ଭୁବନେଶ୍ୱର (ବାଘୁଆବାର୍ତ୍ତା): ପୁଣି ପ୍ରବାସୀ ଶ୍ରମିକଙ୍କୁ ସାହା ହେଲେ ଓଲିଉଡ ଅଭିନେତା ସବ୍ୟସାଚୀ ମିଶ୍ର । ତାମିଲନାଡୁରେ ନିର୍ଯ୍ୟାତନା ସହୁଥିବା ଭଦ୍ରକ ଅଞ୍ଚଳର ୩୫ ଜଣ ଓଡିଆ ଶ୍ରମିକଙ୍କୁ ଉଦ୍ଧାର କରିଛନ୍ତି । ଲକଡାଉନ କଟକଣା ଯୋଗୁ ଶ୍ରମିକମାନେ ସେଠାରେ ଫସି ରହିଥିଲେ । ବିଭିନ୍ନ ନିର୍ଯ୍ୟାତନାର ଶିକାର ହେବା ସହ ଜଣେ ବ୍ୟକ୍ତି ସେମାନଙ୍କୁ ମାଡ ମାରୁଥିବାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା । ଏହି ଭିଡିଓକୁ ଜଣେ ବ୍ୟକ୍ତି ସୋସିଆଲ ମିଡିଆରେ ସେୟାର କରିବା ସହ ସବ୍ୟସାଚୀଙ୍କୁ ଟ୍ୟାଗ କରିଥିଲେ । ପରେ ସବ୍ୟସାଚୀ ଘଟଣା ସମ୍ପର୍କରେ ଜାଣିବାକୁ ପାଇଥିଲେ । ସେଠାରେ ଫସିଥିବା ଜଣେ ଯୁବକଙ୍କ ଫୋନ ନମ୍ବର ସଂଗ୍ରହ କରି ଯୋଗାଯୋଗ କରିଥିଲେ । ପରେ ସେମାନଙ୍କୁ ଏକ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିଥିଲେ । ଓଡିଶା ପୁଲିସ ଓ ତାମିଲନାଡୁ ପୁଲିସ ସହାୟତାରେ ମାଡ ମାରୁଥିବା ବ୍ୟକ୍ତି ଜଣଙ୍କୁ ଗିରଫ କରାଯାଇଛି । ଘଟଣା ସମ୍ପର୍କରେ ତାମିଲନାଡୁ ପୁଲିସ ଡିଜିଙ୍କୁ ମଧ୍ୟ ଅବଗତ କରାଇଥିବା ସବ୍ୟସାଚୀ ଟ୍ୱିଟରରେ ସୂଚନା ଦେଇଛନ୍ତି ।
