ଭୁବନେଶ୍ୱର, (ବାଘୁଆବାର୍ତ୍ତା): ପ୍ରାଥମିକ କୃଷି ସମବାୟ ସମିତି/ଲ୍ୟାମ୍ପସ୍ ପକ୍ଷରୁ ରାଜ୍ୟର ଚାଷୀମାନଙ୍କଠାରୁ ମୂଲ୍ୟ ସହାୟକ ଯୋଜନାରେ ଖରିଫ ଓ ରବିଧାନ, ଡାଲି ଏବଂ ତୈଳବୀଜ ସଂଗ୍ରହ କାର୍ଯ୍ୟ ସମେତ ସାର, ବିହନ, ଫସଲ ଋଣ ଆଦି ବିବିଧ କାର୍ଯ୍ୟ କରାଯାଉଥିବା ପରିପ୍ରେକ୍ଷୀରେ ଏଗୁଡ଼ିକର ଭିତ୍ତିଭୂମିକୁ ସୁଦୃଢ଼ କରାଯିବ ବୋଲି ଖାଦ୍ୟଯୋଗାଣ ଓ ଖାଉଟି କଲ୍ୟାଣ, ସମବାୟ ମନ୍ତ୍ରୀ ଶ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ କହିଛନ୍ତି । ଚାଷୀମାନଙ୍କୁ ସୁବିଧାରେ ସାର ଓ ବିହନ ଆଦି ଯୋଗାଇଦେବା ସହିତ ଆନୁଷଙ୍ଗିକ ସେବା ପ୍ରଦାନ ନିମନ୍ତେ ପ୍ୟାକ୍ସ/ଲ୍ୟାମ୍ପସ୍ଗୁଡ଼ିକରେ ବହୁମୁଖୀ ଗୋଦାମ ଗୃହ ନିର୍ମାଣର ଆବଶ୍ୟକତା ରହିଛି । ଯେଉଁ ପ୍ୟାକ୍ସ/ଲ୍ୟାମ୍ପସରେ ଗୋଦାମ ଗୃହ ନାହିଁ, ସେଠାରେ ଗୋଦାମ ଗୃହ ନିର୍ମାଣ କରାଯିବ । ଆଜି ଆୟୋଜିତ ଏକ ଭର୍ଚୁଆଲ୍ ସମୀକ୍ଷା ବୈଠକରେ ମନ୍ତ୍ରୀ ଶ୍ରୀ ସ୍ୱାଇଁ ଯୋଗଦେଇ କହିଲେ ଯେଉଁସବୁ ପ୍ୟାକ୍ସ/ଲ୍ୟାମ୍ପସ୍ର ନିଜସ୍ୱ ଜମି ରହିଛି ଏବଂ ଗୋଦାମ ଗୃହ ନିର୍ମାଣ ନିମନ୍ତେ ସଂପୃକ୍ତ ନିୟନ୍ତ୍ରିତ ବଜାର କମିଟି ନିକଟରେ ଆବଶ୍ୟକୀୟ ଅର୍ଥ ରହିଛି, ସେସବୁ ସ୍ଥାନରେ ବହୁମୁଖୀ ଗୋଦାମ ଗୃହ ନିର୍ମାଣ କରାଯିବ । ଏ ସଂପର୍କରେ ଏକ ଡାଟାବେସ୍ ଆସନ୍ତା ୧୫ ଦିନ ମଧ୍ୟରେ ପ୍ରସ୍ତୁତ କରିବା ପାଇଁ ମନ୍ତ୍ରୀ ଶ୍ରୀ ସ୍ୱାଇଁ ବିଭାଗୀୟ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ ।
ପ୍ୟାକ୍ସ/ଲ୍ୟାମ୍ପସଗୁଡ଼ିକରେ ସାର ଓ ବିହନ ମହଜୁଦ ରଖିବା ପାଇଁ ୫୦ ଟନ୍ କ୍ଷମତା ବିଶିଷ୍ଟ ୨ଟି ଲେଖାଏଁ ଗୋଦାମ ଗୃହ ସହିତ ଅନ୍ୟାନ୍ୟ ଆନୁଷଙ୍ଗିକ ସୁବିଧା ନିର୍ମାଣର ପ୍ରସ୍ତାବ ରହିଛି । ସଂପୃକ୍ତ ନିୟନ୍ତ୍ରିତ ବଜାର କମିଟି ନିକଟରେ ଉପଲବ୍ଧ ଅର୍ଥରୁ ଏହି ଗୋଦାମ ଗୃହ ନିର୍ମାଣ କରାଯିବ । ଏଥି ପାଇଁ ପ୍ରତ୍ୟେକ ଗୋଦାମ ଗୃହର ବିସ୍ତୃତ ପ୍ରକଳ୍ପ ରିପୋର୍ଟ ପ୍ରସ୍ତୁତ କରାଯିବ । ନିର୍ଦ୍ଦିଷ୍ଟ ସମୟସୀମା ମଧ୍ୟରେ ଗୋଦାମ ଗୃହ ନିର୍ମାଣ ଓ ଏହାର ତଦାରଖ ବ୍ୟବସ୍ଥାକୁ କଡ଼ାକଡ଼ି କରାଯିବା ଉପରେ ମନ୍ତ୍ରୀ ଶ୍ରୀ ସ୍ୱାଇଁ ଗୁରୁତ୍ୱାରୋପ କରିଥିଲେ । ଭର୍ଚୁଆଲ୍ ବୈଠକରେ ସମବାୟ ବିଭାଗର କମିଶନର ତଥା ଶାସନ ସଚିବ ଶ୍ରୀ ବୀରବିକ୍ରମ ଯାଦବ, ଡାଇରେକଫର ଏଗ୍ରିକଲଚର ମାର୍କେଟିଂ ତଥା ଓସାମ୍ ବୋର୍ଡର ସଦସ୍ୟ ସଚିବ ଡ. ଏମ୍. ମୁଥୁକୁମାରଙ୍କ ସମେତ ସମବାୟ ବିଭାଗର ବରିଷ୍ଠ ଅଧିକାରୀମାନେ ଯୋଗଦେଇଥିଲେ ।
ବହୁମୁଖୀ ଗୋଦାମ ଗୃହ ନିର୍ମାଣ ନିମନ୍ତେ ଡାଟାବେସ୍ ପ୍ରସ୍ତୁତ ପାଇଁ ନିର୍ଦ୍ଦେଶ
