ବାରଙ୍ଗ, (ବାଘୁଆବାର୍ତ୍ତା): ରଙ୍ଗ୍ ନମ୍ବରରୁ ଏକ ତରଫା ପ୍ରେମ ନିବେଦନ । ଫସିଗଲେ ପ୍ରେମ ପାଗଳ । କୌଶଳ କ୍ରମେ ରଙ୍ଗ୍ ନମ୍ବର ପ୍ରେମିକକୁ ନିଜ ଘରକୁ ଡାକି ନିର୍ଧୁମ ଛେଚିଲେ ମହିଳା । ଭୁବନେଶ୍ବର ସ୍ଥିତ ଚନ୍ଦ୍ରଶେଖରପୁର ଅରବିନ୍ଦ ନଗରରେ ପରିବାର ସହ ରହୁଥିଲେ ଜଣେ କର୍ମଜୀବୀ ମହିଳା । ଗତ ଦୁଇ ମାସ ତଳେ ତାଙ୍କ ମୋବାଇଲକୁ ଏକ ରଙ୍ଗ୍ ନମ୍ବରରୁ କଲ୍ ଆସିଥିଲା । ଏହା ଏକ ରଙ୍ଗ ନମ୍ବର କହି ମହିଳା ଜଣଙ୍କ ଫୋନ୍ କାଟି ଦେଇଥିଲେ । କିନ୍ତୁ ଏକଥାରେ ଅପରିଚିତ ଯୁବକ ଜଣଙ୍କ ସନ୍ତୁଷ୍ଟ ନହୋଇ ବିଭିନ୍ନ ପ୍ରଲୋଭନ ଦେଖାଇ ମହିଳାଙ୍କୁ ବାରମ୍ବାର ଫୋନ୍ କରୁଥିଲେ । ମହିଳା ଯେତେ ବୁଝାଇଲେ ମଧ୍ୟ ଅପରିଚିତ ଯୁବକ ବୁଝିବାକୁ ନାରାଜ । ଶେଷରେ ମହିଳାଙ୍କ ଘର ଠିକଣା ମାଗିବାରୁ ତାଙ୍କୁ ପ୍ରକୃତ ଠିକଣା ଦେଇ ଦେଇଥିଲେ। ଠିକଣା ଦେବା ପରେ ସୁଲତା ତାଙ୍କର ଜଣେ ସହଯୋଗୀଙ୍କ ସହ ଜଗି ବସିଥିଲେ । ସୋମବାର ସକାଳେ ସମ୍ପୃକ୍ତ ଅପରିଚିତ ଯୁବକ ଜଣଙ୍କ ରଙ୍ଗିଲା ବେଶଭୁଷାରେ ବାଇକ୍ ଯୋଗେ ଆସି ମହିଳାଙ୍କ ଘରେ ପହଞ୍ଚିଥିଲେ । ପୂର୍ବରୁ ପ୍ରସ୍ତୁତ ଥିବା ସୁଲତା ଓ ତାଙ୍କ ସହଯୋଗୀ ଉକ୍ତ ଅପରିଚିତ ଯୁବକଙ୍କୁ ନିର୍ଧୁମ ପିଟିପିଟି ଦରମରା କରି ଦେଇଥିଲେ । ଖବର ପାଇ ଚନ୍ଦ୍ରଶେଖରପୁର ପୋଲିସ ଘଟଣାସ୍ଥଳରେ ପହଞ୍ଚି ଆହାତ ଯୁବକଙ୍କୁ ଉଦ୍ଧାର କରି ଚିକିତ୍ସା ପାଇଁ ପଠାଇଛନ୍ତି । ଆଇନକୁ ହାତକୁ ନେଇ ଏପରି ମାରପିଟ କରିଥିବାରୁ ଉକ୍ତ ମହିଳା ଏବଂ ତାଙ୍କ ସହଯୋଗୀଙ୍କୁ ପୋଲିସ ଥାନାରେ ଅଟକ ରଖି ଘଟଣାର ଅଧିକ ତଦନ୍ତ କରୁଛି ।
