ପିନ୍ଧିବା, ସାମାଜିକ ଦୂରତା ବଜାୟ ରଖିବା ଓ ସାନିଟାଇଜର ବ୍ୟବହାର ବ୍ୟବସ୍ଥା । ପ୍ରସାଦ ସେବନ ସହ ଦୀପ ଓ ଧୂପଦାନ ବାରଣ କରାଯାଇଛି । କେହି ମନ୍ଦିର ଭିତରେ ବସି ପୂଜାପାଠ କରିପାରିବେ ନାହିଁ । ଭକ୍ତ ମନ୍ଦିର କାନ୍ଥ, ମୂର୍ତ୍ତି କିମ୍ବା ଦେବଦେବୀଙ୍କୁ ସ୍ପର୍ଶ କରିବା ମନା। ସେହିପରି ସମ୍ୱଲପୁର ଜିଲ୍ଲାର ସମସ୍ତ ଧର୍ମାନୁଷ୍ଠାନ ଖୋଲିବାକୁ ନିଷ୍ପତ୍ତି ନେଇଛି ଜିଲ୍ଲା ପ୍ରଶାସନ । ମନ୍ଦିର ଟ୍ରଷ୍ଟ ବୋର୍ଡ, ଚର୍ଚ୍ଚ ୟୁନିୟନ୍, ମସଜିଦ ଆଦି ସମସ୍ତ ଧର୍ମାନୁଷ୍ଠାନ ସହ ଆଲୋଚନା ପରେ ପ୍ରଶାସନ ଏହି ନିଷ୍ପତ୍ତି ନେଇଛି । ଧର୍ମାନୁଷ୍ଠାନ ଖୋଲିବା ନେଇ ଜାରି ହୋଇଛି ଗାଇଡଲାଇନ୍ ।
