ନୂଆଦିଲ୍ଲୀ, (ବାଘୁଆବାର୍ତ୍ତା): ଲୋକସଭା ନିର୍ବାଚନ ପାଇଁ ସମାଜବାଦୀ ପାର୍ଟୀ ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ଜାରି କରିଛି। ସପା ୧୬ ଆଶାୟୀଙ୍କ ନାଁ ଘୋଷଣା କରିଛି। ତାଲିକାରେ ଯାଦବ ପରିବାରରୁ ଡିମ୍ପଲ ଯାଦବ, ଧର୍ମେନ୍ଦ୍ର ଯାଦବ, ଅକ୍ଷୟ ଯାଦବଙ୍କ ନାଁ ମଧ୍ୟ ରହିଛି। ତେବେ, ଏପର୍ଯ୍ୟନ୍ତ ବିଜେପି ସମେତ ଅନ୍ୟ କୌଣସି ଦଳ ପ୍ରାର୍ଥୀ ତାଲିକା ବାହାର କରିନଥିବାବେଳେ, ଏପରି କରି ସପା ଆଗୁଆ ନିର୍ବାଚନ ପ୍ରସ୍ତୁତି କରୁଛି ବୋଲି କୁହାଯାଉଛି। ମୈନପୁରୀରୁ ଲଢ଼ିବେ ଡିମ୍ପଲ:- ସମ୍ଭଲରୁ ଶଫୀକୁରହମାନ ବର୍କଙ୍କୁ ଦ୍ବିତୀୟ ଥର ଓହ୍ଲାଇଛି ଦଳ। ଫିରୋଜାବାଦରୁ ଅକ୍ଷୟ ଯାଦବ, ମୈନପୁରୀରୁ ଡିମ୍ପଲ ଯାଦବ, ଏଟାରୁ ଦେବେଶ ଯାଦବ, ବନ୍ଦାୟୁଁରୁ ଧର୍ମେନ୍ଦ୍ର ଯାଦବ, ଖୀରୀରୁ ଉତ୍କର୍ଷ ବର୍ମା, ଧୋରହରାରୁ ଆନନ୍ଦ ଭଦୋରିଆ, ଉନ୍ନାଓରୁ ଶ୍ରୀମତି ଅନ୍ନ ଟଣ୍ଡନଙ୍କୁ ପ୍ରାର୍ଥୀ କରାଯାଇଛି। ୮୦ରୁ ୬୦ ସିଟ୍ରେ ଲଢ଼ୁଛି ସପା: – ସୂଚନାଯୋଗ୍ୟ, ଚଳିତ ଲୋକସଭା ନିର୍ବାଚନରେ ସପା, କଂଗ୍ରେସ ଏବଂ ରାଷ୍ଟ୍ରୀୟ ଲୋକଦଳ (ଆରଏଲଡି) ମେଣ୍ଟ ସହ ଲୋକସଭା ନିର୍ବାଚନ ଓହ୍ଲାଇବାକୁ ନିଷ୍ପତ୍ତି ନେଇଛି। ୟୁପିର ୮୦ରୁ ୬୦ ସିଟ୍ରେ ସପା ଲଢ଼ିବାକୁ ନିଷ୍ପତ୍ତି ନେଇଛି। ସାତ ସିଟ୍ ଜୟନ୍ତ ଚୌଧୁରୀଙ୍କ ଆରଏଲଡିକୁ ଦିଆଯାଇଛି। ୧୧ ସିଟ୍ରେ ସପା କଂଗ୍ରେସକୁ ଦେଇଛି। ଅବଶ୍ୟ କଂଗ୍ରେସ ତରଫରୁ ଏହି ସିଟ୍କୁ ନେଇ କିମ୍ବା ମେଣ୍ଟକୁ ନେଇ ଏପର୍ଯ୍ୟନ୍ତ କୌଣସି ସୂଚନା ଦିଆଯାଇନାହିଁ । ଏମିତିରେ ସପା ଏବଂ କଂଗ୍ରେସ ମେଣ୍ଟ ଉପରେ ଦ୍ବନ୍ଦ୍ବ ସ୍ଥିତି ରହିଛି। ତେବେ କୁହଯାଉଛି ଉଭୟ ଦଳ ମଧ୍ୟରେ ସହମତି ହୋଇସାରିଛି। ଏହାକୁ ଦେଖି ସପା ଆଶାୟୀଙ୍କ ଘୋଷଣା କରିଛି। ଆଉ ଏମିତିରେ ଏବେ ଏହି ଆଶୟୀଙ୍କୁ ପ୍ରଚାର ଆରମ୍ଭ କରିବାକୁ ଅଧିକ ସମୟ ମିଳିଯିବ। ଗତ ଲୋକସଭା ନିର୍ବାଚନରେ ସପା, ବହୁଜନ ସମାଜବାଦୀ ପାର୍ଟୀ ସହ ମେଣ୍ଟ କରିଥିଲା। ସେତେବେଳେ ୮୦ରୁ ବିଜେପି ୬୨, ବସପା ୧୦ ଏବଂ ସପାକୁ ୫ ସିଟ୍ ମିଳିଥିଲା। ଅପନା ଦଳକୁ ଦୁଇ ସିଟ୍ ମିଳିଥିଲା। ଅବଶ୍ୟ ଏବେ ସପା ପାଖରେ ତିନିଟି ଲୋକସଭା ସିଟ୍ ରହିଛି। କାରଣ ପାଞ୍ଚରୁ ଦୁଇଟି ସିଟ୍କୁ ବିଜେପି ଉପନିର୍ବାଚନରେ ହାତେଇଥିଲା।
ଲୋକସଭା ନିର୍ବାଚନ ପାଇଁ ସମାଜବାଦୀ ପାର୍ଟି ୧୬ ସିଟ୍ ପାଇଁ ଜାରି କଲା ପ୍ରାର୍ଥୀ ତାଲିକା
